तलब कति छ ? यसरी निकाल्नुहोस् तिर्नुपर्ने कर

A+ A A-

सरकारले आगामी आर्थिक वर्षको बजेटमार्फत आयकरको सीमा परिवर्तन गरेको छ । नयाँ व्यवस्थाअनुसार वार्षिक ४ लाख रुपैयाँसम्म आम्दानी हुने अविवाहित व्यक्तिले १ प्रतिशत आय कर तिर्दा हुन्छ ।

यस्तै, विवाहित व्यक्तिले वार्षिक ४ लाख ५० हजार रुपैयाँसम्मको आम्दानीमा १ प्रतिशत कर तिर्दा हुन्छ । अर्थात् अविवाहित व्यक्तिले एक वर्षमा ४ लाख रुपैयाँसम्म आम्दानी गर्दा ४ हजार रुपैयाँ आय कर तिरे हुन्छ । विवाहित व्यक्तिले भने वार्षिक ४ लाख ५० हजार रुपैयाँसम्म आम्दानी गर्दा ४ हजार ५ सय कर तिरे हुन्छ ।

विवाहित व्यक्ति

सरकारले आय कर गणना प्रयोगका लागि विवाहित व्यक्तिको हकमा ४ लाख ५० हजार, ५ लाख ५० हजार, ७ लाख ५० हजार, २० लाख र २० लाखभन्दा बढी गरी ५ वटा सीमा निर्धारण गरेको छ ।

३४ हजार तलबमा ४५ सय कर

यो सीमाअनुसार वार्षिक ४ लाख ५० हजार रुपैयाँसम्म आम्दानी गर्ने व्यक्तिले ४ हजार ५ सय रुपैयाँ आय कर तिर्दा हुन्छ । यो भनेको मासिक ३४ हजार ६ सय १५ रुपैयाँसम्म हो । सरकारले आय कर गणना प्रयोजनका लागि १ वर्ष भनेर १३ महिनालाई मान्ने गरेको छ ।

४२ हजार तलबमा १४ हजार ५ सय कर

यस्तै, वार्षिक ५ लाख ५० हजार रुपैयाँसम्म आम्दानी हुने व्यक्तिको हकमा आयरको अर्काे सीमा छ । यो सीमाअनुसार ४ लाख ५० हजार रुपैयाँसम्मको वार्षिक ४ हजार ५ सय रुपैयाँ र सोभन्दा बढी भएको १ लाख रुपैयाँको १० प्रतिशत थप गरेर वार्षिक १४ हजार ५ सय रुपैयाँ कर तिर्नुपर्छ । मासिक तलब ४२ हजार ३ सय ७० रुपैयाँ हुनेले वार्षिक १४ हजार ५ सय रुपैयाँ कर तिर्नुपर्ने हो ।

५७ हजार तलबमा ५४ हजार ५ सय कर

आयकर प्रयोजनका लागि ७ लाख ५० हजार रुपैयाँको अर्काे सीमा छ । वार्षिक ७ लाख ५० हजार रुपैयाँसम्म आम्दानी गर्नेले २० प्रतिशतसम्म कर तिर्नुपर्छ । यो सीमाअनुसार वार्षिक ५ लाख ५० हजार रुपैयाँसम्मको १४ हजार ५ सय रुपैयाँ र सोभन्दा बढी देखिएको २ लाख रुपैयाँको २० प्रतिशत अर्थात् ४० हजार थप गरी वार्षिक ५४ हजार ५ सय रुपैयाँ आय कर तिर्नुपर्छ ।

वार्षिक ५४ हजार ५ सय रुपैयाँ आय कर तिर्ने भनेको मासिक ५७ हजार ६ सय ९२ रुपैयाँ तलब हुनेले हो ।

डेढ लाख तलबमा ४ लाख २९ हजार कर

वार्षिक २० लाख रुपैयाँसम्म आम्दानी हुनेहरुका लागि आय करको अर्काे सीमा छ । वर्षमा २० लाख रुपैयाँसम्म आम्दानी गर्नेले ३० प्रतिशतसम्म आयकर तिर्नुपर्छ । वार्षिक २० लाख रुपैयाँ आम्दानी हुनेले ७ लाख ५० हजार रुपैयाँसम्मको ५४ हजार ५ सय र बाँकी १२ लाख ५० हजारको ३० प्रतिशतले हुन आउने ३ लाख ७५ हजार थप गरी ४ लाख २९ हजार ५ सय रुपैयाँ आय कर तिर्नुपर्छ । वार्षिक २० लाख रुपैयाँ आम्दानी भनेको मासिक १ लाख ५३ हजार ८ सय ४६ रुपैयाँ हो ।

वार्षिक २० लाख रुपैयाँभन्दा बढी आम्दानी हुने व्यक्तिले २० लाख रुपैयाँसम्मको ३० प्रतिशतसम्म कर गरी वार्षिक ४ लाख २९ हजार ५ सय र २० लाखभन्दा बढी जति हुन्छ, त्यसको थप २० प्रतिशत कर तिर्नुपर्छ ।

अविवाहित व्यक्ति

अविवाहित व्यक्तिको हकमा वार्षिक ४ लाख, ५ लाख, ७ लाख, २० लाख र २० लाखभन्दा बढी गरी पाँच प्रकारकै सीमा निर्धारण गरिएको छ ।
वार्षिक ४ लाख रुपैयाँसम्म १ प्रतिशत, ५ लाख रुपैयाँसम्म १० प्रतिशतसम्म, ७ लाख रुपैयाँसम्म २० प्रतिशतसम्म, २० लाख रुपैयाँसम्म ३० प्रतिशतसम्म र २० लाख रुपैयाँभन्दा बढी भएमा २० लाखसम्मको ३० प्रतिशतसम्म र सोभन्दा बढीकोमा थप २० प्रतिशत आय कर तिर्नुपर्छ ।

४ लाख कमाइमा ४ हजार कर

वार्षिक ४ लाख रुपैयाँ आम्दानी भनेको मासिक ३० हजार ७ सय ६९ रुपैयाँ हो । मासिक यति रकम तलब हुनेले वार्षिक ४ हजार रुपैयाँ आयकर तिर्नुपर्छ ।

५ लाख कमाउँदा १४ हजार कर

वार्षिक ५ लाख रुपैयाँ आम्दानी भनेको मासिक ३८ हजार ४ सय ६१ रुपैयाँ हो । मासिक तलब ३८ हजार ४ सय ६१ रुपैयाँ हुने व्यक्तिले ४ लाखसम्मको १ प्रतिशतले ४ हजार र थप १ लाखको १० प्रतिशतले हुन आउने १० हजार रुपैयाँ गरी १४ हजार रुपैयाँ आय कर तिर्नुपर्छ ।

७ लाख कमाउनेलाई ५४ हजार कर

वार्षिक ७ लाख रुपैयाँ आम्दानी भनेको मासिक ५३ हजार ८ सय ५६ रुपैयाँ हो । मासिक यति तलब हुने व्यक्तिले वार्षिक ५ लाख रुपैयाँसम्मको १४ हजार रुपैयाँ र थप २ लाखको २० प्रतिशतले हुन आउने ४० हजार रुपैयाँ थप गरी वार्षिक ५४ हजार रुपैयाँ आयकर तिर्नुपर्छ ।

२० लाख आम्दानीमा ४ लाख २९ हजार कर

वार्षिक २० लाख रुपैयाँसम्म आम्दानी भनेको मासिक १ लाख ५३ हजार ८ सय ४६ रुपैयाँ हो । मासिक यति तलब हुनेले ७ लाख रुपैयाँसम्मको ५४ हजार र सोभन्दा बढी भएको १२ लाख ५० हजारको ३० प्रतिशतले हु्न आउने रकम ३ लाख ७५ हजार रुपैयाँ थप गरी वार्षिक ४ लाख २९ हजार रुपैयाँ आय कर तिर्नुपर्छ ।

यसरी गर्नुहोस् हिसाब

यसको विधि सजिलो छ । पहिला विवाहित व्यक्तिको हकमा कुरा गरौं । वार्षिक ४ लाख ५० हजार रुपैयाँसम्म आम्दानी छ भने जति आम्दानी छ, त्यसको १ प्रतिशत जति हुन्छ, त्यति कर तिर्नुपर्ने हुन्छ ।

वार्षिक ४ लाख ५० हजार रुपैयाँभन्दा बढी र ५ लाख ५० हजार रुपैयाँसम्म आम्दानी भए ४ लाख ५० हजार रुपैयाँसम्मको ४ हजार ५ सय र सोभन्दा बढी जति धेरै हुन्छ, सो रकमको १० प्रतिशत निकालेर जोड्नुहोस् ।

वार्षिक ५ लाख ५० हजार रुपैयाँभन्दा बढी र ७ लाख ५० हजार रुपैयाँसम्म आम्दानी छ भने ५ लाख ५० हजार रुपैयाँसम्मको १४ हजार ५ सय र सोभन्दा बढी जति आम्दानी हुन्छ, सो रकमको २० प्रतिशत रकम थप गरेर हिसाब निकाल्न सकिन्छ ।

वार्षिक ७ लाख ५० हजार रुपैयाँभन्दा बढी र २० लाख रुपैयाँसम्म आम्दानी भए ७ लाख ५० हजार रुपैयाँसम्मको ५४ हजार ५ सय र सोभन्दा बढी जति हुन्छ, त्यसको ३० प्रतिशत निकालेर जोड्नुहोस् ।

वार्षिक २० लाख रुपैयाँभन्दा बढी आम्दानी छ भने २० लाख रुपैयाँसम्मको ४ लाख २९ हजार ५ सय रुपैयाँ र सोभन्दा बढी जति छ, त्यसको थप २० प्रतिशतले हुन आउने रकम जोड्नुपर्छ ।