पुटिनका आलोचक नभाल्नीले तीन हप्ता लामो अनशन तोड्दै

A+ A A-

देशद्रोहको आरोपमा जेल पठाइका भ्लादिमिर पुटिनका आलोचक एलेक्सी नभाल्नीले आफ्नो तीन हप्ता लामो भोक हड्ताल शुक्रबार अन्त्य गर्ने बताएका छन् ।

आफ्नो स्वास्थ्य उपचारका लागि रूसी जनता र विश्व समुदायले रूसी प्रशासनमाथि दिएको दबाबको परिणाम आफूलाई अस्पतालमा लगिएको भन्दै उनले सबैमा हार्दिकता प्रकट गरेका छन् ।

अमेरिकी समाचार संस्था सीएनएनका अनुसार रूसी विपक्षी नेताको बिग्रिएको स्वास्थ्यको कारण उनलाई जेलबाट अस्पतालमा सारिएको केही दिनपछि यो घोषणा भएको हो ।

'देशभर र विश्वभरका असल व्यक्तिहरूको अथाह समर्थनका लागि धन्यवाद, हामीले ठूलो प्रगति गरेका छौं,' नभाल्नीको इन्स्टाग्राम पोस्टलाई उद्धृत गरी ‘द हिल’ ले लेखेको छ ।

उनले भनेका छन्, 'दुई महिनाअघि, उनीहरू (रूसी प्रशासक) मैले केबल स्वास्थ्य उपचारको सहायताको लागि गरेको अनुरोधमा हाँसे र मलाई कुनै औषधि दिएनन् । एक महिनाअघि, मैले मेरो उपचारका लागि गरिएका परीक्षण रिपोर्ट माग्दा ‘हाँसिमजाक’ गरियो । रूसी सरकारलाई मेरो मागप्रति झुकाउन पाएको विश्वव्यापी समर्थनका लागि म सबैमा धन्यवााद ज्ञापन गर्दछु । अहिले मलाई नागरिक चिकित्सकहरूको समूहले दुई पटक जाँच गरिसकेको छ ।'

रूसी समाचार संस्था स्पुत्निकले नाभाल्नीले भोक हड्ताल फिर्ता लिन लागेकोबारेमा जानकारी दिँदै आफ्नो समाचारमा लेखेको छ, 'मैले मलाई हेर्ने छुट्टै चिकित्सकको मागलाई फिर्ता लिएको छैन । मेरो अङ्गमा केही संवेदना हराएको छ र म यो के हो र यसलाई कसरी उपचार गर्ने भनेर जान्न चाहन्छु । यद्यपि प्रगतिलाई ध्यानमा राख्दै यो रोग निदान र सबै परिस्थितिहरूका कारण मैले भोक हड्ताल समाप्त गर्ने निर्णय लिएको छु ।'

आफ्नो नजरबन्दविरुद्ध विरोध प्रदर्शन भएकोमा आफूलाई ‘गर्व र आशा’ महसुस भएको नभाल्नीले बताएका छन् ।

प्रकाशित मिति: शुक्रबार, वैशाख १०, २०७८ २१:०९