फिल्मकर्मीमै उब्जिएको प्रश्न : हल त खुल्यो, देखाउने के ?

A+ A A-

कोरोनाको महामारी सुरु भएसँगै ११ चैत २०७६ देखि नेपाल सरकारले पूर्ण लकडाउन गर्‍यो । लकडाउन हुनुपूर्व नै फिल्म हलको ढोका बन्द भइसकेको थियो । फिल्म हल सबैभन्दा जोखिमको केन्द्र भएको भन्दै लकडाउनपूर्व नै हल बन्द गराइएको थियो ।

करिब १० महिना बन्द भएका फिल्म हल गत माघदेखि खुले । नेपाल सरकारले नै उच्च सतर्कता अपनाएर हल खोल्ने अनुमति दियो । हलवालासँगै फिल्मकर्मीहरूले हल खोल्ने निर्णयलाई उत्साहपूर्ण ढंगले स्वीकारे ।

तर, हल खुले पनि दर्शक आउने माहौल बनेन । यसबीचमा केही पुराना तथा केही नयाँ फिल्म रिलिज भए । तर, दर्शकको उपस्थिति शून्यजस्तै थियो । हल सञ्चालकहरू फिल्मक्षेत्रलाई चलायमान गराउनका लागि घाटा बेहोरेर पनि हल खोलिएको बताउँथे ।

हल सञ्चालनमा आएको तीन महिना नबित्दै पुन: हलहरू बन्द भए । कोरोनाको दोस्रो लहर सुरु भएको भन्दै फिल्म हल बन्द गरिएको थियो । जुर्मुराउन नपाउँदै फिल्मक्षेत्र पुन: बजारियो ।

वैशाख पहिलो सातादेखि बन्द भएका फिल्म हलले सञ्चालनको अनुमति पाएका छन् । बुधबार काठमाडौं, भक्तपुर र ललितपुरका प्रमुख जिल्ला अधिकारीको छलफलबाट फिल्म हललाई खुल्ने अनुमति दिने निर्णय भएको हो । काठमाडौं जिल्लाका प्रमुख जिल्ला अधिकारी कालीप्रसाद पराजुलीले फिल्म हल खोल्ने अनुमति दिइएको बताए ।

बिहीबारदेखि हल त खुल्लान् । तर, फिल्‍म रिलिजका लागि अहिले फिल्मकर्मीहरूमा कुनै तयारी देखिएको छैन । हल खुलेपछि कुन फिल्म रिलिज गर्ने भन्ने प्रश्नको जवाफ नै फिल्मकर्मीसँग छैन । कोही पनि निर्माता यो समयमा जोखिम मोल्न तयार हुने छैनन् ।

यो पनि...

तयार भएर पनि रिलिज हुन नपाएका यी चलचित्र

फिल्म 'म यस्तो गीत गाउँछु– २' रिलिजको एक साता मात्र बाँकी रहँदा लकडाउन सुरु भएको थियो । तर, अब हल खुल्दा तत्काल फिल्म रिलिज गरिहाल्ने पक्षमा छैनन्, निर्देशक तथा निर्माता सुदर्शन थापा ।

फिल्म हल खुले पनि अहिले नै दर्शक हलमा आइहाल्ने अवस्था नभएकाले तत्काल फिल्म रिलिज नगर्ने सुदर्शनले बताए । उनले भने, 'फिल्ममा ठूलो लगानी भएको हुन्छ । लगानी डुब्ने थाहा हुँदाहुँदै फिल्म रिलिज गर्ने आँट कसले गर्ने र ?'

सम्पूर्ण फिल्मकर्मीहरूले अलिअलि जोखिम मोल्ने हो भने मात्र फिल्म रिलिज गर्न सकिने सुदर्शनको भनाइ छ । 'हलवाला, वितरक तथा निर्माताले आफ्नो-आफ्नो ठाउँबाट केही रिस्क लिएर फिल्म रिलिज गरियो भने मात्र फिल्मक्षेत्र चलायमान हुन सक्छ । नत्र गाह्रो पर्छ', सुदर्शनले भने ।

निर्माता किरण केसीले बनाएको फिल्म 'लक्का जवान' पनि रिलिजको अन्तिम तयारीमा थियो । पूर्ण तयार भइसकेको फिल्म रिलिज हुन पाएन ।

अहिले हल खुले पनि किरण आफ्नो फिल्म रिलिज गर्ने पक्षमा छैनन् । अझै पाँच महिना फिल्म रिलिज नगर्ने उनको भनाइ छ । 'यहाँ साथीहरूले सुर्‍याएको भरमा फिल्म रिलिज गरेर हुँदैन । अहिले फिल्म चल्ने अवस्था छैन । त्यसैले अझै केही समय फिल्म रिलिज गर्दिनँ', किरणले भने ।

किरण हल खुल्नुलाई सुखद समाचार मान्छन् । खुल्नेबित्तिकै हलमा दर्शक खचाखच नभए पनि विस्तारै दर्शक बढ्ने उनको विश्वास छ । त्यसका लागि उनी उपाय दिन्छन्, 'पुराना-पुराना नाम चलेका फिल्महरू रिलिज गरेर दर्शकलाई हलसम्म तान्नुपर्छ । अनि विस्तारै माहौल बन्छ र फिल्मक्षेत्र चलायमान भइहाल्छ ।'

यो पनि...

सदाका लागि बन्द भए दुई दर्जन बढी हल, त्राससँगै केही आश बोकेर बसेका छन् निर्माता

निर्देशक दीपेन्द्र के खनाल लामो समयदेखि ठप्प रहेको फिल्म हल खुल्नुलाई उत्साहजनक कुरा भएको बताउँछन् । आफ्नो कर्मक्षेत्र नै बन्द भइरहेको बेला दुःखी भएका फिल्मकर्मीलाई यसले खुसी बनाउने उनको तर्क छ ।

तर, उनै दीपेन्द्र प्रश्न गर्छन्, 'हल त खुल्यो, देखाउने के ?'

अहिलेको समयमा हल खुले पनि हल सञ्चालक भने खासै उत्साहित नरहेको दीपेन्द्र बताउँछन् । उनी भन्छन्, 'हलको सञ्चालन खर्च सुरु हुन्छ । तर, फिल्म रिलिज नहुँदा उनीहरूले घाटा बेहोर्नुपर्ने देखिन्छ ।'

फिल्मक्षेत्रलाई चलायमान गराउनका लागि फिल्मकर्मी र हलवालाहरू बसेर तुरुन्तै निचोड निकाल्नुपर्ने दीपेन्द्रको भनाइ छ । यदि छलफलबाट राम्रो फिल्म रिलिज गर्न सकियो भने दर्शक हलमा आउने उनको विश्वास छ ।

'रेस्टुरेन्टदेखि जात्रासम्मको भिडलाई हेर्ने हो भने मानिसहरूमा डर कम भइसकेको देखिन्छ । हल त झनै सुरक्षित ठाउँ हो', दीपेन्द्र भन्छन्, 'यदि राम्रो फिल्म रिलिज गर्न सकियो भने दर्शक पक्कै आउनुहुन्छ ।'

वितरक करण श्रेष्ठ भने बिनायोजना हल खुल्नु सन्तोषजनक नभएको बताउँछन् । उनी भन्छन्, 'यत्तिका समय फिल्मक्षेत्रले घाटा बेहोरेको छ । त्यसबारे सरकारले के सोचेको छ ? बिनायोजना खोल भन्दैमा खोलेर मात्र हुन्न । हाम्रा लागि सरकारले केही राहतको व्यवस्थाबारे सोच्नुपर्छ ।'

अहिले हल खोलेर पुन: बन्द गर्नुपर्ने अवस्था आयो भने फिल्मक्षेत्रले झनै ठूलो घाटा बेहोर्नुपर्ने उनको भनाइ छ । 'ठूलो लगानीका फिल्महरू हलमा लगाइएला, अनि फेरि सरकारले हल बन्द गर भन्देला । त्यो त हाम्रा लागि घातक हुन्छ नि । भोलिको दिनका बारेमा नसोची केही गर्नै हुन्न,' करणले भने ।

तत्कालका लागि कोही निर्माता तथा वितरक फिल्म रिलिजका लागि तयार नभएको र आपसी छलफलपछि मात्र फिल्म रिलिज गर्ने करणले बताए ।

यो पनि...

निरीह चलचित्र विकास बोर्ड: राहत दिन पैसा छैन, सरकारले सुन्दै सुन्दैन'

हलवालाहरूको छाता संगठन चलचित्र संघका महासचिव अशोक शर्मा हल खुल्ने निर्णय सराहनीय भएको बताउँछन् । अहिले हल खोल्नुको विकल्प नै नरहेको उनको भनाइ छ ।

उनले भने, 'बन्दको बन्द गरेर पनि भएन नि । अहिलेको समयमा त खोल्नुको विकल्प नै थिएन । अब खोल्ने अनुमति पाइएको छ, विस्तारै हलहरू खुल्दै जानेछन् ।'

हल खुलेपछि विस्तारै यसले माहौल बनाउने र दसैँसम्म नयाँ फिल्म रिलिज गर्न सकिने उनको विश्वास छ । उनले भने, 'अहिले केही फाटफुट फिल्म रिलिज गरेर भए पनि दर्शक तान्नुपर्छ, दसैँदेखि नयाँ फिल्म रिलिजको माहौल बन्नेछ ।'