डिप्रेसनलाई जितेर कमेडीमा लागेका सन्तोष: जो च्याम्पियनको उपाधि जित्न भिड्दै छन्

डिप्रेसनलाई जितेर कमेडीमा लागेका सन्तोष: जो च्याम्पियनको उपाधि जित्न भिड्दै छन्

A+ A A-

'कमेडी च्याम्पियन सिजन २' फाइनलनजिक आइपुग्दा निकै चर्चित बन्यो । टप ४ मा भरतमणि पौडेलले प्रस्तुत गरेको 'पारस सरकार' र विक्की अग्रवालले प्रस्तुत गरेको 'पेन्टोमाइम'ले कमेडी च्याम्पियनलाई नयाँ उचाइ दियो । उक्त एपिसोड एक साताभन्दा बढी समय युट्युब ट्रेण्डिङको शीर्ष स्थानमा रह्यो ।

दोस्रो सिजनको सुरुवातदेखि नै दुई प्रतियोगी 'हाइलाइट' भए । भरतमणि र विक्कीबीचको प्रतिस्पर्धाका रूपमा कमेडी च्याम्पियनलाई हेर्ने गरिन्थ्यो । शोमा 'गेस्ट पर्फर्मर' बनेर आएका कमेडियनहरूले पनि अन्य प्रतियोगीहरूलाई उडाउँथे, 'भरत र विक्कीबाहेक अरुलाई कमेडी च्याम्पियनले आईडी कार्ड बनाइदिए हुन्छ, बाहिर उनीहरूलाई चिनाउन सजिलो हुन्छ ।'

भरत र विक्कीको चेपुवामा परेका प्रतियोगी थिए, सन्तोष थापा । जो अहिले उपाधिका लागि उनीहरूसँगै प्रतिस्पर्धा गर्न फाइनलमा आइपुगेका छन् ।

उत्कृष्ट ३ को राउण्डमा सन्तोषले यस्तो प्रस्तुति दिएका छन् कि, अहिले धेरै दर्शकले सन्तोषलाई नै उपाधिको दाबेदार मानिरहेका छन् । युट्युबमा अपलोड भएको भिडियोमा आएका प्रतिक्रियामा सन्तोषले एकछत्र राज गरेका छन् । धेरैले सन्तोषको प्रस्तुति मन परेको भन्दै भोट गर्ने वाचा गरेका छन् ।

एक जना दर्शकले प्रतिक्रिया दिएका छन्, 'हिरोको पालो लास्टमा आउँछ भनेको सुनेको थिएँ । आज देख्न र सुन्न पाइयो । दाम्मी सन्तोष ।'

के सन्तोषले फाइनलमा मात्र राम्रो प्रस्तुति दिएका हुन् त ?

पक्कै होइनन् । सन्तोषले यसअघि पनि राम्रा प्रस्तुतिहरू दिएका छन् । तर, बिडम्बना सन्तोषले 'पर्फर्मर अफ द राउण्ड' भने जित्न सकेनन् । जुन बेला सन्तोषले राम्रो प्रस्तुति दिन्थे, त्यही बेला भरत वा विक्कीले निर्णायकको मन जितिदिन्थे ।

सन्तोषले च्याम्पियनमा आफूलाई भिन्न-भिन्न भूमिकामा प्रस्तुत गरेका छन् । उनी कहिले पुलिस बन्थे, कहिले डन । मेन पावरको मान्छेदेखि पानीको जार ओसार्नेसम्मको भूमिकामा उनी देखिए । अझ, उनले गरेको 'नेपाली टिचेर' निकै उत्कृष्ट प्रस्तुति मानिन्छ ।

राम्रो प्रस्तुति दिएर पनि आफूलाई चिनाउन नसकेका सन्तोषले फाइनलमा आइपुगेपछि गुनासो पोख्छन्- 'नमस्कार, म टप ३ सन्तोष थापा । यो कुरा मलाई मात्रै थाहा छ ।'

सन्तोषको पहिलो पञ्चले नै निर्णायकको ध्यान खिच्छ । लगत्तै उनले दोस्रो पञ्च छोड्छन्, 'कमेडी च्याम्पियनले मलाई धेरै कुरा सिकायो । अझ विशेषगरी खर्च कसरी गर्ने भन्ने सिकायो । ह्लासामा सुन छ, कान मेरो बुच्चै । अहिले यो उखान फेरिएर मेरो मम्मीले भन्नुहुन्छ, 'कमेडी च्याम्पियनमा छोरो छ, कान मेरो बुच्चै ।'

सन्तोषको यो पञ्चले निर्णायक मात्र होइन, उपस्थित दर्शकमा पनि हाँसोको फोहोरा छुटाउँछ । पाहुना बनेर आएका दीपकराज गिरी र दीपाश्री निरौला पनि खुलेरै हाँस्छन् ।

'कमेडी च्याम्पियनले होम भिजिटमा लाने कुरा छ रे । होम छ कि छैन', निर्दोष पारामा सन्तोष अर्को पञ्च थप्छन् ।

सन्तोषले बोलेका यी संवाद ब्याङ्ग्य मात्र होइनन्, नेपालमा चलिआएका रियालिटी शोहरूको यथार्थता पनि थियो । उनले मलिन स्वरबाट रियालिटी शोको वास्तविकतामाथि गम्भीर प्रश्न गरिरहेका थिए ।

प्रस्तुतिबाट नै सन्तोषले आफू टप ३ मा आइसकेकाले विजेता बन्ने आशा व्यक्त गर्छन् । तर, त्यसपश्‍चात् हुने सम्भावनालाई उनले निकै चोटिलो जोक बनाएका छन्, 'मलाई जित्दा पनि गाह्रो छ । सबभन्दा गाह्रो त यहाँबाट निस्केर जान छ । यताबाट भरत दाइका फ्यानहरू । यताबाट विक्की दाइका साथीहरू, तर भरत दाइकै फ्यानहरू । यहाँबाट निक्लिहाले पनि भन्लान्, सिसा नभएको कार किन ल्याएको भनेर ।'

स्टेजमा सन्तोषको मायालाग्दो अनुहार देखिन्छ । तर, उनले बोलेका संवादहरूले दर्शकमाझ हाँसो गुञ्जायमान गराइरहेको थियो । अहिले दर्शकले नै भन्दै छन्, 'सन्तोष उपाधिको दाबेदार हो ।'

सन्तोष आफूले फाइनल पुगेर पाएको माया देखेर दंग छन् । उनले यस्तो चर्चा पाएका छन्, जुन उनी आफैँले सोचेका पनि थिएनन् ।

सन्तोष भन्छन्, 'मैले भित्री मनदेखि नै महसुस गरेका कुराहरू थिए यी । यसलाई प्रस्तुत गर्ने रहर लागिरहेको थियो । फाइनलमा आएर त्यो प्रस्तुत गरेँ । आफ्नो मनको कुराभन्दा धेरैले माया गर्नुभएको छ । निकै खुसी लागेको छ ।'

सन्तोषलाई यो विषय लेख्न उत्ति गाह्रो भएन । किनभने, उनले यसमा आफ्नै यथार्थतालाई जोडे । मायालाग्दो बनेर गरेको प्रस्तुतिबाट उनले दर्शकको ध्यान खिच्न सके । सन्तोष भन्छन्, 'दर्शकलाई निर्दोष भएर गरेको अभिनयले छुने रै'छ ।'

०००

अहिले सन्तोष गृहजिल्ला गोरखा पुगेका छन् । कारण, भोट माग्न । अहिले उनी चुनावी माहौलका नेताजस्तै बनेका छन् । विभिन्न कार्यक्रममा जाने, भोट माग्ने, सहयोगको अपिल गर्ने गरिरहेका छन् ।

उत्कृष्ट ३ मा आइसकेपछि सन्तोषलाई उपाधि जित्ने रहर छ । भोटका आधारमा विजेता चुनिने भएकाले उनी अहिले भोट माग्नमै व्यस्त छन् ।

कमेडी च्याम्पियन सुरु गर्दा सन्तोषले आफूलाई 'फाइनलिस्ट'का रूपमा देखेका थिएनन् । यहाँ आउनुको एउटै उद्देश्य थियो- आफ्नै परीक्षा र सिकाइ ।

सन्तोष भन्छन्, 'मेरो कमेडी यात्राका लागि सबैभन्दा ठूलो गुरु नै कमेडी च्याम्पियनको पहिलो सिजन बन्यो । त्यसैले सिक्न र कत्तिको गर्न सक्ने रै'छु भनेर दोस्रो सिजनमा आएको थिएँ । फाइनलिस्ट बन्छु भन्ने सोचेको थिइनँ ।'

प्रत्येक राउण्डमा सन्तोषको ध्यान अर्को राउण्डमा कसरी पुग्ने भन्नेमा नै हुन्थ्यो । आफ्ना-आफन्त र साथीभाइको सहयोगले उनी फाइनलसम्म आइपुगेका छन् । अब उनलाई उपाधि जित्नु छ ।

'फाइनलमा आइसकेपछि जित्ने रहर त भइहाल्छ । मलाई पनि उपाधि जित्ने मन छ । सबैको साथ र माया पाएँ भने जित्छु पनि कि !', सन्तोषले आशा व्यक्त गरे ।

डिप्रेसन जितेर कमेडीतर्फ

सन्तोषले ११ वर्षको उमेरमा नै आफ्नो बुबा गुमाए । आफ्नो अभिभावक गुमाएको चोट उनको दिमागमा नराम्रोसँग पर्‍यो । अन्तत: उनी डिप्रेसनको सिकार बने ।

डिप्रेसनमा भएको बेला उनको सहारा बनेको थियो, कमेडी । आफ्ना-आफन्तले उनलाई कमेडी शो हेर्न सुझाउँथे । उनले त्यो समय विभिन्न कमेडी शोहरू हेरे । लामो समय कमेडी हेरेपछि उनलाई त्यसैमा रुचि बढ्यो ।

उनले विद्यालय जीवनमा केही नाटकहरू पनि गरे । प्राय: नाटक कमेडीमा आधारित हुन्थे ।

पछि उमेर बढ्यो । जिम्मेवारी बढ्यो । विस्तारै उनले कमेडीमा ध्यान दिएनन् ।

पारिवारिक जिम्मेवारी बढेपछि सन्तोषले आफ्नो करिअर सोचे । हट्टाकट्टा देखिने सन्तोषलाई पुलिसमा जाने सोच आयो । प्लस टु सकेर उनी पुलिसमा भर्ती हुन गए ।

उनी पुलिसमा भर्ती भए । दुःखको कुरा, पुलिसमा भर्ती भएको पाचौँ दिनमा नै उनको हात भाँचियो । लामो समय उनले आराम गर्नुपर्‍यो । त्यही समय उनले एउटा नाटक गरे । जसले उनलाई कमेडीमा कमब्याक गरायो ।

सन्तोष भन्छन्, 'दसैँको समय थियो । घाइते भएर बसेको मैले एउटा नाटक गरे । उक्त नाटकलाई धेरैले रुचाइदिनुभयो । त्यसपछि पुन: कमेडीमा रस बस्यो ।'

सन्तोष निको भएर ड्युटीमा फर्किएलगत्तै उनको ढाडमा समस्या आयो । अन्तत: सन्तोषले जागिर छोड्ने निधो गरे । सन्तोष भन्छन्, 'स्वास्थ्य राम्रो नभएपछि कसरी काम गर्न सकिन्थ्यो र ? त्यसैले मैले जागिर छोडिदिएँ ।'

जागिर छोडेर कमेडीमा नै करिअर बनाउने सोच बोकेर काठमाडौं छिरेका थिए सन्तोष । जसले कमेडी च्याम्पियनको प्लेटफर्म पाए ।

०००

सन्तोष आफू निरन्तर हास्य व्यङ्ग्यको क्षेत्रमा नै काम गरिरहने बताउँछन् । कमेडी च्याम्पियनको उपाधि नजिते पनि कमेडी नछोड्ने उनको अठोट छ ।

सन्तोष भन्छन्, 'अहिले मैले धेरै दर्शकको माया पाइरहेको छु । त्यसैले उपाधि नजिते पनि विभिन्न माध्यमबाट दर्शकमाझ नै रहनेछु । हास्य व्यङ्ग्यलाई छोडेर केही गर्ने रहर छैन ।'

प्रकाशित मिति: आइतबार, भदौ २०, २०७८ १८:२१