झा दम्पती बेपत्ता प्रकरण : ३० जनाभन्दा बढी पक्राउ गर्दा पनि प्रहरीले भेट्टाएन 'क्लू'

झा दम्पती बेपत्ता प्रकरण : ३० जनाभन्दा बढी पक्राउ गर्दा पनि प्रहरीले भेट्टाएन 'क्लू'

मुसाफिर झा र उनकी पत्नी

A+ A A-

१३ दिनदेखि बेपत्ता भएका महोत्तरीको पिपरा गाउँपालिका–५ सोहडबाका झा दम्पती फेला पार्न प्रहरीलाई हम्मे–हम्मे परेको छ । ६५ वर्षीय मुसाफिर झा र उनकी पत्नी ओछ्यानबाटै बेपत्ता भएका थिए । सो प्रकरणमा प्रहरीले अझैसम्म कुनै ‘क्लू’समेत भेट्टाउन सकेको छैन ।

सुतेको ओछ्यान, डसना, सिरानी र झुलसहित बेपत्ता भएका उनीहरुको अवस्था हालसम्म अज्ञात छ । महोत्तरीका प्रहरी नायब उपरीक्षक प्रकाश विष्टका अनुसार खोजबिनको क्रममा १४ फागुनमा झाको घर नजिकैको पोखरीबाट दुईवटा झुल फेला परेको थियो । त्यसबाहेक अरु कुनै सामग्री प्रहरीले फेला पार्न सकेको छैन ।

उनीहरुको हत्या गरी पोखरीमा फालेको हुनसक्ने आशंकामा प्रहरीले दर्जनौँ पोखरीमा डुंगा र जाल बिछ्याएर सर्च अपरेसन चलाएको विष्टले बताए । विष्टका अनुसार विभिन्न ठाउँमा खाल्डो खनेरसमेत उनीहरुको खोजीकार्य भइरहेको छ ।

‘घटनास्थलको आसपासका १० किलोमिटरको वरिपरि भएका अधिकांश पोखरीमा पनि खोज्यौँ । शंका लागेको ठाउँ–ठाउँमा खनेर पनि खोजेका छौँ । तर, झुलबाहेक केही पनि भेटिएको छैन,’ उनले भने, ‘फरक–फरक पाटोबाट टेक्निकल कुराहरु पनि हेर्दैछौँ । कन्टयाक्ट र कल ट्रेसिङलगायतका काम पनि भइरहेको छ ।’

अनुसन्धानको क्रममा प्रहरीले हालसम्म ३० जनाभन्दा बढीलाई पक्रेर सोधपुछ गरेको छ भने तीमध्ये चारजनालाई हिरासतमा राखिएको छ । बेपत्ता दम्पतीका छिमेकीसमेत रहेका जग्गा व्यवसायी रामबाबु यादव, भारतीय नागरिक हरेन्द्र ठाकुरसहित ४ जनालाई जिल्ला प्रहरी कार्यालयमा राखिएको छ ।

हिरासतमा राखिएका चारै जनाको पोलिग्राफ टेस्टसमेत गरिएको छ । जसमा पक्राउ परेका हरेन्द्र र रामबाबुले कतिपय कुरा झुट बोलेको पाइएको प्रहरीले जनाएको छ ।

बेपत्ता भएकी गीता सुतेको खाट र उनको घरदेखि झन्डै १५ मिटर परसम्म रगतका छिटा देखिएका थिए । दुवै रगतका नमुना परीक्षणका लागि काठमाडौं लागिएको छ । त्यसको रिपोर्ट आउन बाँकी रहेको प्रहरी नायब उपरीक्षक विष्टले बताए ।

यस्तै मुसाफिर सुतेका कोठाअगाडि उनलाई घिसारेर लगिएको चिनो देखिएको थियो । रगतका छिटा र यतिका दिनसम्म दुवै जनाको अत्तोपत्तो नहुँदा मृत्यु वा हत्या भएको हुनसक्ने प्रहरीको अनुमान छ ।

नौलो र चलाखीपूर्ण ढंगलले घटना घटाइएकाले अनुसन्धानमा ढिलाइ र सफलता मिल्न गाह्रो भइरहेको प्रहरी अधिकारीहरु बताउँछन् । बेपत्ता भएका मुसाफिर झा करिब दश वर्षअघि मालपोत कार्यालय सर्लाहीबाट अवकाश पाएका पूर्वकर्मचारी हुन् । त्यसैले उनले गाउँघरमा जग्गासम्धी कारोबार हुँदा कर्मचारीसँग समन्वयकारी भूमिका निर्वाह गर्दै आएको परिवारका सदस्य बताउँछन् ।

घटना हुनुअघि उनी लोहरपट्टी नगरपालिका बगराका रामजी यादव र ईश्वर यादवबीचको मोहीसम्बन्धी जग्गा विवादमा रामजीको पक्षमा भूमिसुधार मन्त्रालय, अदालत तथा मालपोतमा काम गरिरहेका थिए । झा बेपत्ता भएकै दिन सो विवाद महोत्तरी जिल्ला अदालतमा सुनुवाइका लागि पेशी तोकिएको थियो ।

त्यस्तै केही दिनअघि आफूले बेचेको १० धुर जग्गाको सबै पैसा चुक्ता नगरी आफ्नो नाउँमा जग्गा गरिदिन दबाब दिँदै आएकाले अर्का व्यक्तिसँग पनि मुसाफिरको विवाद भएको थियो ।

‘उसले अझै पैसा दिइसकेको छैन । केही पैसा दिन बाँकी थियो । त्यो रुपैँया ऋण भनेर तमसुक कागज बनाएर मेरो नाउँमा जग्गा पास गरिदिनु भन्दै केही दिनअघि त्यो जग्गा किनेका मान्छेले झगडा गरेर गएका थिए,’ मुसाफिरका छोराले भने ।

यी दुवै घटनालाई जोडेर अनुसन्धान गर्दासमेत प्रहरीले कुनै क्लू नभेटेको प्रहरी नायब उपरीक्षक विष्टको भनाइ छ । झा दम्पती फेला नपर्दा परिवारसँगै सोहडबा गाउँका स्थानीय त्रसित छन् ।

प्रकाशित मिति: सोमबार, फागुन २४, २०७७ ०९:००