नेप्सेको सफ्टवेयरमा बारम्बार समस्या आउँँदा लगानीकर्ता मारमा

A+ A A-

नेपाल स्टक एक्सचेन्जले लगानीकर्ताको समस्याको सुनुवाइ गर्न नसक्दा लगानीकर्ता हैरान बनेका छन् । पटकपटक नेप्सेको साइटदेखि सफ्टवेयरको समस्याले आजित बनेका लगानीकर्ताप्रति नेप्से उदासीन बन्दै आएको छ ।

सोमबार पनि नेप्सेको अनलाइन ट्रेडिङ (टीएमएस ) मा समस्या आउँदा लगानीकर्ताले सहज रूपमा करिब ३ लाख लगानीकर्ताले सहजै अनलाइनबाट शेयर कारोबार गर्न सकेनन् । यसअघि पनि पटकपटक सफ्टवेयरको समस्या लगानीकर्तामा नउठेको होइन, तर समस्याको उचित सम्बोधन नियामक निकायले नगर्दा लगानीकर्ताको समस्या सामाधान हुन सकेको छैन ।

सम्बन्धित समाचार

गुणस्तरहीन सफ्टवेयरको असर : शेयरबजारमा लगानीकर्ताको मनोवैज्ञानिक त्रास

सोमबार पनि पाँचवटाभन्दा धेरै ब्रोकरबाट कारोबार गर्नेहरूको टीएमएसमा समस्या देखिएको हो । समस्या देखिएपछि लगानीकर्ताले अनलाइन कारोबार गर्न निकै बेर कुर्नुपर्‍यो ।

लगानीकर्ता रीता पाठकले सफ्टवेयरमा समस्या आँउदा कारोबार सहज रूपमा गर्न नसकेको बताइन् । उनी पछिल्लो समय निरन्तरजसो घरी टीएमएसमा घरी मेरो शेयर र घरी नेप्सेको वेबसाइटमा समस्या आउँदा नेप्सेप्रतिको विश्वास हराउँदै गएको गुनासो गर्छिन् ।

उनी भन्छिन्, 'छिनछिनमा हेरिरहनुपर्छ, के भयो भनेर अझ काराबार गर्नुपर्‍यो भने पनि सजिलै गर्न सकिँदैन । कहिले केको समस्या, कहिले केको, हैरान भइसकेँ ।’

अर्का लगानीकर्ता तिलक कोइराला अनलाइन ट्रेडिङ सिस्टम गुणस्तरीय नहुँदा समस्या झेल्नुपरेको बताउँछन् । उनी भन्छन्, ‘दुई वर्षदेखि नेप्सेको सफ्टवेयरमा प्रश्न उठे पनि समस्या ज्युँका त्युँ छ । नेप्से अझै चुपचाप छ ।’

त्यसो त शेयरबजार कारोबार तथा नियन्त्रण गर्ने जिम्मा पाएको नेप्सेको बारम्बारको लापर्बाहीले शेयरबजार असुरक्षित बन्न थालेको विज्ञहरू बताउँछन् । सेबोन र नेप्सेको कमजोरीका कारण लगानीकर्ताको ३४ खर्ब रुपैयाँबराबरको सम्पत्ति जोखिममा परेको छ ।

यस्तै, समस्याबाट आजित बनेका लगानीकर्ता सेबोन र नेप्सेसमक्ष तारन्तार लिखित, मौखिक गुनासा लिएर धाउँदै आएका छन् । तर, आफ्ना ती गुनासोमा तालुकदार निकायले ठाडो कान पनि नलगाएको उनीहरूको गुनासो छ ।