छात्राहरुलाई आकर्षित गर्न साइकल वितरण

A+ A A-

छात्राहरुलाई विद्यालयप्रति आकर्षित गराउन सप्तरीको तिलाठी कोइलाडी गाउँपालिका–१ स्थित पब्लिक माध्यमिक विद्यालय लौनियाँ तिलाठीमा साइकल वितरण गरिएको छ ।

प्रदेश २ सरकारले छोरीहरुलाई शिक्षामा पहुँच पुर्याउने ‘बेटी पढाऊ, बेटी बचाऊ’ अभियान नै सञ्चालन गरेको छ । सोही अवधारणालाई आत्मसात् गर्दै प्रदेशभर यस्ता लोकप्रिय कार्यक्रम ल्याएको छ ।

प्रदेश २ का भूमि व्यवस्था, कृषि तथा सहकारीमन्त्री शैलेन्द्रप्रसाद साहले साइकल वितरण गर्दै देशमै प्रदेश २ को शिक्षाको स्तर खस्किँदो अवस्थामा रहेकोले सुधारका लागि विभिन्न कार्यक्रम ल्याएको बताए ।

प्रदेश सरकारले हालै प्रस्तुत गरेको नीति तथा कार्यक्रममा समेत शिक्षा र स्वास्थ्यलाई प्राथमिकतामा राखेको बताउँदै मन्त्री साहले भने, ‘देशको शिक्षाको स्तर खस्किँदो अवस्थामा रहेकोले सुधारका लागि विभिन्न कार्यक्रम प्रदेश सरकारले ल्याएको छ ।’

प्रदेश २ मा महिलाको शैक्षिक अवस्थासमेत चिन्ताजनक रहेको भन्दै सरकारले ‘बेटी बचाऊ, बेटी पढाऊ’ योजना ल्याएर छात्रालाई प्रोत्साहन गर्न अगाडि बढेको उनले बताए ।

प्रदेश सरकारले ल्याएको योजनाबाहेक आफूले निर्वाचन क्षेत्र विकास कोषबाट छात्रालाई साइकल वितरण गरेको मन्त्री साहले जानकारी दिए ।

कक्षा ८ उत्तीर्ण गरी ९ मा अध्ययनरत विद्यार्थीलाई शिक्षाप्रति आकर्षित गर्न माध्यमिक विद्यालय लौनियाँ तिलाठीका छात्रालाई साइकल उपलब्ध गराएको उनले बताए ।

मन्त्री साहले भने, ‘अब हाम्रो गाउँ समाजका कुनै पनि छोरीहरु विद्यालय जानबाट वञ्चित नहाेऊन्, यसका लागि जनप्रतिनिधि मात्र नभई अभिभावक एवं समाजका अगुवा सजग हुनु आवश्यक छ ।’

प्रकाशित मिति: बुधबार, जेठ २२, २०७६ १८:१७