झा दम्पती बेपत्ता घटना : 'क्लु' नभेटिँदा दबाबमा प्रहरी

बेपत्ता झा दम्पती

A+ A A-

महोत्तरीको पिपरा गाउँपालिका–५ सहोडवाका ६५ वर्षीय मुसाफिर झा र उनकी ६० वर्षीय श्रीमती गीतादेवी बेपत्ता घटना पेचिलो बन्दै गएको छ । घटनासम्बन्धी तथ्य फेला पार्न नसकेकाे प्रहरीमाथि दबाब बढेको छ ।

सोमबार रातिदेखि बेपत्ता झा दम्पतीबारे अनुसन्धानका लागि प्रदेश प्रहरी कार्यालय जनकपुर र जिल्ला प्रहरी कार्यालयकाे टोली खटिएका छन् । तर, अहिलेसम्म ‘क्लु’ भेट्न नसकेको महोत्तरीका प्रहरी नायब उपरीक्षक प्रकाश विष्टले बताए । ‘हामी विभिन्न कोणबाट अनुसन्धान गर्दैछौँ । अहिलेसम्म कुनै तथ्य फेला परेको छैन’, उनले भने ।

विष्टका अनुसार बेपत्ता झा दम्पतीसँग विवाद गरेका व्यक्तिहरूलाई नियन्त्रणमा लिएर प्रहरीले सोधपुछ गरेकाे छ । यसका लागि समातिएका केही व्यक्तिलाई छोडिए पनि जग्गा विवाद भएको भनिएका तीन जनालाई प्रहरीले छाेडेकाे छैन ।

झाकी श्रीमती सुतेकाे खाटमा रगतकाे छिटासमेत देखिएकाे थियाे । दुवै जना सुतेको ओछ्यान तथा झुलसमेत कोठामा नरहेको मुसाफिरका सालो गुलाब झाले बताए ।

मुसाफिरका दुई बुहारी तथा पाँच नातीनातिना छन् । स्थानीयका अनुसार करिब एक वर्षअघि मुसाफिरका जेठा छोराले पैसासम्बन्धी घरायसी विवादमा आत्महत्या गरेका थिए । तर, प्रहरीलाई जानकारी नै नदिई गुपचुप तरिकाले उनको अन्तिम संस्कार गरिएको थियो ।

अर्का छोरा भने कामको सिलसिलामा भारतमा बस्दै आएका छन् । गुलाबका अनुसार प्रहरी अनुसन्धानमा खटिएको तालिमप्राप्त कुकुर गीता र मुसाफिर सुतेकाे कोठा हुँदै घरछेउमै रहेको पोखरीसम्म पुगेको थियो । प्रहरीले अनुसन्धानको क्रममा जाल बिछाएर उनलाई खोजे पनि नभेटेको स्थानीयवासी बताउँछन् ।

प्रहरीसँगै खेतबारी तथा चारैतिर मंगलबार स्थानीयवासी पनि खोजीमा खटिएका थिए । झा मालपोत कार्यालयबाट अवकाश पाएका कर्मचारी हुन् । यही कारण जग्गा कारोबारीसँग उनकाे बारम्बार सम्पर्क तथा काम हुने गरेकाले प्रहरीले त्यही पाटोलाई जोड दिएर अनुसन्धान गरिरहेको एक प्रहरी अधिकृतले बताए ।

'भूमिसुधार कार्यालयका कर्मचारीसँग उनको राम्रो चिनजान रहेछ । जग्गा पास गराउने वा त्यससँग सम्बन्धित अन्य कुनै लफडा पर्दा जग्गा कारोबारी वा गाउँका अन्य व्यक्ति उनलाई लिएर जाँदा रहेछन्’, ती प्रहरी अधिकारीले भने ।

अदालतमा विचाराधीन रहेको मोहीसम्बन्धी एक मुद्दामा झा दम्पती साक्षीसमेत बसेका थिए । तिनै जग्गाधनीसँग केही दिन पहिले झा दम्पतीको विवाद भएकाे बताइएकाे छ ।

मुसाफिरका भाइ विजयकान्त झाका अनुसार मोही रामजी झाको पक्षमा उनले भूमिसुधार तथा अदालती प्रक्रियामा सहयोग गरिरहेका थिए । मंगलबार फैसला आउने दिनअघि सोही कारणले उनलाई उठाइएको हुनसक्ने मुसाफिरका आफन्तकाे आशंका छ ।

तर, गुलाब भने यसमा विश्वास गर्दैनन् । भन्छन्, ‘साक्षी बयान दिँदैमा त्यो जग्गा रामजीकै भैहाल्थ्यो भन्ने हाेइन । त्यही एउटा कारणले यो घटना भएको भन्ने मलाई लाग्दैन ।’

जग्गासम्बन्धी अर्काे एक मुद्दामा मुसाफिर र अर्का व्यक्तिबीच पनि विवाद चल्दै आएको थियो । मुसाफिरबाट मुसहरी टोलमा जग्गा किनेका व्यक्तिले आफ्नो नाममा जग्गा नामसारी गरिदिन भन्दै घर आएको र सोही क्रममा मुसाफिर र उनकी पत्नीसँग झगडा परेको विजयकान्तले बताए । ‘जग्गा किन्ने मानिसले पूरा पैसा चुक्ता नगरी जग्गा पास गरिदिन भनेर घरमा झगडा गर्न आएका थिए तर पूरा पैसा नदिउन्जेल भाउजुले जग्गा पास नगरिदिने जवाफ दिनुभएको थियो’, उनले भने ।

स्थानीयका अनुसार गाउँमा झाले लाखौँ रुपैयाँ ऋण लगानीसमेत गरेका छन् । त्यसैले लेनदेनसम्बन्धी विवादकाे पनि आशंका गरिएकाे छ ।

प्रकाशित मिति: बिहीबार, फागुन १३, २०७७ ०७:०३