तीन विद्यालय समायोजना गर्दै तीन बस सञ्चालन

A+ A A-

बर्दियाको मधुवन नगरपालिका–४ ढोढरीमा रहेको नेपाल राष्ट्रिय नमुना माध्यमिक विद्यालयले तीन स्कुल समायोजना गर्दै ती विद्यालयका विद्यार्थीको सहजताका लागि तीन स्कुल बस सञ्चालनमा ल्याएको छ ।

किसान प्राथमिक विद्यालय माचढ, दीपेन्द्र प्राथमिक विद्यालय र नेपाल राष्ट्रिय प्राथमिक विद्यालय ढोढरीलाई नेपाल राष्ट्रिय नमुना माध्यमिक विद्यालयले आफूमा समायोजना गरेको हो । वरपरका विद्यार्थी संख्या न्यून भएका विद्यालय समायोजना गरेपछि ती विद्यालयमा अध्ययनरत प्राथमिक तहका बालबालिकालाई असहज हुँदा दुई बस आफैंले खरिद गरेर एक भाडामा ल्याएको नेपाल राष्ट्रिय नमुना माध्यमिक विद्यालयका प्रधानाध्यापक पूर्णचन्द्र पोखरेलले बताए ।

नमुना विद्यालयमा कक्षा १ देखि ५ कक्षासम्म पूर्ण अंग्रेजी माध्यम र ६ देखि ९ कक्षासम्म अंग्रेजी र नेपाली दुवै माध्यमबाट पढाइ हुन्छ । गुणस्तरीय शिक्षा भएका कारण यस विद्यालयमा टाढाटाढादेखि पनि बालबालिका पढ्न आउने गर्दछन् । लामो दूरीका बालबालिकालाई स्कूल बस सञ्चालनपश्चात् पढ्न आउन सहज भएको र अति विपन्न, असहाय र जेहेन्दार विद्यार्थीका लागि छात्रावासको व्यवस्थासमेत रहेको विद्यालयका मावि इन्चार्ज जीवन खत्रीले बताए ।

साथै अतिरिक्त समयलाई कृषि उत्पादनमा लगाउँदै पढ्दै सिक्दै कमाउँदै भन्ने अभियानका साथ स्वैच्छिक रूपमा काम गरेबापत प्रतिघण्टा रु ७५ रुपैयाँका दरले पारिश्रमिक दिने प्रअ पोखरेलले बताए । हाल मधुवन, ठाकुरबाबा नगरपालिका र गेरुवा गाउँपालिकाबाट विद्यालयमा अध्ययन गर्न बालबालिका आउँछन् ।

प्रकाशित मिति: बिहीबार, जेठ १६, २०७६ १८:१०