लीलामदन अस्पतालको अवैध असुली प्रकरण : औषधि 'ब्ल्याक'मा ल्याएको भन्दै बिल नदिने प्रहरीलाई सञ्चालकको जवाफ

लीलामदन अस्पतालको अवैध असुली प्रकरण : औषधि 'ब्ल्याक'मा ल्याएको भन्दै बिल नदिने प्रहरीलाई सञ्चालकको जवाफ

A+ A A-

बिरामीलाई मनपरी शुल्क जोडेर सादा बिल दिएको लहानको लीलामदन पोलिक्लिनिक तथा प्रसूति गृहले प्रहरीलाई पनि एउटा पनि सक्कली बिल नदिने जवाफ दिएको छ ।

अस्पतालले जनरल बेडमै उपचार गराएका सिरहा नगरपालिका-१० का २५ वर्षीय सुरेश मुखियालाई २ साताकै सवा ५ लाखको सादा बिल दिएको थियो ।

सुरेशका परिवारले अस्पतालका सञ्चालकसमेत रहेका डा. दिलीप कुमार साहले उपचारका क्रममा भनेका बेला पटक-पटक गरी ३ लाख ७० हजार दिँदा पनि बिल भने डिस्चार्ज हुने दिन मात्रै दिने भनेका थिए । तर, १७ असारमा फेरि अस्पतालले जम्मा ५ लाख २१ हजारको सादा बिल थमाएर बाँकी रकम बुझाएर बिरामी लैजान भन्यो ।

अस्पतालका सञ्चालक डा. साहले दिएको सादा बिलमा जम्मा रकम ५ लाख २१ हजार, बुझाइसकेको रकम ३ लाख ७० हजार र बाँकी रहेको रकम १ लाख ५१ हजार उल्लेख थियो । तर, जनरल बेडमै कहिलेकाहीँ मात्रै अक्सिजन प्रयोग गरिएका बिरामी सुरेशको उपचारको बिल देखेर आफन्तलाई आश्चर्य लाग्यो ।

सुरेशका आफन्तले सक्कली बिल मागे । तर, अस्पतालले घरी पैसा दिएपछि बिल दिने र घरी औषधि 'ब्ल्याक'मा ल्याएको भन्दै बिल नदिने बताउन थाल्यो । पटक-पटक गरी जसोतसो ३ लाख ७० हजार रुपैयाँ अस्पताललाई बुझाइसकेका आर्थिक रूपले विपन्न सुरेशका परिवारले फेरि मागिएको रकम दिने अवस्थामा पनि रहेन ।

अस्पतालको कर गरेबमोजिम र आर्थिक समस्याले पनि थप बाँकी भनिएको रकम तिर्न नसक्दा अस्पतालले सुरेशलाई अस्पतालमै बन्धक बनायो । अस्पतालले बन्धक मात्रै बनाएनन्, सञ्चालक डा. साहले घटनाबारे बाहिर कसैलाई भने बिरामीको अवस्था बिग्रनेसम्मको धम्की दियो । त्यसपछि पीडित परिवारले मिडिया गुहारे ।

यस विषयमा शिलापत्रले शुक्रबार समाचार प्रकाशित गरेपछि प्रशासन र अस्पताल दबाबमा आयो । लगत्तै इलाका प्रहरी कार्यालय लहानले घटनाबारे चासो देखाउँदै क्लिनिकमा पुगेर सुरेशको अवस्थाबारे बुझ्यो । प्रहरी अधिकारी पुग्दा क्लिनिक सञ्चालक डा. साहले सुरेशको घटनाबारे धेरै कुरा खुलाउन चाहेनन् ।

त्यसपछि ती प्रहरीहरूले सञ्चालक सक्कली बिलसहित डा. साहसँगै पीडित परिवारलाई पनि शनिबार प्रहरी कार्यालयमा आउन भनेर गए । तर, प्रहरीले बन्धक बनेको सुरेशको तत्कालै डिस्चार्जका लागि भने केही तत्परता देखाएनन् ।

जनरल बेडमा उपचार गरेका सुरेशलाई २ हप्तामा सवा ५ लाखको सादा बिल, अस्पतालमै‌ बन्धक बनाएर बाहिर नभन्‍न धम्की

प्रहरी क्लिनिकबाट बाहिरिएलगत्तै पीडित परिवारले फेरि डिस्चार्ज गरिदिन आग्रह गर्दा घटना बाहिरिएर तनावमा आएका सञ्चालक डा. साह केही बोलेनन् । उनले यस विषयलाई थप अगाडि नबढाउन र भोलि बसेर कुरा गर्न भन्दै बिरामीलाई डिस्चार्ज दिए ।

अस्पतालले बाहिरै बसेर कुरा मिलाउन भने पनि पीडित परिवारले प्रहरीले बोलाएअनुसार आज शनिबार प्रहरी कार्यालय पुगे । उनीहरू पुगे पनि अस्पताल प्रशासन भने आउनलाई आनाकानी गरेर बिल पनि नलिईकनै प्रहरी कार्यालय आए ।

छलफलका क्रममा प्रहरीले पीडितका प्रमाण र कुरा सुने । त्यसपछि प्रहरीले अस्पताल प्रशासनलाई आफ्ना कुरा राख्न र सक्कली बिल दिन भन्यो । तर, अस्पतालका सञ्चालक डा. साहले औषधि बाहिरबाट 'ब्ल्याक'मा ल्याएको भन्दै सक्कली बिल नदिने जवाफ दिएका छन् ।

अस्पतालमा हुँदा बाँकी भन्दै मागिएको १ लाख ५१ हजार दिनुपर्ने वा नदिनुपर्नेबारे उनी नबोले पनि आफूले लिइसकेको रकमबाट एक रुपैयाँ पनि फिर्ता नहुने जवाफ उनले प्रहरीको सामुन्नेमै दिए । 'हामीले औषधि ब्ल्याकमा ल्याएका छौं,' उनले भने, 'बिलेकले ल्याएको छ, बिलेकले बिल दिँदैनन्, र त्यो लिइसकेको पैसा पनि फिर्ता हुँदैन ।'

डा. साहले यसो भनिरहँदा पनि प्रहरीहरू केही बोलेनन्, बरु निरीह जस्तो टुलुटुलु हेरिरहे । उनी यति भनेर प्रहरी कार्यालयबाट निस्केका छन् । यससँगै आजको छलफल बिनानिष्कर्ष टुंगिएको छ ।

आजको छलफल निष्कर्षविहीन बनेपछि फेरि भोलि आइतबार दुवै पक्षलाई बोलाइएको लहानका डीएसपी डा. तपन दाहालले बताए । प्रहरीकै सामुन्नेमा औषधि 'ब्ल्याक'मा ल्याएको छु भनेको छ नि भन्ने प्रश्नमा उनले भोलि सबै आवश्यक बिल तथा विवरणसहित अस्पताल प्रशासनलाई बोलाइएको र प्रमाणको आधारमा कानुनी प्रक्रिया अगाडि बढाइने जनाए ।

सिरहाका प्रमुख जिल्ला अधिकारी प्रदीपराज कँडेलले असाधारण रूपमा रकम लिएको पाइएमा बाँकी रकम फिर्ता गराइने बताएका छन् । औषधि 'ब्ल्याक'मा ल्याएर बेच्ने गरेको विषयमा पनि खोजबिन हुने र गैरकानुनी ठहरिए कारबाही हुने उनले बताए ।