स्थानीय तह : सबैभन्दा धेरै विवाद जग्गामा

फाइल तस्बिर

A+ A A-

स्थानीय तहमा जग्गाका धेरै समस्या आई समाधान गर्न कठिनाइ हुन थालेको जनप्रतिनिधिले गुनासो गरेका छन्। गोकर्णेश्वर नगरपालिका–२ मा अरुको जग्गा मिचेर घर बनाएको भनी धेरै जनाले गुनासो लिएर आएको वडाध्यक्ष कृष्णबहादुर पण्डित क्षेत्रीले बताए । दुई–तीन आना जग्गा लिएर घर बनाउनेले साँध सीमा मिची अरुको जग्गामा घर बनाएको उजुरी आउने क्रम बढेको उनको भनाए छ ।

धादिङ स्थायी घर भएका टेकबहादुर तामाङले दुई वर्षअघि नगरपालिकाको वडा नं. २ नयाँपाटीमा कित्ता नं ६८६ को जग्गा खरिद गरेका थिए । जग्गा किनाउने दलालले पनि सँगै जोडिएको कित्ता लिएका थिए । निजी स्तरका अमिनीले त्यसबेला नापजाँच गरेर किला ठोकिदिएका थिए । केही महिनापछि वरपरका जग्गा धनीले मिचेर दुई आना तीन पैसा जग्गा छैन भन्न थालेपछि आफू अप्ठ्याराेमा परेको उनले गुनासो गरे ।

धेरै जग्गा किनेर खण्डीकरण गरी व्यवसाय गर्दा जग्गा हराउने गरेको वडा कार्यालयले जनाएको छ । यस्ता व्यवसायीले ल्याउने निजी अमिनीले जसले बढी पैसा दियो, त्यतै किला ठोकिदिने गर्दा स्थानीय स्तरमा समस्या आउने गरेको बताइएको छ ।

नापी कार्यालय साँखुका प्राविधिकले जग्गा भएको भनी नापजाँच गरी किला ठोके पनि सँधियारले उक्काइदिएको तामाङले गुनासो गरे । यसैगरी, नगरपालिका–१ मा मीना श्रेष्ठको नाममा रहेको जग्गामा नानीमैया बुढाथोकीले घर बनाउन थालेपछि नगरपालिकाको न्यायिक समितिमा उजुरी पर्यो । नक्सा पास नगरी बनाउन थालिएको घरको काम समितिले रोक्यो ।

राजधानीनजिकको काँठ क्षेत्रमा जग्गा किनबेच भएर घर बन्न थालेसँगै यस्ता समस्या पनि बढ्न थालेको छ । नापी कार्यालयले हाल नापी नगरेको र नापीमा आधुनिक प्रविधि प्रयोगसमेत नगरिएका कारण यस्तो समस्या बढ्ने गरेको हाे ।

नगरपालिकाको न्यायिक समितिमा हालसम्म जग्गाको साँध सीमासम्बन्धी बढी उजुरी दर्ता भएको छ । नगर उपप्रमुख एवं शान्ति नेपाल यस वर्षमात्र समितिमा ९३ वटा उजुरी दर्ता भएकामा ९० प्रतिशतभन्दा जग्गाको सीमा विवादको रहेको बताउँछिन् । जग्गा विवादका समस्या समाधानमै न्यायिक समितिले बढी समय खर्चनुपरेको उनले बताइन् ।

पुस्तौंदेखि मोहीले कमाएको जग्गा थाहा नदिई धनीले चक्लाबन्दी गरेको गुनासो पनि समितिमा दर्ता भएको छ । तीन पुस्ता अघिदेखि कमाउँदै आएको जग्गा मोहीलाई थाहा नदिई धनीले खण्डीकरण गरेको उजुरीमा प्रहरी प्रशासनले केही नगरेपछि न्यायिक समितिको ढोका ढक्ढक्याउन बाध्य हुनुपरेको पीडित शिवप्रसाद पुडासैनीले गुनासो गरे ।

प्रकाशित मिति: शुक्रबार, जेठ ३, २०७६ २२:३५