लुटेरा र प्रहरीबीच गोली हानाहान

A+ A A-

लुटेरा समूह र प्रहरीबीच जनकपुरमा बुधबार राति गोली हानाहान भएको छ । जानकी विहारको चाँदीलगायत गरगहना लुट्न भारतको विहारबाट आएका लुटेरा समूहलाई प्रहरीले नियन्त्रणमा लिने क्रममा लुटेरा र प्रहरीबीच दोहोरो फायरिङ भएको हो ।

प्रहरीको गोली लागेर भारतको विहार राज्य समस्तीपुर जिल्लाका २४ वर्षीय रवि मलिक डोम घाइते भएको धनुषा प्रहरीले जनाएको छ ।

बुधबार राति बिहारकुण्डमा रहेको जानकी विहारका महन्थ नारायण शरणसँग रहेको नगद तथा मन्दिरको गरगहना लुट्ने भारतको विहारबाट आठजनाको समूह जनकपुर आएको थियो ।

प्रदेश प्रहरी, संघीय प्रहरी र जिल्ला प्रहरीको संयुक्त टोलीले खोजतलास गर्दै जाँदा जनकपुरस्थित लभली होटेलमा लुकीछिपी बसेका भेट्याएको थिए । सुरुमा लुटेरा समूहले प्रहरीमाथि गोली चलाएको थियो । त्यसपछि प्रहरीले प्रतिकार गर्ने क्रममा गोली चलाउँदा डोम घाइते भएका हुन् ।

केही बेरको दोहोरो फायरिङपछि प्रहरीको संयुक्र टोलीले ती आठैजनालाई नियन्त्रणमा लिएको थियो । प्रहरीले लुटेराबाट हाततियार, दुई थान मोटरसाइकल र एक थान स्कुटीसमेत बरामद गरेको धनुषाका प्रहरी शेखर खनालले जानकारी दिए ।

पक्राउ पर्नेमा भारत समस्तीपुर गदोपुर बस्ने २० वर्षीय रवि मलिक डोम, सिमरी वडा न. ८ विद्यापति नगर थाना बस्ने २० वर्षीय साहिल रजक विवेक, समस्तीपुर पटौरी वडा न. ३ बस्ने २४ वर्षीय अजितकुमार सिंह, समस्तीपुर भगवानपुर चक्सिव वडा न. ४ बस्ने २८ वर्षीय सुजित कुमार राय, समस्तीपुर महोदीनगर वडा न. ६ बस्ने ३० वर्षीय अमितकुमार सिंह, महोदीनगर वडा न. २ बस्ने २० वर्षीय अमितकुमार यादव, मधुवनी साहरघाट वडा न. ५ बस्ने ३२ वर्षीय रञ्जितकुमार भगत र मधुवनी साहरघाट वडा न. ८ बस्ने ३८ वर्षीय पप्पु भनिने सञ्जयकुमार सुमन छन् ।

घाइते मलिकलाई दाया र बाया तिघ्रामा एकएक गोली र एक गोली पैतालामा गरी ३ गोली लागेको छ ।

प्रकाशित मिति: शुक्रबार, जेठ १०, २०७६ ०३:०३