हँसाउने मञ्चबाट धेरैलाई रुवाएका विक्की: जो च्याम्पियन बन्न नेपाल छिरे

A+ A A-

'कमेडी च्याम्पियन सिजन -२'

एपिसोड : ३४

युट्युबमा अपलोड भएको भिडियोअनुसार ३० मिनेट ५५ सेकेन्डमा उद्‍घोषिका रिमा विश्वकर्माले प्रश्न गर्छिन्, 'कमेडी च्‍याम्पियन सिजन २ मा नयाँ-नयाँ प्रयोग गर्ने कमेडियन को हुन् ?'

निर्णायकद्वय मनोज गजुरेल र ऋचा शर्माले एकसाथ जवाफ दिए, 'विक्‍की...।'

हाे, 'कमेडी च्याम्पियन सिजन २' को उत्कृष्ट ४ सम्म आइपुग्दा सिक्किमका विक्‍की अग्रवाल 'फरक कमेडी गर्ने' प्रतियोगीका रूपमा परिचित बनिसकेका छन् । निर्णायकहरूले पनि उनको फरकपनलाई रुचाउँछन्, दर्शक त्यसैमा हाँस्छन् । निर्णायक र दर्शकलाई खुशी पारेर नै त उनी उत्कृष्ट ४ सम्म आइपुगेका हुन् । निर्णायक खुशी हुँदा उनी पर्फमर अफ द राउण्ड बने, दर्शक खुशी बन्दा उनले धेरै भोट पाए ।

उत्कृष्ट ४ मा दिनुपर्ने प्रस्तुति सबैभन्दा चुनौतीपूर्ण मानिन्छ । राम्रो प्रस्तुति दिए सिधै फाइनलमा पुग्ने मौका पनि पाइन्छ । तर, विक्कीले उत्कृष्ट ४ को राउण्डमा जोखिम मोले । जोखिम यस अर्थमा कि, उनले फाइनल प्रवेश गर्ने राउण्डमा 'पेन्टोमाइम' अभिनय गरे । उनले नबोली अभिनयबाट दर्शक हँसाउने नौलो प्रयाेग गरे ।

झण्डै साढे ६ मिनेट लामो उनको प्रस्तुतिले उपस्थित दर्शकमा हाँसोको फोहोरा छुटाएन । प्रस्तुति सकिँदा निर्णायक मनोज र ऋचासँगै प्रदीप भट्टराईले पनि 'स्ट्याण्डिङ अवेसन' दिए । उनीहरूले विक्कीको तारिफमा गहकिला शब्द खर्चिए । प्रतिस्पर्धाको यो घडीमा आएर विक्कीले गरेको साहसलाई सम्मान गरे ।

जब अर्का निर्णायक सन्तोष पन्तले विक्कीको प्रस्तुति नबुझेको प्रतिक्रिया दिए, तब विक्की केही भावुक बने । सन्तोषले भनेका थिए, 'नयाँ प्रयोग गर्‍यौ ठीक छ । तर, हाम्रो समाजले यसलाई त्यति बुझ्दैन । मैले त बुझिनँ, अरुको के कुरा । फिलोसफी त भयो । तर, हाँसो आएन । यहाँ कोही त हाँसेन ।'

पन्तको यस्तो प्रतिक्रियापछि विक्की भावुक देखिए । रून्चे स्वरमा जवाफ दिए, 'बाहिरिए पनि बाहिरिन्छु, तर नयाँ गर्छु भनेर नै यो अभिनय गरेको हो । म बाहिरिए पनि मलाई पश्चाताप हुनेछैन ।'

विक्कीको कुरा सुनेपछि निर्णायक प्रदीपले थपे, 'विक्कीले च्याम्पियनको मञ्चमा कतिसम्म हसाउँछ भन्ने प्रमाणित गरिसकेको छ ।'

प्रदीपको कुरा नसकिँदै विक्कीको आँखा रसाउँछ । उनी मञ्च छोडेर भित्र पस्छन् । आँसु बगाउँछन् । निर्णायकहरूले उनलाई अंकमाल गर्दै सहानुभूति दिन्छन् । शनिबार राति च्याम्पियनको यो भाग प्रसारण भएपछि सामाजिक सञ्जालमा विक्कीको खुबै चर्चा चलिरहेको छ । कसैले विक्कीको प्रयोगमाथि मुक्तकण्ठले प्रशंसा गरेका छन्, कसैले हँसाउन नसकेको भन्दै आलाेचना ।

विक्कीको प्रस्तुति नबुझेको भन्ने निर्णायक पन्तमाथि त धेरैले प्रश्न पनि उठाएका छन् । कमेडीको फर्मलाई नबुझ्ने तथा नस्वीकार्ने निर्णायक च्याम्पियनकै लागि घातक भएको भन्दै सन्तोषको चर्को आलोचना भइरहेको छ ।

सामाजिक सञ्जालमा विक्कीको चर्चा चलिरहँदा विक्की भने मौन छन् । अन्य विषयमा बोल्न तयार हुने विक्‍की शनिबारको प्रस्तुतिबारे बोल्न हिच्किचाउँछन्, 'मलाई धेरै फोन आइरहेका छन् । हिजोको प्रस्तुतिको विषयमा मलाई बोल्ने मन छैन ।'

विक्कीलाई 'आँसु बेचेर भोट पायो' भन्ने आरोप लाग्ने डर छ । त्यसैले उनी अहिले भोट पनि माग्न उत्साहित भइरहेका छैनन् । तर सामाजिक सञ्जालमा आफ्नो चर्चा भइरहेको देख्दा विक्की खुसी छन् ।

उनी भन्‍छन्, 'कमेडी भनेको स्ट्याण्डअप मात्र होइन । मैले स्ट्याण्डअप नगरेर केही नौलो अभ्यास गर्ने कोसिस गरे । त्यसलाई नेपाली दर्शकहरूले माया गरिदिनु भएको छ । त्यसमा मलाई निकै खुसी लागेको छ ।'

जित्ने जोशले कमेडी च्याम्पियन

सिक्किममा विक्की र उनका केही साथीहरू मिलेर 'हँसाइस् कत्ले' नामक शोमार्फत् कमेडी गर्दै आएका थिए । विभिन्न रेस्टुरेन्ट तथा बारमा उनीहरूले प्रस्तुति दिन्थे । उनीहरूको प्रस्तुति हेर्न टिकट काटेर दर्शक झुमिन्थे । हाँस्य व्यंग्यको यात्रा चलिरहेको थियो । यस्तैमा, कमेडी च्याम्पियनको पहिलो सिजनमा भाग लिएका सिक्किमकै अनिल राईले विक्कीलाई दोस्रो सिजनमा सहभागी हुन अनुरोध गरे ।

नयाँ प्लेटफर्म खोजिरहेका विक्कीले पनि उक्त अनुरोधलाई स्वीकारे । एउटा भिडियो खिचेर डिजिटल अडिसनका लागि पठाए । केही समयमा कमेडी च्याम्पियनले विक्कीलाई फिजिकल अडिसनका लागि नेपाल बोलायो । विक्की जोश बोकेर नेपाल भित्रिए ।

फिजिकल अडिसनमा विक्की 'गोल्डेन की' जित्ने पहिलो प्रतिस्पर्धी बने । 'गोल्डेन की' जित्दै उनी सिधैँ उत्कृष्ट २४ मा छनोट भएका थिए । त्यो समय विक्कीले सोचे, 'अब त कमेडी च्याम्पियनको उपाधि नै जितेर फर्किने हो ।'

उत्कृष्ट ४ सम्म आइपुग्दा विक्कीले धेरै राम्रा प्रस्तुतिहरू दिएका छन् । धेरै पटक उनी प्रफर्मर अफ द राउण्ड पनि बनेका छन् । अहिले पनि विक्कीमा उपाधि जित्ने जोश छँदैछ । उनी भन्छन्, 'प्रतिस्पर्धामा भाग लिँदा मैले यसबारे आउन सक्ने नतिजा सोचेर नै आएको हुन्छु । यहाँसम्म त आउनु नै थियो । जुन जोशले प्रतिस्पर्धा सुरु गरेको थिएँ, जित्न पनि त्यो जोश कायम नै छ ।'

अहिले विक्कीसँगै उपाधिको दावेदार मानिएका छन्, भरतमणि पौडेल । यो प्रतिस्पर्धामा रमाइरहेका छन्, विक्की । भन्छन्, 'भरत र मेरो मात्र होइन, सबैमाझ प्रतिस्पर्धा हुन जरुरी छ । प्रतियोगितामा प्रतिस्पर्धा भएन भने मज्जा हुन्न । अहिले भरत र मलाई प्रतिस्पर्धी मानिरहनु भएको छ । यसले खुशी दिन्‍छ ।'

कमेडी चिनाउने ठाउँ बनोस् कमेडी च्याम्पियन

विक्की आफू कमेडी च्‍याम्पियनमा आएपछि धेरै कुरा सिक्न पाएको बताउँछन् । 'च्याम्पियनले तीन वर्षमा पनि सिक्न नसकिने कुरा मलाई झण्डै ८ महिनाको समयमा सिकाइदियो,' विक्की भन्छन् ।

विक्कीले आफ्नै भोगाइबाट पनि धेरै कुरा सिक्न पाए । प्रतिस्पर्धामा छोटो समयमा नै 'कन्टेन्ट' तयार गर्नुपर्ने, हरेक साता नयाँ-नयाँ भूमिका निभाउनु पर्ने । यी भोगाइबाट विक्कीले आफूलाई केही परिपक्क महसुस गरेका छन् ।

कमेडी च्याम्पियनको मञ्च विक्कीका लागि प्रिय छ । किनभने, यही मञ्चबाट उनले धेरै शुभचिन्तक कमाउने मौका पाएका छन् । विक्की कमेडी च्याम्पियनको दायित्व कमेडीका विभिन्न फर्मलाई पनि स्थापित गर्नुपर्ने रहेको बताउँछन् ।

उनी भन्छन्, 'कमेडी रुचाउने दर्शकहरूले नै हो कमेडी च्याम्पियन हेर्ने । त्यसैले अब कमेडी च्याम्पियनले स्ट्याण्ड अपमात्र होइन, अन्य विभिन्न फर्मलाई पनि स्थान दिएर दर्शकमाझ परिचित गराउनुपर्छ ।'

विक्की मञ्चमा आफूले त्यही कुराको अभ्यास गरेको बताउँछन् । 'स्ट्याण्ड अप त मैले गरिरहेकै हुन्थे । केही नयाँ गरौँ भनेर नै मैले प्रप्सको प्रयोग गरेँ, पेन्टोमाइम गरे', उनी भन्छन्, 'अब आउने प्रतियोगीहरूले पनि फरक अभ्यास गर्नैपर्छ ।'

करिअर नेपालमै

कमेडी वा अन्य जुनसुकै विधाका लागि पनि भारतमा धेरै प्लेटफर्म छन् । तर, नेपाली भाषाकै लागि भने भनेजस्तो प्लेटफर्म छैनन् ।

विक्की नेपाली भाषामा करिअर बनाउन चाहनेहरूका लागि काठमाडौं उर्वर भूमि रहेको तर्क गर्छन् । उनी भन्छन्, 'सिक्किममा बसेर नेपाली भाषामा कन्टेन्ट बनायो भने नेपालमा हेरिँदैन । तर, काठमाडौंमा बसेर कन्टेन्ट बनाइयो भने त्यो नेपालसहित सिक्किम र विश्वभर रहेका नेपालीले हेर्नुहुन्छ । त्यसैले करिअर बनाउन काठमाडौं नै ठीक लाग्दैछ ।'

कसैले नेपालमा नै बसेर काम गर्ने प्रस्ताव गरे विक्की नकार्ने पक्षमा छैनन् । किनकि, विक्कीलाई नेपालसँग प्रेम छ । 'काम गर्न पनि सुरुमा लगानीकर्ता चाहियो । यदि राम्रो काम र राम्रो लगानीकर्ता भेटिए म नेपालमै बसेर काम गर्छु', विक्की भन्छन् ।

विक्की हास्य विधामा मात्र छैनन् । उनी फिल्म मेकर पनि हुन् । उनले दुईवटा सर्ट फिल्म निर्देशन गरिसकेका छन् । उनी नेपाली भाषाको फिचर फिल्म बनाउने सोचमा छन् । भन्छन्, 'मलाई आफ्नो कथा भन्न मनपर्छ । चाहे त्यो कमेडीमार्फत होस्, चाहे फिल्ममार्फत । मलाई दुवै विधा उत्तिकै प्रिय लाग्छ ।'

प्रकाशित मिति: आइतबार, भदौ १३, २०७८ १९:१४