नवलपरासीमा थप दुई हिमाली गिद्ध मृत भेटिए, मरेका गिद्धको संख्या ६९ पुग्यो

बुधबारसम्म ६७ वटा गिद्ध मृत भेटिएकाेमा शुक्रबार २ वटा मरेका गिद्ध थपिएका हुन् ।

A+ A A-

नवलपरासीमा विष हालेर मारिएका कुकुर खाई मरेका थप दुईवटा गिद्ध आज फेला परेका छन् । रामग्राम नगरपालिका–४, जितपुरमा हिमाली प्रजातिका थप दुईवटा मृत गिद्ध भेटिएको नेपाल पन्छी संरक्षण संघद्वारा सञ्चालित गिद्ध संरक्षण संघका राष्ट्रिय उपाध्यक्ष यादवप्रसाद खनालले शिलापत्रलाई जानकारी दिए ।

योसँगै जितपुरमा कुकुरको मासु खाएर मर्ने हिमाली गिद्धको संख्या ३३ पुगेको छ भने मरेका गिद्धको कुल संख्या ६९ पुगेको छ । बालीनाली नष्ट गरेको भन्दै केही स्थानीयवासीले १० वटा कुकुरलाई विष हालेर मारेका थिए ।

सिनो खाएकामध्ये गत बुधबारसम्म ६७ वटा गिद्ध मृत भेटिएका थिए ।

ती कुकुरको सिनो खाएकामध्ये गत बुधबारसम्म ६७ वटा गिद्ध मृत भेटिएका थिए । मर्ने गिद्धमा अति संकटापन्न डंगर प्रजाति पनि थियो । यो प्रजातिका ३३ वटा गिद्ध मरेका छन् । यस्तै राजगिद्ध दुईवटा र एउटा सानो खैरो गिद्ध पनि मृत भेटिएका थिए ।

यसअघिकाे समाचार..

जब बाख्रा गोठालाकाे अगाडि उड्दै गरेका गिद्ध खस्न थाले..

हिमाली गिद्ध संकटको नजिक रहेको प्रजाति मानिन्छ । यस्ता गिद्ध चिसो छल्न असोज, कात्तिकमा तराई झर्ने र वैशाखमा फेरि लेकतिरै फर्किने गर्छन् ।

आज भेटिएका मृत गिद्धलाई जिल्ला वन समन्वय समिति नवलपरासीका प्रतिनिधिको रोहवरमा गाडिएको छ । थप दुई गिद्ध मृत भेटिएको खबर पाएपछि प्रकृति संरक्षण कोषका प्राविधिकहरू नुरेन्द्र अर्याल र युवराज ढकाल पनि जितपुर पुगेका थिए ।

मर्ने गिद्धमा अति संकटापन्न डंगर प्रजाति पनि थियो । यो प्रजातिका ३३ वटा गिद्ध मरेका छन् ।

मृत गिद्धको मिर्गाैला, कलेजोलगायत नमुना परीक्षणका लागि चितवनको राष्ट्रिय प्रकृति संरक्षण कोष र खुमलटारको राष्ट्रिय विधि विज्ञान प्रयोगशाला पठाइएको छ । पर्सिसम्म रिपोर्ट आउने बताइएको छ ।

कुकुरलाई विष खुवाउनेबारे छानबिन भइरहेको रामग्राम–४ का वडाध्यक्ष मदन यादवले बताए ।

आफूहरू अहिले मृत गिद्धका बच्चाहरूको उद्धारमा खटिएको गिद्ध संरक्षण संघका उपाध्यक्ष खनालले बताए । ‘माउ गुमाएका बच्चा अब भोकले मर्न सक्छन्’, उनले भने, ‘सामुदायिक वनहरूसँग समन्वय गरी गिद्धका बच्चाको उद्धार गरेर प्रजनन् केन्द्रमा लगेर राख्ने छौँ ।’

प्रकाशित मिति: शुक्रबार, वैशाख १०, २०७८ १७:४६