कर्णालीमा ६ महिनापछि कांग्रेसका जीवनबहादुर शाही मुख्यमन्त्री बन्ने सहमति

कर्णालीमा ६ महिनापछि कांग्रेसका जीवनबहादुर शाही मुख्यमन्त्री बन्ने सहमति

A+ A A-

४ वैशाखमा अविश्वसनीय तरिकाले विश्वासको मत जुटाएका मुख्यमन्त्री महेन्द्रबहादुर शाहीले कांग्रेससँग मुख्यमन्त्री पद भागबण्डा गर्ने सहमति गरेको खुलेको छ । अहिले विश्वासको मत लिएपछि चुनावी सरकारको नेतृत्व कांग्रेसले गर्ने गरी सहमति भएको माओवादी स्रोतले जानकारी दिएको छ ।

६ महिनापछि सरकार फेरबदल गर्ने र त्यतिबेला कांग्रेसका संसदीय दलका नेता जीवनबहादुर शाहीलाई मुख्यमन्त्री बनाउन माओवादी केन्द्रले समर्थन गर्ने सहमति जुटेको हो ।

माओवादीका एक नेताका अनुसार, दुई पार्टीबीच आलोपालो मुख्यमन्त्री हुने सहमतिपछि कांग्रेसले मुख्यमन्त्री शाहीलाई विश्वासको मत दिने निर्णय गरेको हो । केही दिनअघि नै दुई दलबीच सहमति जुटेको भए पनि बैठक सुरु नहुँदासम्म कांग्रेसले सहमतिलाई चुहाएको थिएन । नेता जीवनबहादुर शाहीले पनि सबै सांसदसँग सहमति चुहाएका थिएनन् ।

चैत अन्तिम साता नै दुई दलबीच चुनावी सरकारको नेतृत्व कांग्रेसका संसदीय दलका नेता जीवनबहादुर शाहीले नेतृत्व गर्ने सहमति जुटेको थियाे । माओवादी स्रोतका अनुसार, बढीमा एक वर्षभित्र कांग्रेसका शाहीले मुख्यमन्त्री हुने गरी दुई दलबीच सहमति गरिएकाे हाे ।

एमालेका ४ सांसद निष्कासनमा परेपछि माओवादी र कांग्रेस मिल्दा मात्रै पनि कर्णाली प्रदेशमा बहुमत पुग्छ । माअ‍ोवादीका धर्मराज रेग्मी र एमालेका प्रकाश ज्वाला, कुर्मराज शाही, अम्मरबहादुर थापा र नन्दसिंह बुढाको सांसद पद रिक्त भएपछि कर्णाली प्रदेशसभा ३५ सदस्यीय हुन्छ ।

त्यो हुँदा १८ सांसद हुँदा सरकार निर्माणका लागि बहुमत पुग्छ । माओवादीसँग १२ र कांग्रेससँग छ जना सांसद छन् । त्यो संख्या बहुमतका लागि पर्याप्त हुन्छ । त्यसैले उनीहरूबीच मुख्यमन्त्री आलोपालो गर्ने सहमति जुटेको हो । कांग्रेस नेता शाही भने त्यस्ताे कुनै सहमति नभएकाे दाबी गर्छन् । उनले शिलापत्रसँग भने, 'हामीले त तटस्थ बस्दा सिधै एमालेलाई फाइदा हुने ठानेर मुख्यमन्त्रीलाई सघाएका हाैँ । सरकारमा जाने र आलोपालोकाे कुनै सहमति छैन । त्यस्ताे स्थिति आए खुसी तपाईंहरूसँगै साटाैला नि ।'

माओवादीका नयाँ अनुहारले प्रवेश पाउँदै

पछिल्लो सत्ता समीकरणमा माओवादीभित्रै पनि मन्त्री फिर्ता बोलाउने सहमति जुटेको छ । माओवादीका दुईजना मन्त्री फिर्ता हुने र नयाँ दुई जनालाई मन्त्री बनाउन लागिएकाे हाे । अहिले माओवादीबाट नरेश भण्डारी र विमला केसी मन्त्री छन् । आन्तरिक मामिला तथा कानुनमन्त्री भण्डारी र सामाजिक विकासमन्त्री केसीलाई फिर्ता बोलाएर नयाँ अनुहारलाई पठाउने तयारी भइरहेको छ ।

मन्त्रिपरिषद् पुनगर्ठनमा माओवादीबाट सीता नेपाली, विन्दमान विष्ट र गोपाल शर्मामध्ये दुई जनामन्त्री हुनेछन् । विष्टले माओवादी नेता शक्तिबहादुर बस्नेतको कोटाबाट मन्त्री दाबी गरिरहेका छन् । बस्नेतनिकट विष्ट सुर्खेतका सांसद हुन् । सुर्खेतकै सांसद नेपाली पनि मन्त्रीको दाबीमा छिन् ।

अघिल्लो पटक नै मन्त्री दाबी गरेकी नेपालीलाई पुनर्गठनको चरणमा मन्त्री बनाउने आश्वासन दिइएका कारण अहिले उनकाे सम्भावना अधिक छ । त्यसो त, मन्त्री केसीलाई फिर्ता बोलाएपछि एकजना महिला मन्त्री बनाउनैपर्ने भएकाले सीता नेपालीको नाम चर्चामा आएको हो ।

महिला र दलितको समेत प्रतिनिधित्व गर्ने कारण सुर्खेतबाट मन्त्रीका लागि दाबी गर्ने विष्टका लागि भारी भएकी छिन् । यता, शर्मा भने नेता जनार्दन शर्माको आडमा मन्त्रीको दाबी गरिरहेका छन् । मन्त्रीबाट फिर्ता हुन लागेकी केसी पनि नेता जनार्दन शर्मानिकट छिन् ।

तीन जनाबीच सहमति नजुटेका कारण माओवादीका मन्त्री फेरबदल केही दिन लम्बिएको छ । सत्ता समीकरणबारे धेरै प्रतिक्रिया नदिएकी नेपालीले शिलापत्रसँगको कुराकानीमा आफू मन्त्रीका लागि दाबेदार रहेको मात्रै बताइन् । कर्णाली सरकारमा कांग्रेसबाट भने अहिले एक जना मात्र मन्त्री हुनेछन् । एमालेको माधव नेपाल समूहबाट तीन जना मन्त्री भइसकेका छन् ।

प्रकाशित मिति: आइतबार, वैशाख ५, २०७८ १९:२७