एसईईमा न्यूनतम कति ग्रेड ल्याएका विद्यार्थीले कुन विषय पढ्न पाउँछन् ?

A+ A A-

‘मेरो एसईईमा यति ग्रेड आएको छ, मैले के-के विषय पढ्न पाउँछु ?,' एसईईको नतिजा सार्वजनिक भएसँगै सामाजिक सञ्जालमा यस्ता पोस्टहरू देखिने गर्दछन् । धेरै विद्यार्थीहरू एसईईपछि के पढ्ने भनेर अन्योलमा देखिन्छन् ।

राष्ट्रिय परीक्षा बोर्डले पनि विषयअनुसार न्यूनतम ग्रेड तोकिदिएको हुन्छ । निश्चित विषयमा न्यूनतम ग्रेड ल्याए मात्र कक्षा ११ मा भर्ना हुन पाइन्छ । जसले विद्यार्थीलाई अन्योलमा पारिरहेको बुझ्न सकिन्छ ।

परीक्षा बोर्डका अनुसार कक्षा ११ मा अध्ययन गर्न एसईईमा कम्तीमा १.६ जीपीए ल्याउनैपर्छ । तर, १.६ जीपीए ल्याउँदैमा पनि चाहेको विषय अध्ययन गर्न भने पाइँदैन । त्यसका लागि विषयअनुसार आवश्यक न्यूनतम ग्रेड ल्याएको हुनुपर्छ ।

जस्तो, विद्यार्थीले २ जीपीएभन्दा बढी ल्याए मात्र विज्ञान अध्ययन गर्न पाउनेछ । न्यूनतम २ जीपीएसहित एसईई परीक्षामा कम्तीमा विज्ञान र गणित विषयमा सी प्लस, अंग्रेजीमा सी, सामाजिक शिक्षा तथा नेपालीमा कम्तीमा 'डी प्लस' ग्रेड प्राप्त विद्यार्थीले मात्र कक्षा ११ मा विज्ञान समूहका भौतिक, रसायन, जीव, गणित वा कम्प्युटर विज्ञान पढ्न पाउनेछन् ।

त्यस्तै, व्यवस्थापन संकायमा अध्ययन गर्न चाहने विद्यार्थीले १.६ जीपीए अनिवार्य प्राप्त गरेको हुनुपर्ने छ । र, विषयगतका आधारमा गणितमा ‘सी’, अंग्रेजी, नेपाली, सामाजिक र विज्ञानमा ‘डी–प्लस’ अनिवार्य प्राप्त गरेको हुनुपर्नेछ ।

विज्ञान, गणित तथा अंग्रेजीमा सी ग्रेड एवं सामाजिक शिक्षा तथा नेपालीमा डी प्लस गरी थोरैमा १.६ जीपीए आए मात्र प्राविधिकतर्फ जीवविज्ञान, वनस्पति विज्ञान तथा इलेक्ट्रोनिक, सिभिल वा कम्प्युटर इन्जिनियरिङ पढ्न पाइन्छ ।

गणितमा सी, अंग्रेजी, नेपाली, सामाजिक शिक्षा र विज्ञानमा डी प्लससहित १.६ जीपीएभन्दा बढी ल्याएका विद्यार्थीले गणित, लेखा, कम्प्युटर साइन्स, टिचिङ म्याथम्याटिक्स, इलिमेन्ट अफ साइन्स, ज्योतिष, बिजनेस म्याथम्याटिक्स, कोअपरेटिभ म्यानेजमेन्ट, बिजनेस स्टडिज, जियोग्राफी एवं साइकोलोजी अध्ययन गर्न पाउनेछन् ।

शिक्षातर्फका विषय पढ्न विज्ञान र गणितमा कम्तीमा सी तथा अंग्रेजी, नेपाली एवं सामाजिक शिक्षामा डी प्लस प्राप्त गर्नुपर्नेछ । त्यस्तै अंग्रेजीमा सी, नेपाली तथा सामाजिक शिक्षामा डी प्लस ल्याउने विद्यार्थीले अंग्रेजी, अल्टरनेटिभ अंग्रेजी, टिचिङ अंगेजी एवं भाषा विज्ञान पढ्न पाउनेछन् ।

मास कम्युनिकेसन, होटल म्यानेजमेन्ट तथा ट्राभल्स एन्ड टुरिज्म पढ्न अंग्रेजीमा सी तथा नेपाली, गणित र सामाजिक शिक्षामा डी प्लस ग्रेड आवश्यक पर्छ । नेपालीमा सी, अंग्रेजी तथा सामाजिक शिक्षामा डी प्लस प्राप्त भए नेपाली र टिचिङ नेपाली विषय अध्ययनका लागि बाटो खुल्छ ।

त्यस्तै, पोलिटिकल साइन्स, इतिहास, संस्कृति, गृह विज्ञान, समाजशास्त्र, दर्शनशास्त्र, लाइब्रेरी तथा इन्फर्मेसन साइन्सजस्ता विषय अध्ययनका लागि विद्यार्थीले सामाजिक शिक्षामा सी र नेपाली तथा अंग्रेजीमा डी प्लस ल्याउनुपर्छ ।

अंग्रेजीमा डी प्लस ल्याए मैथिली, हिन्दी, नेपाली, फ्रेन्च, जापानी, उर्दु, जर्मन, चिनियाँका साथै अन्य भाषा अध्ययन गर्न पाइन्छ भने डान्स, म्युजिक, मूर्तिकला, एप्लाइड आर्ट्स, स्पोर्ट्सजस्ता विषय अध्ययन गर्न पनि विद्यार्थीलाई बाटो खुल्छ ।

एसईई मूल्याङ्कन : ‘विद्यालय र शिक्षकको मनमोजी, एसईई नै खारेज गरौँ’

प्रकाशित मिति: बुधबार, साउन २७, २०७८ १२:३८