लीलामदनको सादा बिल प्रकरण : पन्छिन खोज्दै प्रशासन, पीडित भन्छन्- पावर र पैसाका अगाडि केही नचल्ने रहेछ

लीलामदनको सादा बिल प्रकरण : पन्छिन खोज्दै प्रशासन, पीडित भन्छन्- पावर र पैसाका अगाडि केही नचल्ने रहेछ

A+ A A-

सिरहाको लहानस्थित लीलामदन पोलिक्लिनिक तथा प्रसूति गृहले बन्धक बनाएका सिरहा नगरपालिका–१० का २५ वर्षीय सुरेश मुखिया डिस्चार्ज भएको ६ दिन भयो । जनरल बेडमै उपचार गराएका उनलाई लीलामदन पोलिक्लिनिकले दुई साताकै सवा पाँच लाखको सादा बिल दिएर ठग्न खोजेको थियो ।

छातीमा कफ जमेर श्वासप्रश्वासमा समस्या भएपछि ४ असारमा उनी अस्पताल भर्ना भएका थिए । पोलिक्लिनिकले प्राथमिक उपचारबाहेक बिरामी भर्ना लिन पाउँदैन । तर, सामान्य बिरामी सुरेशलाई झण्डै दुई साता भर्ना गरेर १७ असारमा घर लैजान भन्दै अस्पतालले कुल ५ लाख २१ हजार रुपैयाँको सादा बिल दिएको थियो ।

उपचारका क्रममा समेत सुरेशका आफन्तसँग पटक-पटक गरी बिना बिलकै ३ लाख ७० हजार रुपैयाँ लिएको लीलामदन पोलिक्लिनिकले डिस्चार्ज हुने बेलामै सक्कली बिल दिने बताएको थियो । तर, डिस्चार्ज हुने दिन पनि सादा बिलकै भरमा तिरिसकेको रकम काटेर बाँकी १ लाख ५१ हजार रुपैयाँ थप तिर्न भनेपछि सुरेशका आफन्त आश्चर्यमा परेर सक्कली बिल दिए मात्रै बाँकी पैसा तिर्ने अडान राख्यो ।

अस्पतालले सादा बिलमा मनपरी रकम जोडेर ठग्न खोजेपछि अस्पतालले थप तिर्न भनेको पैसा उनका आफन्तले तिर्न नमान्दा अस्पतालले उनलाई बेडमै बन्धक बनाएको थियो । त्यसपछि गत १८ गते शुक्रबार दिउँसो शिलापत्रले उनको विषयमा समाचार लेखेपछि दबाबमा आएको प्रशासन साँझ अस्पताल पुगेपनि उनी डिस्चार्ज हुन सकेन । प्रहरी अधिकारीहरू शनिबार बिहान १० बजे दुवै पक्षलाई इलाका प्रहरी कार्यालय, लहान आउन भनेर निस्केका थिए ।

तर, अस्पतालबाट प्रहरी बाहिरिएलगत्तै तनावमा परेको अस्पताल प्रशासनले सुरेशलाई डिस्चार्ज दियो । अस्पतालका सञ्चालक डा. दिलिपकुमार साहले डिस्चार्ज गर्ने बेलामा आफन्तसँग भनेको थिए, ‘यो विषयलाई अब अगाडि नबढाऔँ, थाना नगएर भोलि बाहिरै बसेर यो विषयलाई मिलाऔँ ।’ तर, पीडित परिवार भने बाहिर नबसेर आफूहरूमाथि अन्याय भएको र अरुमाथि पनि हुनसक्ने भन्दै शनिबार प्रहरी कार्यालयमा गएर उजुरी हाले ।

पीडित परिवारले अस्पताल सञ्चालकलाई पक्राउ गरी अवैध रूपमा ठगेको रकम फिर्ता पाउँ भन्दै उजुरी गरेका थिए । त्यसयता पीडित परिवार हरेक दिन प्रहरी कार्यालय पुग्ने गरेका छन् । तर, उनीहरूले न्याय पाउन सकेका छैनन् । प्रहरीले पीडितको उजुरीको आधारमा आफ्नो हिसाबले होइन, अस्पतालले भनेको हिसाबले घुमिरहेका छन् ।

यसरी अवैध र मनपरी रूपमा बिरामी लुट्न खोज्नेमाथि ‘क्विक एक्सन’ लिनुपर्नेमा प्रहरीले शनिबारयता दिनहुँ दुवै पक्षबीच छलफल गराउँदै आएको छ । छलफलमा प्रहरीले सक्कली बिल दिन अस्पताल सञ्चालक डा. साहलाई आग्रह त गर्छन्, तर उनी मान्दैनन् । बरु, उनी घरि औषधि ब्ल्याकमा ल्याएको भन्दै बिल दिन नमिल्ने भन्छन् त घरि बाँकी पैसा तिरे मात्रै बिल दिने भनिरहेका छन् ।

‘कुरा एउटै त हो नि,’ लहानका डीएसपी डा. तपन दाहाल भन्छन्, ‘पैसा दिएर बिल दिएन भने उजुरी दिन त पाइहाल्यो नि ।’

सिरहाका प्रमुख जिल्ला अधिकारी प्रदीपराज कँडेलले आफूले यस विषयमा लहानका डीएसपीलाई सबैथोक भनिसकेको भन्दै यस विषयमा एसपीसँग एकचोटि कुरा गर्नुस् भन्ने जवाफ दिए । ‘मैले एसपी र डीएसपी दुवै जनालाई भनिसकेको छु,’ उनले भने, ‘एकचोटि एसपीसँग कुरा गर्नुस् ।’ तर, एसपी हिरा पाण्डेसँग कुरा गर्दा उनले आफूले यो विषय फेरि भोलि बुझ्ने भन्दै पन्छिए ।

प्रहरी सधैँ बोलाउँदा र त्यहाँबाट रित्तै फर्काउँदा अब थाकेको महसुस भएको पीडित परिवारको गुनासो छ । प्रहरी प्रशासन आफू पीडितलाई साथ नदिई अस्पतालकै इशारामा घुमिरहेको पीडितको आरोप छ । ‘दिनहुँ गाडी चढेर थाना जान्छौँ, तर केही हुन सकेको छैन,’ बिरामी सुरेशका साला विजय मुखिया भन्छन्, ‘अस्पतालकै इशारामा प्रहरी घुमिरहेका छन् । पावर र पैसाका अगाडि केही नचल्ने रहेछ, अब थाक्यौं ।’

अस्पतालका सञ्चालक डा. साह लहानका मेयर मुनी साह सुडीका आफन्त हुन् । अस्पतालका सञ्चालक ‘पैसावाला र पावरफूल’ भएकै कारण आफूहरूमाथि अन्याय भएपनि प्रशासनले बेवास्ता गर्दै आएको पीडित परिवार बताउँछन् ।

सम्बन्धित समाचार

प्रकाशित मिति: बुधबार, असार २३, २०७८ १२:३५