किन यसरी नाच्दैछन् डाक्टर, नर्स र कोरोना संक्रमित ? (भिडियाे)

A+ A A-

यही २० अप्रिलमा भारतीय संगीतकार बप्पी लाहिरीले एउटा भिडियो आफ्नो फेसबुक पेजमा शेयर गरे, जहाँ डाक्टर र नर्स बिरामीका अगाडि नाचिरहेको देख्न सकिन्छ । नाच हेरेर बिरामीहरू हात हल्लाइरहेका छन्, कोहीचाहिँ शय्याबाटै जिउ मर्काइमर्काइ गीतमा रमाइरहेका छन् । बिरामीमध्ये कसैको मुखमा अक्सिजनको पाइप, कसैकोमा मास्क छ । त्यही गीतमा पीपीई लगाएका स्वास्थ्यकर्मी बिरामीसँगै नाचिरहेका छन् ।

यो भिडियो भारत गुजराजको वाघोडियास्थित पारुल सेवाश्रम हस्पिटलभित्रको हो । यसमा नाचिरहेकाहरू कोभिड योद्धा र संक्रमित हुन् ।

पारुल युनिभर्सिटी नामकाे युट्युब च्यानलमा अपलाेड गरिएकाे भिडियो हेर्नुहोस् :

सोचना क्या जो भी होगा देखा जाएगा
कल के लिए, आज को ना खोना
आज ये ना कल आएगा

अर्थात् भोलि जे हुन्छ, हेरौँला । भोलिका लागि आज नगुमाऔँ । किनकि, यो आज, भोलि फेरि आउँदैन । सन् १९९० मा हिन्दी चलचित्र घायलका लागि आशा भोस्ले, कुमार सानु र सब्बिर कुमारले गाएको यो गीत ३१ वर्षपछि कोभिडका बिरामी र स्वास्थ्यकर्मीको हौसला बढाउन प्रयोग भएको छ । अस्पतालको शय्यामा त्रास, पीडाले छटपटाइरहेका, अक्सिजन लिँदै गरेका बिरामी अनि आफैँ संक्रमित हुने जोखिममा काम गरिरहेका स्वास्थ्यकर्मीलाई शायद गीतका शब्दले छोएको हुनुपर्छ । तब त पीपीई छिचाेल्दै डाक्टर र नर्स, स्लाइन अनि अक्सिजनका पाइपलाई छल्दै बिरामीका हात रमाइरहेका छन्, शिथिल गोडा सलबलाइरहेका छन् ।

पारुल सेवाश्रम अस्पतालका अनुसार अहिले काेभिडका ६ सय संक्रमित राख्न मिल्नेगरी शय्याहरू तयार गरिएकाे छ । ‘हामी सबैलाई थाहै छ, कोभिडको औषधि बनेको छैन । अर्कातिर आँखैअगाडि मृत्यु देखिरहनुपरेको छ । यसले स्वास्थ्यकर्मी र संक्रमित दुवैको मनोबल घटाउँदै लगेको महसुस गरी हामीले संगीतमार्फत हौसला बढाउने प्रयास गरेका हौँ’, भिडियोबारे शिलापत्रको इमेल जिज्ञासामा अस्पतालले जवाफ फर्कायो ।

बिरामीलाई हतोत्साही हुनबाट जोगाउन खास योजना बनाएर काम गरिरहेको अस्पताल प्रशासनले जनाएको छ । ‘यस्ता भिडियो हामीसँग अरु पनि छन्’, अस्पताल प्रशासनले फर्काएको इमलेमा भनिएको छ, ‘आत्तिएर वा आशा मारेर स्वास्थ्यकर्मीसँगै बिरामी थप जोखिमतिर नजाऊन् भन्ने हाम्रो ध्येय हो ।’

हुन पनि यतिबेला भारतमा कोरोना भाइरस 'सुनामी' बनेर फर्किएको छ । अक्सिजन अभावले बाटोबाटोमा संक्रमित छट्पटाइरहेको भिडियोहरू सामाजिक सञ्जालमा छ्यापछ्याप्ती छन् । चारैतिरबाट कोभिड असरको अत्यासलाग्दो खबर मात्रै फैलिरहेका बेला संगीतकार बप्पीले पाेस्ट गरेकाे भिडियोलाई हजारौँले शेयर गरिरहेका छन् । ‘वाह, मैले अहिलेसम्मकै सबैभन्दा मनमोहक भिडियो हेर्न पाएँ । भगवानको आशीर्वाद लागोस्’, बप्पीले पोस्ट गरेको भिडियोमा आएका ११ हजारभन्दा बढी कमेन्टमा संगीतकर्मी सोनिया केशवानीको प्रतिक्रिया पनि छ ।

०००

गत कात्तिकमा भारत असमका डा. अनुप सेनापतिले नाचेर संक्रमितको मन बहलाउँदै गरेको भिडियाे छ्याछ्पाप्ती थियो । त्यहाँस्थित सिलचर मेडिकल कलेजका नाक, कान र घाँटीका विशेषज्ञ अनुप नाच्दा वरिपरिका संक्रमितहरूले मनोरञ्जन गर्थे ।

०००

कोभिडले निम्त्याएको यो विषम घडीमा नेपालमै पनि संक्रमितमा आशा जगाउनेखाले उदाहरण छन् । नेपालगञ्जस्थित भेरी अस्पतालमा कोरोना वार्डकी स्टाफ नर्स कमला नेपाली आफैँ संक्रमित हुन् । तर, उनी त्रास र पीडा लुकाएर, आत्मविश्वास बटुलेर आफूजस्ता संक्रमितको उपचारमा खटिएकी छन् । अरु संक्रमितजस्तै उनलाई पनि गाह्रो हुन्छ, छाती, जिउ दुख्छ तर केही बेर आराम गरी उनी पुनः ड्युटीमा जुटिहाल्छिन् । भन्छिन्, ‘बिरामी धेरै आइरहनुभएको छ, स्वास्थ्यकर्मी कम छौँ । बिरामी छट्पटाएको हेर्न सक्दिनँ ।’

उनी सास रहुन्जेल आस मार्न नहुने बताउँछिन् । ‘जब हामीसँग कुनै औषधि हुँदैन, त्यो बेला बचाउन सक्ने भनेको हामीभित्रको आशा र आत्मविश्वासले नै हो’, उनी भन्छिन् ।

भेरी अस्पतालमा काम गर्ने स्टाफ नर्स कमला नेपाली, जाे आफैँ संक्रमित भए पनि अन्य संक्रमितकाे रेखदेखमा खटिएकी छन्

नेपालमा त्यस्ता थुप्रै चिकित्सक, स्वास्थ्यकर्मी, अस्पतालका कर्मचारी छन्, जो आफैँ भाइरसको सिकार हुने जोखिममाझ संक्रमितको रेखदेखमा खटिएका छन् । उनीहरूलाई हेरेर पनि संक्रमितहरूले धैर्य गुमाउन नहुने मनोचिकित्सकहरू बताउँछन् ।

मनोचिकित्सक डा. सरोज ओझा संक्रमितहरूलाई दैनिक कम्तीमा आधा/एक घण्टा मनोरञ्जन गर्न सुझाउँछन् । यसबाट आफूलाई सकारात्मक राख्न सहयोग मिल्ने उनको भनाइ छ । ‘सकारात्मक सोच धेरै समस्याको समाधान हो’, उनले शिलापत्रसँग भने, ‘सकेसम्म आफ्नो दैनिकीलाई सुचारु गर्नुपर्छ । जस्तो कि, कोरोना लाग्नुअघि घरमा आफूले गर्ने कामहरू, व्यायाम, योगा, ध्यान गर्ने, एक्लै नबस्ने, अनावश्यक नसोच्ने, अत्यासलाग्दा समाचार धेरै नहेर्ने, पानी बढी पिउने, कम्तीमा आधा घण्टाजति रिल्याक्स गर्ने काममा आफूलाई अभ्यस्त तुल्याउनुपर्छ ।’ उनका अनुसार अस्पतालमा भएका संक्रमितहरूले पनि आत्मविश्वास राख्नुपर्छ, किनकि संसारमा करोडौँ मानिसले कोरोना भाइरसलाई जितेका छन् ।

यसको अर्थ संक्रमित हुँदैमा मरिन्छ नै भन्ने छैन । त्यसैले आत्मबल बलियो बनाउनुपर्नेमा मनोविद्हरूको जोड छ । र, आफूलाई सकारात्मक गतिविधिमा अलमल्याइरहनुपर्छ । जस्तो कि, आफूलाई गतिशील राख्ने प्रयास गर्नुपर्छ । डर र चिन्ताको भावना कम गर्न नकरात्मक भाव पैदा गर्ने खालका समाचारहरू कम हेर्नुपर्छ । विश्वसनीय स्रोतसहितका सूचना र समाचारका लागि थोरै समय छुट्याउनुपर्छ । पौष्टिक खानेकुरा खानुपर्छ । पुस्तकहरू पढ्न सकिन्छ । जानकारीमूलक अनि रमाइला कार्यक्रमहरू हेर्न सकिन्छ । परिवार र साथीहरूसँग सम्पर्कमा रहनुपर्छ । शारीरिक रूपमा सक्रिय रहनुपर्छ । होम क्यारेन्टाइनमा बस्दा के–के गर्ने भन्नेबारे विश्व स्वास्थ्य संगठनले विशेष सुझावहरू बनाएको छ, त्यसलाई फलो गर्न सकिन्छ ।

याे पनि...

काेराेना भाइरस : कतै हामी अनावश्यक डराइरहेका त छैनौँ ? हेर्नुस्, तथ्याङ्ककाे अर्काे पाटाे

कोरोनासँगै यस्ता मिथ्या सूचनाबाट बच्नुहाेस्

काेराेनाकाे निशानामा बालबालिका, कसरी जाेगाउने ?

प्रकाशित मिति: शुक्रबार, वैशाख १७, २०७८ १५:१५