एक सचिवले धान्दै छन् प्रदेश २ का ६ मन्त्रालय

A+ A A-

प्रदेश २ का ६ मन्त्रालयमध्ये एक मन्त्रालयमा सचिव मात्रै छन् । पाँच मन्त्रालय सचिवविहीन छन् । सचिवको सरुवा र अवकाशका कारण मन्त्राय सचिवविहीन बनेका हुन् ।

उनीहरूको स्थानमा नयाँ नियुक्ति नहुँदा मन्त्रालयका प्रशासनिक गतिविधि ठप्प छ । संघीय प्रशासनले समायोजनमा पठाएका कर्मचारीको अहिलेसम्म पदस्थापन हुन सकेको छैन ।

मन्त्रिपरिषद् बैठकले एक साताअघि नै प्रदेश २ मा पाँचजना सचिव पठाउने निर्णय गरिसकेको छ । तर, अहिलेसम्म भौतिक पूर्वाधार मन्त्रालयका सचिव पुष्कर घिमिरे मात्र हाजिर भएका छन् । चारजना अझै आएका छैनन् ।

संघीय सरकारले अवकाश पाउन लागेका कर्मचारी मात्र पठाउने गरेकोले यस्तो अवस्था आएको आर्थिक मामिला तथा योजनामन्त्री विजय यादवले बताए । उनी काठमाडौंबाट आउने कर्मचारीको कुन बेला सरुवा हुन्छ र कति बेला अवकाश पाउँछन्, थाहा नै नहुने बताउँछन् ।

चालू आर्थिक वर्षका लागि २९ अर्ब ७८ करोड बजेट छ । पुँजीगत बजेटको आकार १४ अर्ब ९६ करोडभन्दा बढी छ । विकास बजेट कार्यान्वयन सुस्त छ । सचिव अभावमा बजेट फ्रिज हुने सम्भावनासमेत बढेको छ ।

सरकारले सवारीसाधन र कार्यालय व्यवस्थापनबाहेक अन्य शीर्षकमा बजेट खर्चन सकेको छैन । प्रदेश सरकार मातहतका कार्यालयले पूर्णता पाउन सकेका छैनन् । सचिव अभावमा सरकारको नीति तथा कार्यक्रम कार्यान्वयनमा समस्या देखिएको छ ।

मन्त्रालयमा कर्मचारी नभएकै कारण बजेट कार्यान्वयन गर्न समस्या भएको आर्थिक मामिला तथा योजनामन्त्री विजय यादवले बताए । उनले चालू आवको २५ प्रतिशत बजेट मात्रै उपयोग हुने जानकारी दिए ।

उद्योग, पर्यटन, वन तथा वातावरण, आन्तरिक मामिला तथा कानुन, समाजिक विकास मन्त्रालय र प्रदेशसभा सचिवालय सचिवविहीन छन् । आर्थिक मामिला तथा योजना मन्त्रालयका सचिव मुक्ति आचार्यले गत शुक्रबार नै अनिवार्य अवकाश पाए । आचार्यको ठाउँमा प्रेमकुमार श्रेष्ठलाई खटाइएको छ । तर, उनी अहिलेसम्म हाजिर भएका छैनन् ।

मुख्यमन्त्री तथा मन्त्रिपरिषद् कार्यालयमै पनि सचिव पद रिक्त छ । यहाँ प्रमुख सचिवसहित चार सचिवको दरबन्दी छ । तर, दुई सचिवको पद खाली छ । संघीय सरकारले पठाएको शंकर सुवेदी र सुशील ढकाल कार्यक्षेत्रमा आइपुगेका छैनन् । ५२ कर्मचारी दरबन्दी रहेको मुख्य कार्यालयमा १३ पद रिक्त छ ।

आन्तरिक मामिला तथा कानुन मन्त्रालयका सचिव जगदीश रेग्मीले गत २७ चैतमा अनिवार्य अवकाश पाइसकेका छन् । उपसचिव रोहित दाहाल र अर्जुन शर्मा ७ महिनाअघि नै सरुवा भइसकेका छन् ।

यसअघि उद्योग, पर्यटन, वन तथा वातावरण मन्त्रालयमा विद्यानाथ झा सचिव थिए । गत २९ पुसमा आर्थिक मामिला तथा योजनामन्त्री विजय यादवले कुटपिट गरेपछि उनी सरुवा भए । उनको ठाउँमा अहिलेसम्म कोही आएका छैनन् ।

यो मन्त्रालयमा प्रशासन र वनका पाँच उपसचिवको दरबन्दी छ । वनका तीन उपसचिव छन् । प्रशासन फाँटमा उपसचिव पद रिक्त छ ।

मन्त्रालयमा कर्मचारी नै नभएपछि बाँकी रहेको बजेट उपयोग गर्न तथा कार्ययोजना तयार पार्न समस्या भएको छ ।

प्रकाशित मिति: मंगलबार, जेठ १४, २०७६ २३:५०