९ पटक पेसी चढ्दा पनि सुनुवाइ हुन सकेन आलमको मुद्दा

A+ A A-

नेपाली कांग्रेसका नेता तथा निलम्बित सांसद मोहमद अफताव आलमको मुद्दामा आज पनि सुनुवाइ हुन सकेन ।

राैतहटकाे फरहदवा बमकाण्डमा घाइते भएकालाई जिउँदै इटाभट्टामा लगेर मारेकाे अभियाेगमा आलमलाई जिल्ला र उच्च अदालतले पुर्पक्षका लागि जेल पठाएकाे थियाे । यसविरुद्ध उनी सर्वाेच्च पुगेका हुन् ।

न्यायाधीश दीपककुमार कार्की र हरिप्रसाद फुयाँलको इजलासमा आलमको मुद्दाको पेसी तोकिएको थियो । तर, न्यायाधीश फुयाँलले उनको मुद्दा हेर्न नमिल्ने भएपछि सुनुवाइ हुन नसकेकाे हाे । फुयाँलले यसअघि प्रहरीले जाहेरी लिन नमानेपछि पीडितकाे पक्षबाट मुद्दा लडेकाले उनले याे मामिला हेर्न नमिल्ने भएकाे हाे ।

यसअघि २९ असारमा पनि आलमको मुद्दा हेर्न नमिल्ने भन्दै सुनुवाइ रोकिएको थियो । २९ असारमा प्रकाशमानसिंह राउत र कुमार रेग्मीको इजलासमा आलमको मुद्दाको पेसी तोकिएको थियो । न्यायाधीश रेग्मी न्यायाधीश बन्नुअघि कांग्रेसकाे सदस्यता नै लिएकाले उनले कांग्रेसकै नेता आलमकाे मुद्दा हेर्न नमिल्ने भनिएको थियो ।

आलमको मुद्दामा मंसिर २०७७ देखि हालसम्म ९ पटक पेसी तोक्दा एक पटक पनि सुनुवाइ हुन सकेको छैन । आलमको मुद्दामा अर्को पेसी ८ असोजमा तोकिएको छ । २०६४ को संविधानसभा चुनावताका आलमले इटाभट्टामा मान्छे जलाएको, विष्फोटक पदार्थ संकलन गरेको अभियोगमा रौतहट जिल्ला अदालत र उच्च अदालत वीरगञ्जले उनलाई थुनामा राख्ने आदेश दिएको थियो ।