बेपत्ता भएको एक महिना पुग्न लाग्दा पनि पत्ता लागेनन् झा दम्पती, प्रहरीको दाबीमा स्थानीयको शंका

बेपत्ता भएको एक महिना पुग्न लाग्दा पनि पत्ता लागेनन् झा दम्पती, प्रहरीको दाबीमा स्थानीयको शंका

बेपत्ता भएका झा दम्पती

A+ A A-

१० फागुनमा घरमै सुतिरहेको अवस्थामा ओछ्यानसहित महोत्तरीको पिपरा गाउँपालिका- ५, सोहडबाका ६५ वर्षीय मुसाफिर झा र उनकी पत्नी ५८ वर्षीया गीतादेवी झा सुतिरहेको ओछ्यानबाटै बेपत्ता भएका थिए ।

त्यसयता प्रहरीले उनीहरूको खोज तथा अनुसन्धान गरेको भए पनि एक महिना पुग्नै लाग्दासमेत उनीहरूको अवस्था सार्वजनिक गर्न सकेको छैन ।

झा दम्पतीलाई बेपत्ता पारेको आरोपमा प्रहरीले चार जनालाई पक्राउ गरेको छ । प्रहरीले स्थानीय ५२ वर्षीय रामबाबु यादव, २६ वर्षीय सुरेन्द्र यादव, २४ वर्षीय राजेन्द्र यादव र भारत बिहारको मधुवनी जिल्ला तरैयाका ५० वर्षीय हरेन्द्र ठाकुरलाई झा दम्पती बेपत्ता पारेको आरोपमा पक्राउ गरी सार्वजनिक गरेको हो ।

हरेन्द्र जग्गा कारोबारी हुन् भने सुरेन्द्र र राजेन्द्र रामबाबुका छोरा हुन् । बेपत्ता भएका झा दम्पतीका परिवारले गएको चैत ५ गते पक्राउ परेका अभियुक्तविरुद्ध अपहरण तथा शरीर बन्धक बनाई बेपत्ता पारेको भनी जिल्ला प्रहरी कार्यालय महोत्तरीमा किटानी जाहेरी दिएका थिए ।

प्रहरीले पक्राउ गरी सार्वजनिक गरेका रामबाबु यादव, सुरेन्द्र यादव, राजेन्द्र यादव, हरेन्द्र ठाकुर

शंकाका आधारमा उनीहरूलाई पक्राउ गरी अनुसन्धान गर्दै जाँदा सो घटनामा पक्राउ परेकाहरू अभियुक्त हुने विभिन्न आधार तथा प्रमाण भेटिएको प्रहरीको दाबी छ । गएको ११ फागुनको राति बेपत्ता भएकी मुसाफिरकी श्रीमती गीतादेवी सुतेको खाट तथा खाटमा रहेको दरीमा समेत रगतजस्तो रातो पदार्थ देखिएको थियो । त्यस्तै, कोठाको भुइँको भागमा रगतजस्तो रातो पदार्थ सुकेको अवस्थामा देखिएको थियो ।

मुसाफिर सुत्ने घर कोठाभित्र भुइँमा समेत रगतजस्तै छिटा देखिएको थियो । ती पदार्थ परीक्षण गर्दा मानव रगत नै रहेको पुष्टि भएको र उक्त रगतको छिटा पक्राउ परेका रामबाबुकै घर आँगनअगाडि र घरमा समेत फेला परेको प्रहरीको भनाइ छ । रामबाबुको घरको पश्चिमतर्फको ढोका र घरको कोठाभित्र विभिन्न स्थानमा रगतको छिटा फेला परेको प्रहरीले जनाएको छ ।

महोत्तरीका प्रहरी नायब उपरीक्षक प्रकाश विष्टका अनुसार घटना गराएका व्यक्तिहरूले प्रमाण नष्ट गर्न घरका कोठाहरू पानीले धोइपखाली गरेका थिए । घटनास्थल झाको घरबाहिर आँगनमा घसारिएको जस्तो डामसमेत देखिएको थियो ।

अनुसन्धानका क्रममा शंका लागेका व्यक्तिहरूको पोलिग्राफ गर्दा उनीहरूले झुटो बोलेको पाइएको प्रहरीले बताएको छ । हरेन्द्रले प्लटिङमा पटक-पटक अस्वाभाविक रूपमा मुसाफिरसित कुराकानी गरेको र उनको गतिविधि शंकास्पद रहेको प्राविधिक अनुसन्धानबाट देखिएको र सोही आधारमा आरोपितहरूलाई पक्राउ गरिएको प्रहरी नायब उपरीक्षक विष्टले बताए ।

उनका अनुसार मुसाफिरको हाल बन्दै गरेको पक्की घर रामबाबुले नै बनाएको हुँदा उक्त घरका सम्बन्धमा सम्पूर्ण वस्तुस्थितिका बारेमा उनलाई राम्ररी जानकारी थियो ।

‘जग्गा नबेच्दा झा दम्पतीलाई बेपत्ता पारियो’

जग्गा कारोबारी हरेन्द्रलाई जग्गा नबेचेकै कारण झा दम्पतीलाई बेपत्ता पारिएको प्रहरीले दाबी गरेको छ । जिल्ला प्रहरी कार्यालय महोत्तरीका प्रवक्तासमेत रहेका विष्टका अनुसार भारतीय नागरिक हरेन्द्रसमेतले वडा नम्बर ६ मा पर्ने सोही टोलमा १३ बिघा जग्गामा प्लटिङ गरेका छन् ।

सो प्लटिङको उत्तरतर्फ मुसाफिरको १४ कट्ठा जग्गा छ र सो जग्गाभन्दा उत्तरतर्फ हरेन्द्र ठाकुरको हाल बाटो नभएको २ बिघा जग्गा छ । सो जग्गामा जाने बाटो नभएकाले सस्तोमा जग्गा किनबेच हुँदा जग्गा व्यवसायी हरेन्द्र तनावमा थिए ।

हरेन्द्रको जग्गामा बाटो नभएका कारण उक्त जग्गा खेतको भाउमा बिक्री हुने तर सोही जग्गा बाटो जोडी प्लटिङ गर्दा घडेरीको रूपमा उच्च मूल्यमा बिक्री हुने हुँदा उनीहरूले मुसाफिरलाई जग्गा बेच्न दबाब दिँदै आएका थिए । त्यसैले उनीहरूले मुसाफिरको जग्गाहुँदै बाटो लैजान उनको १४ कट्ठा जग्गा बिक्रि गर्न पटक-पटक दबाब दिएको खुलेको डीएसपी विष्टले बताए ।

तर, मुसाफिरले उक्त जग्गा अहिले कुनै हालतमा नबेच्ने अड्डी कसेका थिए । उनका अनुसार सोसम्बन्धमा कुराकानी र दबाब दिन हरेन्द्रले प्लटिङ गरेको आफ्नो जग्गामा मुसाफिरलाई पटक-पटक बोलाउने गरेका थिए । मुसाफिरका छिमेकी रामबाबुको माध्यमबाट हरेन्द्रले प्लटिङको जग्गा खरिद गरेका थिए जसमा सुरेन्द्र र रामबाबु यादवसमेत साझेदार थिए । सोही जग्गा बिक्री गर्न रामबाबुलेसमेत मुसाफिर तथा उनको श्रीमतीलाई पटक-पटक भनेका थिए ।

प्रहरीको दाबीमा स्थानीयको शंका

जिल्ला प्रहरी कार्यालय महोत्तरीका अनुसार घटनाको भोलिपल्टबाटै प्रहरीले झा दम्पतीको खोजी कार्य जारी राखेको छ । तर, हालसम्म उनीहरूको अवस्था अज्ञात छ । प्रहरीले पक्राउ गरी सार्वजनिक गरेका व्यक्तिहरू घटनामा संलग्न रहेको दाबी गरे पनि झा दम्पतीको अवस्था अझै पत्ता नलागेपछि स्थानीयले प्रहरीको दाबीमाथि नै शंका गर्न थालेका छन् ।

प्रहरीले घटनामा संलग्न रहेको दाबी गरेका आरोपितबाट हालसम्म कुनै ठोस प्रमाण फेला नपारेको र दबाबमा आएर अभियुक्तलाई सार्वजनिक गरेको स्थानीयको भनाइ छ ।

झा दम्पतीलाई अविलम्ब खोजतलास गर्न ४४ वटा संघसंस्थाले दबाबमूलक कार्यक्रम आयोजना गर्दै आएका थिए । सोही दबाबका कारण प्रहरीले ठोस प्रमाण नै नजुटाई ती व्यक्तिहरूलाई सार्वजनिक गरेको स्थानीयले बताइरहेका छन् ।

झण्डै एक महिना अनुसन्धान गरी प्रहरीले बिनाठोस प्रमाणकै चार जनालाई पक्राउ गरी सार्वजनिक गरेको भन्दै स्थानीयले प्रहरीको अनुसन्धानमाथि शंका गरेका हुन् । तर, पक्राउ परेकाहरूले झा दम्पतीलाई मारेको वा बेपत्ता पारेको बारेमा प्रस्ट बयान नदिएकाले भारतलगायत नेपालका विभिन्न शंकास्पद ठाउँमा खोजी भइरहेको प्रहरीले जनाएको छ ।

जिल्ला प्रहरी कार्यालय महोत्तरी तथा २ नम्बर प्रदेश प्रहरी कार्यालय जनकपुरले घटनाको सूक्ष्म अनुसन्धान गरेको र हाल नेपाल प्रहरी केन्द्रीय अनुसन्धान ब्युरो काठमाडौंले घटनाका सम्बन्धमा थप अनुसन्धान गरिरहेको प्रहरी नायब उपरीक्षक विष्टको भनाइ छ ।

अनुसन्धानका क्रममा सूक्ष्म निगरानी, वरपरका घरहरूको तलासी, ५४ वटा साना ठूला पोखरी तथा पानी जमेका खाल्डाहरू, सम्भावित स्थानहरू, नदी, बगैँचा, नहर र पुलसमेतमा प्रहरीले खोजतलास गरेको थियो । तर, पनि झा दम्पतीका सम्बन्धमा प्रहरीले कुनै सुराक पाउन सकेको छैन । भारतीय सीमामा रहेका प्रहरी युनिटहरूसँग समन्वय र प्रविधिको सूक्ष्म अनुसन्धान तथा विश्लेषण गर्दा पनि उनीहरूको अवस्थाबारे पत्ता नलागेको विष्टको भनाइ छ ।

यो पनि :