कोरोना कहर : ९० प्रतिशत बिरामी अक्सिजनको सहारामा, भरिए अस्पताल, बेड पाउनै गाह्रो

कोरोना कहर : ९० प्रतिशत बिरामी अक्सिजनको सहारामा, भरिए अस्पताल, बेड पाउनै गाह्रो

A+ A A-

अक्सिजन, बेड, भेन्टिलेटरका लागि जिल्ला-जिल्लाबाट वीर अस्पतालका कोभिड फोकल पर्सन डा. अच्युत कार्कीलाई बिरामीका आफन्तको फोन आउँछ । ‘रात-विरात फोन आउँछ । बेड छ भन्ने स्थिति नै छैन,’ उनी भन्छन्, ‘फोन गर्नेलाई अरु अस्पतालमा डाइर्भट गर्नुपर्छ । उहाँहरू पीडामा हुनुहुनछ । बेड छैन भन्दा हामीलाई पनि गाह्रो हुन्छ ।’

ननकोभिड वार्डलाई कोभिड वार्ड बनाए पनि बेड पुर्‍याउन अस्पतालहरूलाई हम्मेहम्मे छ । ‘आईसीयू खाली नै हुँदैन । जहिले भरिएको हुन्छ । हिजो मात्र ४१ जना भर्ना भएका छन् । आईसीयूमा ८ र भेन्टिलेटरमा १ जना हुनुहुन्छ । यो साता दुई जनाको मृत्यु पनि भयो ।’

त्रिवि शिक्षण अस्पतालमा भर्ना भएका ९० प्रतिशत कोभिडका बिरामी अक्सिजनको सहारामा छन् । ‘धेरै गाह्रो भएको छ । केसहरू सिरियस छन्,’ कोभिड फोकल पर्सन डा. सन्तकुमार दास भन्छन्, ‘९० प्रतिशतलाई अक्सिजन चाहिनेछ ।’

ननकोभिडको बिरामी डिस्चार्ज भएपछि त्यसम पनि कोभिडका बिरामी राख्न थालिएको उनी बताउँछन् । ‘७५ जना कोभिडका बिरामी भर्ना भएका छन् । नयाँ बेड थप्न पाएको छैन बिरामीले भरिन्छ,’ उनी भन्छन्, ‘बेड, अक्सिजन र भेन्टिलेटरका लागि बारम्बार फोन आउँछ । मिलाउन कठिन छ । यो साता मात्र छ जनाको ज्यान गइसक्यो ।’

शुक्रराज ट्रपिकल तथा सरुवा रोग अस्पताल टेकुका निर्देशक डा. सागर राजभण्डारीलाई आज बिहान ७ बजेभित्र मात्र १० वटा फोन कल आयो । ती सबै फोन बेडका लागि थियो । ‘भर्ना गर्नुपर्‍यो भनेर फोन आउँछ । इमर्जेन्सीमा अक्सिजन सुँघाएर राखेको छ । भर्ना भएका डिस्चार्ज भएपछि प्राथमिकताका आधारमा भर्ना गर्नुपर्छ,’ उनी भन्छन्, ‘गाडी र एम्बुलेन्स रिजर्भ गरेर बिरामी आउनुहुन्छ । बेड खाली छैन । जानकारी नै नगराई आउँदा बिरामीले दुःख पाउने देखियो ।’

जानकारी गराएर मात्र अस्पतालमा आउन उनले अनुरोध गरे । ‘जुनसुकै अस्पतालले बिरामी पठाउँदा र बिरामी आफैँ आउँदा फोन कन्ट्याक्ट गरेर आउन अनुरोध गर्छु,’ उनी भन्छन्, ‘खबर नगरी आउँदा बिरामी यता उता गर्दा झन जोखिम धेरै हुन्छ । बेड नभएर हामीले बिरामी फर्काउनुपरेको छ ।’

टेकु अस्पतालमा भर्ना भएका अधिकांश बिरामी सिकिस्त छन् । २० जना आईसीयूमा १२ जना भेन्टिलेटरमा भर्ना भएका छन् । शुक्रबारयता मात्र टेकुमा पाँच जना कोभिडका बिरामीको मृत्यु भएको छ । मृत्यु हुनेमा युवादेखि ज्येष्ठ नागरिकसम्म छन् ।

पर्याप्त मात्रामा संक्रमितको व्यवस्थापन गर्ने संरचना नेपालसँग छैन । स्वास्थ्य मन्त्रालयका अनुसार देशभर १८ हजार ९ सय १७ वटा जनरल बेड, आईसीयू १ हजार ४ सय ८६ र भेन्टिलेटर ६ सय ३४ वटा छन् । यो संरचनाले धान्न नसक्ने विज्ञहरू बताउँछन् ।

जनस्वास्थ्य विज्ञ डा. शरद वन्त बेड नपाएर बिरामीको ज्यान जानु भनेको त्यो राज्यको अपराध हुने तर्क गर्छन् । ‘अस्पताल घुम्दाघुम्दै बिरामीको ज्यान जानु भनेको राज्यको ठूलो अपराध हो,’ उनी भन्छन्, ‘सरकारबाट सुविधा माग गरेको होइन, अत्यावश्यक जुन कुरा राज्यले नागरिकलाई दिन सक्छ, त्यो माग गरेको हो । सरकार गैरजिम्मेवार देखिन्छ ।’

कोभिडका बिरामीको उपचार गर्न छुट्टै अस्पताल आवश्यक पर्ने डा. वन्त बताउँछन् । ‘सुरुका दिनदेखि नै कोभिड संक्रमितको उपचार गर्न डेडिकेटेड अस्पताल चाहिन्छ भनेको हो,’ उनी भन्छन्, ‘सबै एकै ठाउँमा उपचार गरेर हुँदैन । संक्रमित कहाँ कुन अस्पताल जाने हो, छुट्याउनुपर्छ ।’

स्वास्थ्य मन्त्रालयका प्रवक्ता सरकारले गर्न सक्ने सबै काम गरिरहेको बताउँछन् । ‘मन्त्रालयले के गरेन ? एउटा परीक्षण नहुने ठाउँमा अहिले कति परीक्षण हुन्छ ? आधा घण्टामा रिपोर्ट आउँछ,’ उनी भन्छन्, ‘आईसीयू, भेन्टिलेटर, अक्सिजन सबै व्यवस्थापन गरेको छ । १०औँ हजार बेडको व्यवस्था गरेका छौँ । चुरो कुरामा जानुपर्छ, सरकारको उछितो काडेर मात्र हुनेवाला केही छैन ।’

याे पनि.....

आईसीयूबाट डाक्टरको अपिल- बाँच्न गाह्रो छ, लकडाउनमा बस्नुस्

अन्तर्वार्ता : ‘कोरोनाले सुनामीको संकेत दियो, लापर्बाहीले हद नाघ्यो’

कोरोना नियन्त्रणकाे तयारी पुगेन, असारसम्म दैनिक ११ हजार संक्रमित पुग्ने प्रक्षेपण

कोरोना संक्रमितले भरिन थाले उपत्यकाका अस्पताल, चिकित्सक भन्छन्- बिरामीले बेड नपाउने खतरा बढ्दै छ

प्रकाशित मिति: मंगलबार, वैशाख १४, २०७८ १०:३०