अस्पतालका दृश्यले देखाउँछ तेस्रो लहर, कस्तो छ सरकारको तयारी ?

A+ A A-

प्रधानमन्त्री शेरबहादुर देउवाले कोरोना महामारीको तेस्रो लहरको संकेत गरे । शनिबार नेपाल मास्क अभियानको शुभारम्भ गर्दै उनले भनेका थिए, ‘कोरोना महामारीको तेस्रो लहर नेपालमा पनि छिट्टै सुरु हुने लक्षण देखिन थालेका छन् । आवश्यक परेको बेला मात्र बाहिर निस्कन र निस्कनुअघि नाक, मुख राम्रोसँग छोप्ने गरी मास्क लगाउनू् ।’

के नेपालमा तेस्रो लहर सुरु भएको हो ?

स्वास्थ्य तथा जनसंख्या मन्त्रालयले पनि नेपालमा तेस्रो लहर सुरु भएको निचोड निकालेको छ । ‘हामी तेस्रो लहरको अवस्थामा छौँ,' मन्त्रालयका सहप्रवक्ता डा. समीरकुमार अधिकारीले भने, 'बाहिर कोरोना छजस्तो देखिँदैन तर अस्पतालहरूको अवस्था हेर्दा तेस्रो लहर प्रस्टै देखिन्छ ।’

मन्त्रालयले तेस्रो लहर असोजमा पिकमा पुग्ने प्रक्षेपण गरेको छ । ‘तेस्रो लहरको पिक १५ असोजमा पुग्छ भन्ने हो, अहिले नै काठमाडौंका अस्पतालहरू भरिएका छन्,’ सहप्रवक्ता अधिकारीले भने ।

यद्यपि भेरियन्टको स्वरुप र प्रकृति, खोपको उपलब्धता र प्रयोग, सामाजिक गतिविधि तथा जनस्वास्थ्यको आधारभूत मापदण्ड पालनाको स्तरले यसलाई अगाडिपछाडि धकेल्न सकिने मन्त्रालयको निष्कर्ष छ ।

आइतबारको कोभिडको देशभरको तथ्यांक । स्वास्थ्य तथा जनसंख्या मन्त्रालय

अस्पतालमा आईसीयू र भेन्टिलेटर भरिभराउ

त्रिवि शिक्षण अस्पतालका कोभिड फोकल पर्सन डा. सन्तकुमार दास आईसीयू भरिएको बताउँछन् । ‘वार्ड खाली छ । आईसीयू भरिएको छ । १ सय २६ जनाको उपचार गरिहेका छौँ,’ उनले भने, ‘सिकिस्त बिरामी धेरै छन् ।’

सशस्त्र प्रहरी अस्पतालमा पनि कोभिडका बेड भरिएका छन् । ‘२ सय बेड भरिएको छ । आईसीयू र भेन्टिलेटर पनि खाली छैन,’ अस्पतालका प्रवक्ता डा. प्रविन नेपालले भने, ‘केही दिनयता फेरि बिरामीको संख्या बढेको छ ।’

शुक्रराज ट्रपिकल तथा सरुवा रोग अस्पताल टेकुमा पनि आईसीयू र भेन्टिलेटर बिरामीले भरिएका छन् । ‘२४ बेडको आईसीयू र भेन्टिलेटर भरिएको छ । वार्डमा केही बेड खाली छन्,’ अस्पतालका प्रवक्ता नवराज गौतमले भने, ‘बिरामी आउनेजाने क्रम भइरहेको छ ।’

अस्पतालहरूको विवरण । स्वास्थ्य तथा जनसंख्या मन्त्रालय

मानिस परीक्षण नै गर्न आएनन्

पीसीआर नि:शुल्क हुँदा पनि मानिस परीक्षण गर्न नआएको मन्त्रालयको गुनासो छ । ‘बीमाबाट आउने पैसाको लोभले पहिले परीक्षण गर्न आउँथे । अहिले नाकमा घोच्नुपर्छ । १०–१२ दिन छुट्टै बस्नुपर्छ । केही गर्न पाइँदैन भनेर परीक्षण गर्नै आउँदैनन्,’ सहप्रवक्ता अधिकारीले भने, ‘परीक्षण नगर्दा एकबाट अर्कोलाई धेरै सरेको छ । एन्टिजेन र पीसीआर फ्रि छ, परीक्षण गर्न मानिस आउनु पर्‍यो ।’

अबको ५ महिनामा २ लाख संक्रमित थप

मन्त्रालयले अबको पाँच महिनामा २ लाखको हाराहारीमा संक्रमित थपिने प्रक्षेपण गरेको छ । ‘आगामी मंसिरसम्म १ लाख ९३ हजार ८ सय ५६ नयाँ संक्रमितहरू थपिने सम्भावना छ,’ मन्त्रालयका नीति योजना तथा अनुगमन महाशाखा प्रमुख डा. गुणराज लोहनीले भने, ‘जसमा ३८ हजार ७ सय ७१ जना संक्रमितहरूलाई अस्पताल भर्ना गरी उपचार गर्नुपर्ने र सोमध्ये ९ हजार ७ सय ९३ जनालाई सघन उपचार गर्नुपर्ने हुन्छ ।’

संक्रमितको विवरण । स्वास्थ्य तथा जनसंख्या मन्त्रालय

सरकारको तयारी के छ ?

मन्त्रालयले पाँच महिनाको प्रक्षेपण गरेर सोहीअनुसार तयारी गरिरहेको जनाएको छ । बेड, आईसीयू र भेन्टिलेटर थप गर्ने प्रक्रियामा रहेको मन्त्रालयले जनाएको छ । २ हजार ६ सय आईसीयू बेड रहेकोमा हाल ४ सय थप गरेर ३ हजार पुर्‍याइएको मन्त्रालयले जनाएको छ । त्यसमा ६ सय ३० वटा आईसीयू बेड थप गर्ने प्रक्रियामा मन्त्रालय छ । हाल भेन्टिलेटरको संख्या ९ सय छ । १ सय ८० वटा थप गर्ने प्रक्रियामा मन्त्रालय छ । एचडीयू बेडको संख्या सरकारीमा २ हजार ७५ र निजीमा ७ सय ७८ थप गरेर सञ्चालनमा ल्याइएको छ ।

बालबालिकाका लागि तयारी

तेस्रो लहरमा बालबालिकाालई बढी असर गर्ने मन्त्रालयको प्रक्षेपण छ । सोहीअनुसार बालबालिकाका लागि पनि आईसीयू र भेन्टिलेटर थप्ने प्रक्रियामा रहेको मन्त्रालयले जनाएको छ । ‘बच्चाहरूका लागि १ सय ८० भेन्टिलेटरसहितको २ सय ७५ आईसीयू बेड थप्ने कार्य अगाडि बढेको छ,’ डा. लोहनीले भने ।

अक्सिजनको तयारी के छ ?

दोस्रो लहरमा अक्सिजनको हाहाकार भयो । जसका कारण धेरै संक्रमितले ज्यान गुमाए । अहिले अक्सिजनको हाहाकार हुन नदिन अक्सिजन प्लान्ट जडानको काम भइरहेको मन्त्रालयले जनाएको छ । मन्त्रालयका अनुसार, ६ हजार अक्सिजन सिलिण्डर थप गरिएको छ । ‘५ हजार ५ सय अक्सिजन कन्सन्ट्रेटरको व्यवस्था भइसकेको र ३ हजार ५ सय थप आउने क्रममा छ,’ डा. लोहनीले भने, ‘२७ वटा लिक्विड अक्सिजन ट्यांक थप गर्ने योजनाअन्तगर्त दुईवटाको कार्य सम्पन्न भएको छ । चारवटाको प्रक्रिया सुरु भएको र १० वटाको सूचना प्रकाशित गरिएको छ ।’

अक्सिजनको आपूर्ति बढाइएको उनले बताए । विगतमा प्रतिहप्ता १५ मेट्रिकटन अक्सिजन आपूर्ति हुने गरेकोमा हाल १ सय २० मेट्रिकटन आपूर्ति भइरहेको उनले जनाएका छन् । मन्त्रालयका अनुसार, ७७ जिल्लामै अक्सिजन प्लान्ट थप गर्न लागिएको छ । ‘१९ वटा ठूला अस्पतालमा अक्सिजन प्लान्ट थप गर्न स्रोतको सुनिश्चितता भएको छ । भदौ महिनाभित्र सम्पन्न गर्ने योजना छ,’ उनले भने ।

याे पनि‍‍‍....

फेरि बढ्यो संक्रमण, दोस्रो लहरकै विस्तार कि तेस्रो लहरको संकेत ?

‘कोरोना सकियो भन्ने गल्तीले निम्त्याएको दोस्रो लहर, चौथो, पाँचौँ लहर पनि आउन सक्छ’

डाक्टरहरूको चेतावनी : कोरोनाको डरलाग्दो घण्टी फेरि बजिसक्यो, दुई-तीन हप्तामा जटिल स्थिति आउँछ

नेपालमा कोभिडले लियो १० हजारको ज्यान

स्वास्थ्य मन्त्रालयको प्रक्षेपण- मंसिरसम्म १ लाख ९३ हजारभन्दा बढी कोरोना संक्रमित थपिन्छन्

स्वास्थ्य मन्त्रालयको प्रक्षेपण : असोज १५ देखि कोरोनाको तेस्रो लहर

'महामारीको तेस्रो लहर छिट्टै सुरु हुने लक्षण देखिए, अत्यावश्यक नपरी बाहिर नजानू'

प्रकाशित मिति: आइतबार, साउन २४, २०७८ १९:२३