गण्डकीका ४२ जनप्रतिनिधिले रोजे एकीकृत समाजवादी (नामसहित)

A+ A A-

गण्डकी प्रदेशका ४२ जना जनप्रतिनिधिले एमाले छोडेर माधवकुमार नेपाल नेतृत्वको नेकपा एकीकृत समाजवादी रोजेका छन् । प्रदेशका ११ मध्ये आठ जिल्लाका ४२ जना जनप्रतिनिधि नेकपा एमाले त्यागेर एकीकृत समाजवादी गएका हुन् ।

राजनीतिक दल सम्बन्धी ऐन, २०७३ (दोस्रो संशोधन अध्यादेश २०७८) अनुसार एमाले र जसपाबाट निर्वाचित जनप्रतिनिधिलाई दल रोज्न निर्वाचन आयोगले २१ दिनको समय दिएको थियो ।

केपी ओली बलियो रहेको गण्डकीमा एमाले छोडेर तोकिएको मिति मंगलबारसम्म ४२ जनप्रतिनिधिले माधव नेपाललाई साथ दिएका हुन् । तनहुँका १३, कास्कीका चार, म्याग्दी र गोरखाका तीन÷तीन, स्याङ्जाका सात, बागलुङका ९, पर्वतका दुई र मुस्ताङका एक जना जनप्रतिनिधिले नेकपा एकीकृत समाजवादी रोजेका हुन् । त्यसमा एक जना गाउँपालिका उपाध्यक्ष, १३ जना वडाध्यक्ष र २८ जना सदस्य छन् ।

जसपाबाट छुट्टिएर महन्थ ठाकुरले खोलेको लोकतान्त्रिक समाजवादी पार्टीमा (लोसपा)मा भने गण्डकीका एक जना पनि जनप्रतिनिधि छैनन् । गण्डकीमा जसपाका ३० जना जनप्रतिनिधि रहेकोमा सबै जसपामै छन् ।

- गण्डकीमा एकीकृत समाजवादीः कतै काँध थापेकाले छोडे, कतै नेता पाउनै धौधौ

क–कसले रोजे एकीकृत समाजवादी ?

प्रदेशका ११ मध्ये लमजुङ, नवलपुर र मनाङमा कोही पनि जनप्रतिनिधिले सनाखत नगरेको ती जिल्लाका नेताले बताएका छन् । तनहुँको शुक्लागण्डकी नगरपालिकाका ११, का पाँचै जना जनप्रतिनिधिले एकीकृत समाजवादी रोजेका छन् ।

शुक्लागण्डकी नगरपालिका ३ का वडाध्यक्ष रामकुमार श्रेष्ठ, शुक्लागण्डकी ५ का वडाध्यक्ष दीर्घ थापा, शुक्लागण्डकी ७ का वडाध्यक्ष राम क्षेत्री र शुक्लागण्डकी ११ का वडाध्यक्ष दलबहादुर थापाले एकीकृत समाजवादीामा सनाखत गरेका छन् ।

शुक्लागण्डकी–५ का वडा सदस्य थमबहादुर थापा, वडा नम्बर ९ का वडासदस्य दिलबहादुर थापाले नेकपा (एस) रोजेका छन् । शुक्लागण्डकी ११ का वडाध्यक्षसहित वडासदस्यहरू क्रमशः डोलमाया विक, रिताकुमारी भुजेल थापा, सानुमाया महत र थमन आलेले सनाखत गरेको जिल्ला निर्वाचन कार्यालयले जनाएको छ ।

व्यास नगरपालिका ४ का वडाध्यक्ष विश्व न्यौपाने, वडासदस्य मनबहादुर गुरूङ र आँबुखैरेनी गाउँपालिका ६ का वडासदस्य सञ्जय गुरूङ एकीकृत समाजवादीमा लागेका छन् ।

बागलुङका चार जना वडाध्यक्ष र पाँच जना वडासदस्यले समाजवादीमा सनाखत गरेका हुन् । बागलुङ नगरपालिका २ का वडाध्यक्ष जीवन आचार्य, वडासदस्य सुजन बोसेल, बागलुङ १ का वडासदस्य लालबहादुर केसी, बागलुङ १० की वडा सदस्य सीता थापाले एकीकृत समाजवादीको पक्षमा सनाखत गरेका हुन् ।

त्यस्तै जैमिनी नगरपालिका ४ का वडाध्यक्ष चक्र थापा, नगर कार्यपालिका सदस्य बलबहादुर सार्की, काठेखोला गाउँपालिका ३ का वडाध्यक्ष यमबहादुर श्रीस, ढोरपाटन नगरपालिका ९ का वडाध्यक्ष हरि घर्ती र वडा सदस्य यम विकले एकीकृत समाजवादी रोजेका हुन् ।

स्याङ्जामा एक जना गाउँपालिका उपाध्यक्षसहित सात जनाले एकीकृत समाजवादी रोजेका छन् । आँधिखोला गाउँपालिकाका उपाध्यक्ष शर्मिलादेवी पौडेल क्षेत्री, आँधिखोला २ का वडाध्यक्ष रामचन्द्र पौडेल, सोही वडाकी वडा सदस्य विन्दु विक, आँधिखोलाकै कार्यपालिका सदस्य खड्कबहादुर नेपाली, पुतलीबजार नगरपालिका ४ बाट निर्वाचित जिसस वरिष्ठ सदस्य गुमानसिंह थापा, पुतलीबजार ४ का वडा सदस्य डोलराज गौतम, हरिनास गाउँपालिका ७ का वडासदस्य ऋषिराम गौतमले पनि एकीकृत समाजवादीमा सनाखत गरेका छन् ।

एमालेबाट निर्वाचित कास्कीका चार जना जनप्रतिनिधिले नेकपा (एकीकृत समाजवादी)मा सनाखत गरेका छन् । एमालेले एक जना जनप्रतिनिधिले पनि माधव नेपाललाई साथ नदिएको दाबी गरेकोमा चार जना वडासदस्यले एकीकृत समाजवादी रोजेका हुन् ।

माछापुच्छ्रे गाउँपालिका ७ का वडा सदस्य बाबुराम भण्डारी, माछापुच्छ«ेका कार्यपालिका सदस्य लालबहादुर परियार, मादी गाउँपालिका ११ का वडा सदस्य रणबहादुर लामा, रूपा गाउँपालिका ५ का दामोदर घिमिरेले एकीकृत समाजवादीको पक्षमा सनाखत गरेका छन् । घिमिरेले गत आइतबार र बाँकी तीन जनाले आज सनाखत गरेका हुन् ।

म्याग्दीमा तीन जनाले एकीकृत समाजवादी रोजेका छन् । बेनी नगरपालिकाका कार्यपालिका सदस्य कृष्णकुमार विक, दुर्गा कार्की र धवलागिरी गाउँपालिकाका कार्यपालिका सदस्य देउप्रसाद छन्त्यालले एमाले छोडेका हुन् ।

एकीकृत समाजवादीमा लाग्नेमा गोरखाका दुई वडाध्यक्ष र वडा सदस्य छन् । आरूघाट गाउँपालिका ३ का वडाध्यक्ष श्रीबल बराम, आरूघाट ५ का वडाध्यक्ष नारायणध्वज खड्काले एकीकृत समाजवादीमा सनाखत गरेका हुन् । गोरखा नगरपालिका ८ की वडा सदस्य कल्पना नेपालीले पनि एकीकृत समाजवादी रोजेकी छिन् ।

पर्वत कुश्मा नगरपालिका १४ का वडाध्यक्ष भीमबहादुर गुरूङ र फलेवास नगरपालिका ४ का वडा सदस्य बालचन्द्र नेपालीले एकीकृत समाजवादीमा सनाखत गरेका हुन् । मुस्ताङमा जिल्ला समन्वय समितिकी सदस्य दुर्गादेवी रसाइलीले पनि एकीकृत समाजवादीमा सनाखत गरेकी छन् ।

निर्वाचन आयोगले प्रदेश सभा सदस्यले सम्बन्धित प्रदेश निर्वाचन कार्यालयमा गएर सनाखत गर्न सक्ने व्यवस्था गरेको थियो । गण्डकी प्रदेश सभामा एमालेका २७ सांसद रहेकोमा सबै एमालेमै रहने भएका छन् ।

२७ सांसदमध्ये बागलुङका इन्द्रलाल सापकोटा एमालेमा माधव पक्षका थिए । नेपालले एकीकृत समाजवादी दर्ता गरेपछि सापकोटा एमालेमै रहने निधो गरेका छन् । उनी एमालेमै रहेपछि ६० सदस्यीय गण्डकी प्रदेश सभा (कायम ५९) मा एकीकृत समाजवादीको संख्या शून्य भएको छ ।

प्रकाशित मिति: मंगलबार, भदौ २२, २०७८ २१:२०