लिलामदन अस्पतालको सादा बिल प्रकरण : पीडितलाई झुलाउँदै प्रशासन र अस्पताल

A+ A A-

सिराहाको लहानस्थित लिलामदन पोलिक्लिनिक तथा प्रसूति गृहले जनरल बेडमै उपचार गराएका सिराहा नगरपालिका-१० का २५ वर्षीय सुरेश मुखियालाई दुई साताकै सवा ५ लाख रुपैयाँको सादा बिल दियो ।

उपचारका क्रममा पटकपटक गरी ३ लाख ७० हजार रुपैयाँ सुरेशका आफन्तले अस्पताललाई बुझाएपनि सक्कली बिल डिस्चार्ज हुने बेलामै दिने बताएको अस्पतालले सादा बिल नै दिँदा ठूलो रकमको बिलदेखि आफन्तलाई अनौठो लाग्यो ।

४ असारमा अस्पताल भर्ना भएका सुरेशलाई लैजान भन्दै १७ असार अस्पतालका सञ्चालक डा. दिलिप कुमार साहले बुझाइसकेको ३ लाख ७० हजार रुपैयाँ काटेर बाँकी १ लाख ५१ हजार रुपैयाँ तिर्न सादा बिल थमाएका थिए । सुरेशका आफन्तले अस्पतालसँग सक्कली बिल मागे ।

तर, घरी सबै सक्कली बिल नदिने र घरि पैसा दिएपछि बिल दिने भन्दै अस्पतालले सुरेशका आफन्तलाई सक्कली बिल दिएनन् । आर्थिक रूपमा विपन्न सुरेशको परिवारले शुल्क मनपरि जोडिएको भन्दै थप रकम तिर्न नसक्ने भनेपछि अस्पतालले सुरेशलाई बेडमै बन्धक बनाएर राख्यो ।

त्यसको बिहानपल्ट १८ असारमा शिलापत्रले सुरेशलाई अस्पतालमै बन्धक बनाइएको र अस्पतालले मनपरि गरेको समाचार प्रकाशित गरेपछि अस्पताल दबाबमा आएर उनलाई बाध्य भएर डिस्चार्ज दियो । शिलापत्रको समाचारपछि दबाबमा आएको प्रशासनले पनि लगत्तै क्लिनिकमा पुगेर सुरेशको अवस्थाबारे बुझेपनि उनको तत्कालै उद्धार भने गरिदिएनन् ।

इलाका प्रहरी कार्यालय लहानबाट आएका प्रहरीले सक्कली बिलसहित सञ्चालक डा. साहसँगै पीडित परिवारलाई पनि शनिबार प्रहरी कार्यालयमा आउन भनेर गए । त्यसपछि तनावमा परेको अस्पतालले यस विषयलाई थप अगाडि नबढाउन र शनिबार बाहिरै बसेर कुरा गर्न भन्दै बिरामीलाई डिस्चार्ज दिए ।

तर, पीडित परिवार शनिबार सिधै प्रहरी कार्यालय पुग्यो । प्रहरीले अस्पतालका सञ्चालक डा. साहलाई पनि बोलायो । तर, सक्कली बिल नलिएर आएका डा. साह प्रहरीलाई सक्कली बिल नदिने जवाफ दिएर निस्के ।

अस्पतालका सञ्चालक डा. साहले औषधि बाहिरबाट 'ब्ल्याक'मा ल्याएको भन्दै सक्कली बिल नदिने जवाफ दिएर त्यहाँबाट निस्केका थिए । उनी निस्केपछि प्रहरीले पीडित परिवारलाई आइतबार १० बजेका लागि बोलायो ।

पीडितहरू आज पनि ठ्याक्क १० बजे नै पुगे । तर, अस्पतालका सञ्चालक डा. साह आउँदैछु आउँदैछु भन्दाभन्दै साढे ३ बजे मात्रै प्रहरी कार्यालय आए ।

प्रहरी कार्यालयमा प्रवेश गरेलगत्तै सिधै उनी लहानका डीएसपी डा. तपन दाहालसँग भेटे । डीएसपीसँग उनले झण्डै आधा घण्टा एकान्तमा गफ गरेर पीडित उभिरहेको ठाउँमा आए । र, आफू भोलि सक्कली बिल ल्याउने भन्दै पीडितका आफन्तलाई बाँकी रहेको पैसा लिएर आउन भनेर निस्किएका छन् ।

प्रहरीले पनि आज फेरि भोलि आउन भनेर पीडितका आफन्तलाई घर फर्काइदिएका छन् । दुई दिनदेखि प्रहरी कार्यालय धाइरहे पनि आफूहरूलाई प्रशासन र अस्पतालले सास्ती मात्रै दिएको पीडित परिवारले गुनासो गरेको छ ।

प्रहरीले आफ्ना कुरा नभई अस्पताल सञ्चालकका कुरा मात्रै सुनेको पीडित परिवारको आरोप छ । 'प्रहरीले हामीलाई वास्ता गरेको छैन,' प्रहरी कार्यालय धाइरहेका बिरामी सुरेशका सालो विजय मुखियाले भने, 'डाक्टरले खुलमखुला ब्ल्याकमा औषधि ल्याएको बताएपनि क्विक एक्सन लिनुपर्नेमा डाक्टरले जे भनिरहेका छन्, त्यसरी नै प्रहरी हिँडिरहेका देखिन्छ ।'

अस्पतालका सञ्चालक डा. साह लहान नगरपालिकाका मेयरमुनि साह सुडीका आफन्त हुन् । उनीहरू 'पावरफूल' भएकै कारण आफूहरूमाथि अन्याय भएपनि प्रशासनले आफूहरूलाई नसुनेको भन्दै उनी भक्कानिए ।

यता, लहानका डीएसपी डा. तपन दाहालले अस्पतालका सञ्चालक डा. साहले भोलि सबै बिल लिएर आउने बताएपछि अन्तिम मौका दिइएको बताएका छन् । 'भोलि सबै बिल ल्याउँछु भनेका छन्,' यो त झुलाउने काम मात्रै भयो नि भन्ने उनले भने, 'यदि भोलि बिल लिएर आएनन् भने म सिधा एक्सनमै जान्छु ।'

यो पनि :

लिलामदन अस्पतालको अवैध असुली प्रकरण : औषधि 'ब्ल्याक'मा ल्याएको भन्दै बिल नदिने प्रहरीलाई सञ्चालकको जवाफ

समाचार प्रभाव : अस्पतालले बन्धक बनाएका सुरेशले पाए डिस्चार्ज

जनरल बेडमा उपचार गरेका सुरेशलाई २ हप्तामा सवा ५ लाखको सादा बिल, अस्पतालमै‌ बन्धक बनाएर बाहिर नभन्‍न धम्की

प्रकाशित मिति: आइतबार, असार २०, २०७८ १९:०५