दुई सचिवको विवादले मन्त्रालयको काम ठप्प

A+ A A-

प्रदेश २ को भौतिक पूर्वाधार विकास मन्त्रालयमा दुई सचिवको विवादका कारण कामकाज प्रभावित भएको छ । भौतिक पूर्वाधारमन्त्री जितेन्द्र सोनलले हस्तक्षेप गरेपछि पदस्थापनलाई लिएर दुई सचिवबीच विवाद बढेको हो । सचिव नियाज वारिस र पृष्करनाथ घिमिरेबीचको विवाद बढ्दै गएपछि मन्त्रालयको कामकाज नै ठप्प भएको हो ।

आफूमाथि अन्याय भएको भन्दै सचिव वारिसले सर्वोच्च अदालतमा मुद्दा दायर समेत हालेका छन् । सचिव वारिसले आफ्नो सरुवा कानुनअनुसार नभएको र त्यसलाई कार्यान्वयन नगर्न प्रधानमन्त्री तथा मन्त्रिपरिषद्को सचिवालय, संघीय मामिला तथा सामान्य प्रशासन मन्त्रालय, संघीय मामिला तथा प्रशासनमन्त्री, ऊर्जा जलस्रोत तथा सिँचाइ मन्त्रालय, मुख्यमन्त्री तथा मन्त्रिपरिषद्को कार्यालय प्रदेश २, भौतिक पूर्वाधार तथा विकास मन्त्रालय प्रदेश २ र सचिव पुष्करनाथ घिमिरेलाई विपक्षी बनाई मुद्दा दायर गरेका छन् ।

२८ फागुनमा मन्त्रिपरिषद्ले ऊर्जा जलस्रोत तथा सिँचाइ मन्त्रालयका सहसचिव नियाज वारिसलाई प्रदेश २ को भौतिक पूर्वाधार मन्त्रालयको सचिवमा सरुवा गरेको थियो । १२ चैतमा सामान्य प्रशासन मन्त्रालयले सचिव वारिसलाई प्रदेश २ को भौतिक पूर्वाधार मन्त्रालयमा सरुवा भएको भन्दै पत्र पठाएको थियो । २० चैतमा सचिव वारिसले सम्बन्धित मन्त्रालयबाट रमाना पत्र लिई २३ चैतमा प्रदेशको भौतिक पूर्वाधार मन्त्रालयमा हाजिर भएका थिए ।

वारिस आएपछि पाँच महिनाभन्दा लामो समयदेखि मन्त्रालयमा काजमा रहेका सचिव पुष्करनाथ घिमिरेले विभिन्न बहाना बनाएर वारिसलाई जिम्मेवारी हस्तान्तरण गर्न पन्छिएका थिए । पछि प्रदेशका मुख्यमन्त्री लालबाबु राउतको दबाबमा १२ वैशाखमा घिमिरेले आफ्नो जिम्मेवारी सचिव वारिसलाई बरबुझारथ गरे । १९ वैशाखदेखि मान्य हुने गरी १२ वैशाखमै सचिव घिमिरे भौतिक पूर्वाधार मन्त्रालयबाट रमानापत्र लिएर ऊर्जा, जलस्रोत तथा सिँचाइ मन्त्रालयमा हाजिर हुने भन्दै काठमाडौं गए ।

मन्त्री सोनलले सचिव पुष्करनाथ घिमिरेलाई पुनः आफ्नो मन्त्रालयमा ल्याउन तथा सचिव वारिसलाई पुनः ऊर्जा जलस्रोत तथा सिँचाइ मन्त्रालयमा काजमा पठाउन काठमाडौं गएका थिए । सोनलले १७ वैशाखमा सामान्य प्रशासनमन्त्री लालबाबु पण्डितलाई दबाब दिएर वारिसलाई पुनः ऊर्जा जलस्रोत तथा सिँचाइ मन्त्रालयमै काजमा तानिएको भनेर मन्त्रालयस्तरीय निर्णय गराएको सचिव विवादले बाहिर ल्याएको छ ।

मन्त्रालयको जिम्मेवारी पाएको साता दिन नहुँदै पुनः काजमा तानिएपछि सचिव वारिसले मन्त्रालयसँग सोधपुछ गर्न काठमाडौंमै रहेका बेला २५ वैशाखमा प्रधानमन्त्री तथा मन्त्रिपरिषद्को अर्को निर्णय आयो । २५ गते मन्त्रिपरिषद्को बैठकले वारिसलाई ऊर्जा जलस्रोत र सिँचाइ मन्त्रालयमा र पुष्करलाई प्रदेश २ का भौतिक पूर्वाधार मन्त्रालयमा सरुवा गर्ने निर्णय गरियो । यस विषयमा २८ फागुनदेखि २५ वैशाखसम्म दुईपटक मन्त्रिपरिषद्को निर्णय र एकपटक मन्त्रालय स्तरीयको निर्णय हुनुले पनि सचिव सरुवामा संघीय सरकार पनि विवादमा आएको छ ।

१९ वैशाखदेखि २५ वैशाखसम्म सचिव घिमिरे ऊर्जा जलस्रोत तथा सिँचाइ मन्त्रालयमा हाजिर नभएर प्रदेशको भौतिक पूर्वाधार मन्त्रालयमै हाजिर गरेका थिए । मन्त्री सोनलको मिलेमतोमा सचिव घिमिरेले बलमिच्याइँ गरेर मन्त्रालयकै एक अधिकृतको कार्यकक्षमा बस्ने गरेका छन् । मन्त्री सोनलको आदेशमा सचिव घिमिरेले मन्त्रालयको कामकाजमा अवरोध पु-याइरहेको एक कर्मचारीले बताए ।

उनले भने, ‘मन्त्रालय ऐन कानुनले चल्ने हो । तर, मन्त्री सोनलले मन्त्रालयलाई निजी कम्पनीजस्तो चलाउन खोजेका छन् ।’ यस विषयमा प्रमुख सचिव दीपक सुवेदीले प्रक्रिया पूरा गरेर आएको सचिवले काम गर्न पाउनुपर्ने बताए । सचिवको सरुवा–बढुवा संघीय सरकारको सामान्य प्रशासन मन्त्रालयले गर्ने विषय भएको बताउँदै प्रमुख सचिव सुवेदीले भने, ‘सचिव वारिस प्रक्रिया पूरा गरेर यहाँ आएका हुन् तर, पुष्करनाथ घिमिरेले ऊर्जा जलस्रोत तथा सिँचाइ मन्त्रालयबाट पुनः यहाँ सरुवा भएर आउँदा रमानापत्र लिएर आउनुभएको छैन ।’ उनी यस विषयमा थप बोल्न चाहेनन् ।

मन्त्री सोनलले संघीय सरकारका कारण आफ्नो मन्त्रालयमा सचिवको विवाद भएको बताए । ‘कर्मचारीको सरुवा कटुवा संघीय सरकारले गर्छन्,’ उनले भने, ‘प्रदेश सरकारलाई बदनाम गर्न संघीय सरकारले यस्तो गरेको छ ।’ दुई सचिवको विवादका कारण भौतिक पूर्वाधार विकास मन्त्रालयको नयाँ खाता सञ्चालन हुन सकेको छैन । मन्त्री सोनलले सचिव पुष्करनाथको नाममा खाता सञ्चालन गर्न प्रदेश कोलेनिकालाई दबाब दिने गरेको बुझिएको छ । प्रदेश कोष तथा लेखा नियन्त्रण कार्यालयले सचिव पुष्करनाथले सरुवा भई आएको कार्यालयबाट रमानापत्र र हाजिर भएका प्रमाण ल्याएपछि मात्रै खाता सञ्चालन गर्ने भन्दै फर्काएका छन् । सचिव विवादले आर्थिक वर्षको अन्त्यतिर मन्त्रालयको कामकाज ठप्प भएपछि सेवाग्राही तथा उपभोक्ता मारमा परेका छन् ।

प्रकाशित मिति: शनिबार, जेठ १८, २०७६ ०१:०३