नेपाल–भारत जीर्ण सीमा स्तम्भ मर्मत गर्ने सहमति

A+ A A-

जनकपुरधाम क्षेत्रसँग जोडिएको नेपाल र भारतको सीमामा जीर्ण सीमा स्तम्भ जीर्णोद्धार गर्ने सम्झौता भएको छ ।

जनकपुरधाममा भएको नेपाल र भारतका प्रतिनिधि सम्मिलित एक कार्यक्रममा समझौता भएको हो ।

धनुषा, महोत्तरी, सिरहा, सप्तरी तथा भारत बिहारस्थित मधुबनी जिल्लाका अधिकारीबीच भएको बैठकमा सीमा क्षेत्रको बाँकी स्थानमा तत्काल स्तम्भ निर्माण गर्न सम्झौता भएको धनुषाका प्रमुख जिल्ला अधिकारी प्रदीपराज कँडेलले जानकारी दिए ।

प्रदेश २ को नेपाल–भारतसँग जोडिएको धनुषा, महोत्तरी, सिरहा र सप्तरीसम्म कुल ९ सय ४२ वटा सीमा स्तम्भ छन् । प्रमुख जिल्ला अधिकारी कँडेलका अनुसार महोत्तरीदेखि सप्तरीसम्म ९ सय ४२ वटा सीमा स्तम्भमध्ये ३ सय ९४ को मर्मत सम्भार र ५ सय ४८ निर्माण गर्नुपर्ने आवश्यक्ता छ ।

दुई मुलुकका अधिकारीहरुबीच आउँदो सिजनमा सप्तरीमा निर्माण गर्नुपर्ने सम्झौतामा हस्ताक्षर भएको बैठकपछि कँडेलले बताए । यसैगरी यो बर्ष ६ सय १८ वटा सीमा स्तम्भको मर्मत सम्भार गरिएको समेत जानकारी दिए ।

सँगै सुरक्षासम्बन्धी चुनौतीको बारेसमेत छलफल भएको छ । नेपाल–भारत सीमा क्षेत्रमा भइरहेका अवैध मदिरा तस्करी र लागूऔषध ओसारपसारकाबारे चनाखो भई यसलाई रोक्न संयुक्त कार्य थालिने गर्ने दुवै देशका अधिकारीहरुले प्रतिबद्धता जनाएका छन् ।

भारत विहार राज्यका मधुबनी जिल्लाका डीएम श्रीशशक्त कपिल अशोकले सीमा स्तम्भले दुई मुलुकबीचको मित्रताको संकेतसमेत रहेको बताए । दुई मुलुकबीचको सीमा छुट्याउने उद्देश्यले गाडिएका सीमा स्तम्भहरुको मर्मत सम्भार तथा नयाँ निर्माण मित्रवत तरिकाले गरिएको उनको भनाइ थियो ।

स्तम्भ निर्माण, मर्मत सम्भार तथा सीमा रक्षा गर्न नेपालको सशस्त्र प्रहरी बल र भारतको एसएसबीले खेलेको भूमिकाको प्रशंसा गर्दै उनले बाँकी रहेका सीमा स्तम्भ दुवै देशले चाँडै निर्माण गर्ने बताए ।

प्रकाशित मिति: मंगलबार, जेठ १४, २०७६ ०४:२७