फिल्मकर्मीको आक्रोश: हाम्रा लागि सरकार खोइ ?

A+ A A-

फिल्म निर्देशक, निर्माता तथा वितरक अशोक शर्मा सरकारले फिल्मक्षेत्रलाई पूर्ण रूपमा बेवास्ता गरेको आक्रोश पाख्छन् । नेपाल अन्तर्राष्ट्रिय फिल्म फेस्टिबल ‘निफ’मा बोल्दै उनले आक्रोश पोखेका हुन् ।

कोभिड १९ का कारण फिल्मक्षेत्रले ठूलो घाटा बेहोर्नुपरेको छ । निर्मातादेखि हलवालासम्म मारमा परेका छन् । निर्माताले गरेको करोडौँ लगानी ‘फ्रिज’ भएको छ । हलवालाहरू हलको भाडा, विद्युत्‌को ‘डिमाण्ड चार्ज’ तिर्दातिर्दै ऋणमा डुबिसके । यस्तो अवस्थामा पनि सरकारले फिल्मक्षेत्रका लागि कुनै राहत दिन सकेको छैन । त्यसैले पनि फिल्मकर्मीहरू सरकारप्रति आक्रोशित देखिएका छन् ।

आशोक फिल्मकर्मीका लागि सरकार नै नभएको तर्क गर्छन् । उनी भन्छन्, ‘हाम्रा लागि सरकार नै छैन । हामीले सरकार भएको महसुस गर्न पाएकै छैनौँ ।’

सरकारले फिल्मकर्मीले तिरेको करको कदर गर्न नसकेको अशोकको गुनासो छ । ‘हामी फिल्मकर्मीले वर्षैांदेखि सरकारलाई कर बुझाएका छौँ । विभिन्न शीर्षकमा हामीले सरकारलाई अर्बौं पैसा बुझाइसकेका छौँ । तर, मारमा परेको बेला सरकारले हामीलाई बेवास्ता गरिरहेको छ’, अशोक प्रश्न गर्छन्, ‘खोइ त हाम्रा लागि कहाँ छ सरकार ?’

अशोक बाहिरी देशहरूमा सरकारले विभिन्न राहतका प्याकेज ल्याएको उदाहरण दिँदै नेपाल सरकारले पनि विभिन्न प्याकेज ल्याउनुपर्ने बताउँछन् । उनी भन्छन्, ‘हामीले सबैलाई पैसा दिनुपर्छ भनेका छैनौँ । भन्दैनौँ पनि । तर, लगानी फ्रिज भएका निर्माताहरूलाई उनीहरूको लगानीको ५० प्रतिशत र मारमा परेका हलवालाहरूलाई सरकारले केही राहत दिनुपर्छ ।’

अहिलेको अवस्थामा चलचित्र विकास बोर्डले पनि केही गर्न नसक्ने उनको बुझाइ छ । ‘विदेशी फिल्मबाट आएको पैसाले चलिरहेको विकास बोर्डसँग हामीले के अपेक्षा गर्नु ? विकास बोर्डको पनि अहिले आयस्रोत ठप्प छ’, अशोकले भने, ‘फिल्मकर्मीको राहतका लागि अर्थ मन्त्रालयबाट नै बजेट छुट्याइनुपर्छ ।’

सबै राजनीतिज्ञहरू कुर्सी जोगाउने र आफ्नो खल्ती भर्ने खेलमा अल्झिइरहेकाले उनीहरूले फिल्मक्षेत्रलाई बेवास्ता गरिरहेको उनको बुझाइ छ ।

‘आफ्नो कुर्सी जोगियो र आफ्नो खल्ती भरियो भने भइगो नि । किन अरुलाई हेर्थे र ?’, अशोकले आक्रोश पोखे ।

बहसमा सहभागी अभिनेत्री रेखा थापाले भने फिल्मक्षेत्रलाई सरकारले बेवास्ता गर्नुमा फिल्मकर्मीकै कमजोरी रहेको बताइन् ।

उनले भनिन्, ‘हामी हाम्रो हक अधिकारका लागि एकजुट भएर लड्न सकेका छैनौँ । एक भएर दबाब दिन सकेका छैनौँ । हामी आफैँले पनि हल्का रूपमा लिएका छौँ । त्यसैले सरकारले पनि हामीलाई हल्का सोचेको छ ।’

वर्षैांदेखि कर तिरेको फिल्मक्षेत्रले सरकारबाट सहुलियत माग्न डराउन नहुने रेखाको भनाइ छ । ‘हामीले कर तिरेपछि त सरकारसँग सहुलियत माग्ने अधिकार छ नि । हामी किन डराइरहेका छौँ ?,’ रेखा प्रश्न गर्छिन् ।

फिल्मक्षेत्रका व्यक्तिहरूले व्यक्तिगत स्वार्थका लागि मात्रै आवाज उठाइरहेको दाबी गर्छिन् । यदि समूह बनाएर सरकारलाई दबाब दिए सरकारले पक्कै हेर्ने उनको बुझाइ छ ।

कार्यक्रममा रेखाले फिल्मकर्मीहरूले सरकारसँग बौद्धिक बहस गर्न नसकेकाले पनि हेपाइमा परेको हुन सक्ने बताइन् । उनले भनिन्, ‘सरकारले हामीलाई मनोरञ्जनको क्षेत्रका रूपमा मात्रै लिएको छ । सायद हामीले उनीहरूसँग बौद्धिक बहस गर्न नसकेर पो हो कि !’

कलाकार देशको कला-साहित्य जोगाउने दूत भएको भन्दै रेखाले सरकारले कलाकारलाई सहयोग गर्नुपर्ने बताइन् । ‘जबसम्म सरकारले हामीलाई साथ दिँदैन, हामीले बाहिरी देशमा बजार विस्तारबारे नसोचे हुन्छ । हामी देशमा मात्र सीमित हुन्छौँ,’ रेखाले भनिन् ।

प्रकाशित मिति: आइतबार, वैशाख २६, २०७८ १५:३९