सप्तकाेसी नगरपालिकाका मेयरसहित चार जनाविरूद्ध पक्राउ पुर्जी

सांकेतिक तस्बिर

A+ A A-

सप्तरीको सप्तकाेसी नगरपालिकाका प्रमुख उत्तम गौतम शर्मासहित चारजनाविरुद्ध सरकारी स्वीकृतिबिनै वन जंगल मासिने गरी नाला निर्माण कार्य गरेको आरोपमा पक्राउ पुर्जी जारी गरिएको छ ।

वन क्षेत्रमा अनाधिकृत रुपमा नाला निर्माण गरेको भन्दै जिल्ला वन कार्यालय सप्तरीले सप्तकाेसी नगरपालिकाका प्रमुख शर्मासहित चारजनाविरुद्ध सप्तरी जिल्ला अदालतमा दायर गरेको रिट उपरको सुनुवाइमा शुक्रबार अदालतले अनुमति दिएपछि पक्राउ पुर्जी जारी गरिएको वन कार्यालयका प्रमुख धीरेन्द्र सिंहले जानकारी दिएका छन् ।

शनिबार बिदा परेकोले आइतबार अदालतको आदेश कार्यान्वयन गर्दै पक्राउ पुर्जी जारी गरिएको उनले बताए ।

राष्ट्रिय वन क्षेत्रभित्र अनाधिकृत रुपमा जेसीभी प्रयोग गरेर ९५ मिटर लम्बाइ र करिब २ मिटर चौडाइको नाला निर्माण गरेपछि उनीहरुविरुद्ध प्रमाणसहित अदालत पुगेपछि पक्राउ पुर्जी जारी गर्न अनुमति पाएको उनले बताए । नाला निर्माण सुरु गरेपछि पटक–पटक लिखित र मौखिक आग्रह गर्दा पनि नगरपालिकाले बेवास्ता गरेपछि अदालतको शरणमा जानुपरेको उनको भनाइ छ ।

वन संरक्षणको जिम्मेवारी पाएको वन कार्यालयले कर्मचारी परिचालन गर्दा समेत अटेर गरेकाले कानूनी उपचारका लागि अदालत पुगेको र अदालतकै आदेशमा उनीहरुविरूद्ध पक्राउ पूर्जी जारी गरिएको उनले स्पष्ट पारेका छन् । यसरी पक्राउ पुर्जी जारी गरिएकामध्ये नगर प्रमुख शर्माका साथै वडा नं. १ का अध्यक्ष नारायण आचार्य तथा निर्माण कार्यमा संलग्न सप्तकाेसी नगरपालिका १ बस्ने तुलाराम लुइँटेल र दुर्गा फुयाँल छन् ।

उनीहरुलाई पक्राउ गर्न आज वन कार्यालयका सुरक्षाकर्मीहरु पुर्जीसहित परिचालन गरिएको उनले जानकारी दिए । यसरी वन कार्यालयबाट पक्राउ पूर्जीसहित खटाइएका सुरक्षाकर्मीलाई नटेरे जिल्ला प्रहरी कार्यालयदेखी पुनः अदालतसम्म पुग्ने उनले बताएका छन् ।

यता, प्रमुख शर्माले वन कार्यालयले पक्राउ पुर्जी जारी गरेको स्विकार्दै आफूले नागरिकलाई सेवा सुविधा र सुरक्षा प्रदान गर्ने उद्देश्यले नाला निर्माण गरेकाे बताए । कानूनी प्रक्रियाबाटै समस्याको समाधान खोजिने उनले बताए ।

प्रकाशित मिति: सोमबार, जेठ २०, २०७६ ०५:३२