यस कारण नेप्से सूचक निरन्तर घटिरहेको छ

A+ A A-

शेयरबजार पछिल्लो अढाई महिनादेखि निकै उत्साहजनक थियो । लगानीकर्ता पनि आक्रामक रूपमा बढिरहेका थिए । अझ शेयरलाई स्थानीयको पहुँचमा पुर्‍याउन प्रमुख भूमिका खेलेको निफ्राका कारण पनि शेयरबजारमा लगानीकर्ताकाे उपस्थिति बाक्लै थियो ।

लगानीकर्ताकाे त्यो उपस्थितिलाई जंगिएको बुलले थप उक्साउँदै स्वागत पनि गर्‍यो । तर, त्यसको केही दिन नबित्दै सूचक लगातार तीव्र गतिमा ओरालो लाग्दा उत्साहका साथ बजारमा पसेका नयाँ लगानीकर्तामा मनोवैज्ञानिक त्रास सुरु भएको छ ।

पछिल्लो सात दिनमा नै नेप्से १ सय ८१ अंकले तल झरिसकेको छ । सूचक बढेर २६३६ विन्दुमा पुग्दा हौसिएका लगानीकर्ता बजार ओरालो लाग्दा निराश बन्न थालेका छन् । गत हप्ताको आइतबारदेखि नै निरन्तर ओरालो लाग्दा २६३६ उच्चतम विन्दु कायम गरिसकेको नेप्से ओर्लिएर २४४७ को विन्दुमा पुग्यो । यसरी ओरालो लागेको बजार करेक्सन भएको हो कि चलखेल भइरहेको छ भन्ने प्रश्न अहिले आमलगानीकर्तामा देखिन्छ ।

अहिले जानेबुझेका अनुभवी लगानीकर्ता तथा विज्ञहरू बजारमा ठूलो अंकले सूचक बढेकाले लगानीकर्ता प्रोफिट बुक गर्नतर्फ लाग्दा बजार राताम्मे बनेको बताइरहेका छन् । उनीहरूका अनुसार बजारमा मूल्य बढ्दा बेच्ने र घट्दा किन्नेहरूको घुइँचो लाग्नु शेयरबजार विशेषता नै हुनाले करेक्सनलाई बजार घट्यो भनेर अत्तालिनुपर्ने कारण बनाउनु मूर्खता रहेको बताउँछन् ।

तर अहिलेको बजारको अस्थिर स्थितिलाई लिएर भने विज्ञहरू अन्योल देखिन्छन् । कोही बजार घट्ने अनुमान गरिरहेका छन् भने केही लगानीकर्तालाई धैर्य बन्न आग्रह गर्दै आएका छन् । पर्ख र हेरको नीति नै शेयरबजारको मूल मन्त्र मान्ने लगानीकर्ताहरू भने लगानीकर्तालाई त्रसित नहुन आग्रह गर्दै आएका छन् ।

यस्तो छ पछिल्लो सात दिनको तथ्यांक

पछिल्लो ७ दिन अर्थात् गत आइतबारदेखिको तथ्यांक हेर्ने हो भने नेप्से सूचक १ सय ८१ अंकले तल ओर्लिएको छ । गत साताको आइतबार २६४० दशमलव ३४ अंकमा रहेको नेप्से सोमबार घटेर २६०७, मंगलबार २५८६५ दशमलव ६७, बुधबार २५९९ दशमलव ०७ र बिहीबार २५५४ दशमलव १३ अंकमा नेप्से पुगेको छ ।

त्यस्तै, यो साताको आइतबार अर्थात् १७ फागुन आइतबार ७९ अंकले घटेर नेप्से २४४७.३९ अंकमा पुग्यो । सोमबार भने बजार सुधारिँदै २५१५ अंकमा नेप्से उक्लियो । र, आज मंगलबार पनि नेप्से ५९ दशमलव ७० अंकले घटेर २४५५ दशमलव ३३ अंकमा पुगेको छ । समग्रमा सात दिनको बजारमा १ दिन बजार थोरै अंकले उचालियो भने बाँकी छ दिनसम्म बजार निरन्तर तल झर्‍यो ।

६६ दिनको तथ्यांक

पछिल्लो सात दिनको मात्रै तथ्यांकलाई हेर्ने हो भने पनि शेयरबजारमा भारी अंकको ह्रास देख्न सकिन्छ । तर, पछिल्लो सात दिनको तथ्यांकलाई नहेरेर समग्र पछिल्ला ६६ दिनको तथ्यांक हेर्ने हो भने लगानीकर्तालाई खासै पेनिक बनाउन सक्दैन । किनभने पछिल्ला ६६ दिनमा मात्रै नेप्से ८ सय ४८ अंकले बढिसकेको छ । अर्थात् ५ मंसिरमा १७८८ विन्दुमा रहेको नेप्से ६ फागुनमा आइपुग्दा २६३८ अंकमा आइपुगेको तथ्यांक छ । त्यसपछि लगातार घटबढ हुँदै मंगलबार नेप्से २४४५ अंकमा पुगेको छ ।

यस्ता छन् बजार घट्नुका कारण

सात दिनदेखि घटेको नेप्से सूचकका बारेमा लगानीकर्ता तथा शेयरबजार विज्ञहरू विभिन्न कारणलाई औँल्याउँछन् । जस्तो झण्डै अढाई महिना बजार बढ्दा लगानीकर्ताहरू नाफा बुक गर्न लागेकाले पनि त्यसको प्रभाव बजारमा देखिएको छ । ६६ दिनसम्म बजार बढ्दा हौसिइरहेका लगानीकर्ता बजार बढेर २६ सय अंक पार गरेपछि नाफा बुक गरेर बाहिरिन सुरु गरे । जसले गर्दा नेप्से इन्डेक्स निरन्तर घट्न पुग्यो ।

त्यस्तै, नेप्सेको सफ्टवेयरमा आएको समस्याले लगानीकर्ताको विश्वासलाई धराशयी बनाउन पुग्यो । नेप्सेको सफट्वेयरमा समस्या आउँदा सर्वाधिक कारोबार भइरहेको नेपाल इन्फ्रास्ट्रक्चर बैंकको शेयरमूल्य शतप्रतिशतले घटेको तथा अन्य कम्पनीको कारोबार पनि लामो समयसम्म समस्याग्रस्त बन्दा नियामक निकाय नेप्सेप्रतिको लगानीकर्ताको विश्वास धरमराउन पुग्यो । यसले लगानीकर्ताको मनोविज्ञान कमजोर बनायो र त्यसको असर बजारमा देखा पर्‍यो ।

शेयरबजार विश्लेषक विष्णु बस्याल बजारमा लगानीकर्ताको मनोविज्ञान कमजोर बनाउन अनावश्यक हल्ला फिजाइँदा पनि नेप्से घटेको बताउँछन् । बजार घटेको भन्दा पनि करेक्सन भएको हुनाले लगानीकर्ता आत्तिनुपर्ने अवस्था नरहेको उनको भनाइ छ । उनी भन्छन्, ‘करेक्सन हुनु परेन र ? यत्रो चलेको बजारमा यति करेक्सन त स्वाभाविक हो नि । सधैँ बजार बढ्छ । बढ्नुपर्छ भन्ने हुन्छ र ?’

त्यसो त लगानीकर्ता हरि ढकाल पनि बजारमा घटबढ स्वाभाविक भए पनि लगानीकर्ताको मनोबल खस्काउने समूह नै लागिपर्दा त्यसको असर बजारमा देखिएको बताउँछन् । अनावश्यक बजारमा हल्ला फैलिनु, बैंकिङ तरलता अभावको गलत अफवाह र नयाँ लगानीकर्तामा उचित ज्ञान नहुँदा पनि बजार घट्नुको प्रमुख कारण बनेको उनको भनाइ छ ।

योसँगै नेप्सेको सफ्टेवयरमा लापरबाही गर्दा प्राविधिक समस्या उत्पन्न हुँदा लगानीकर्ताको विश्वास धरमराउँदा बजार घट्न टेवा पुगेको लगानीकर्ता ढकालको बुझाइ छ ।

‘करेक्सन सामान्य हो । तर, अहिले बजारमा विज्ञको नाममा बजार घट्ने बढ्ने भन्दै अफवाह फैलाउन समूह नै लागिपर्दा त्यसको प्रभाव बजारमा देखिन थालेको हो । यद्यपि लगानीकर्ता संयमित हुने हो भने पुनः बजार बढ्न सुरु गर्छ । यो कुनै ठूलो कुरा नै होइन ।’

गुणस्तरहीन सफ्टवेयरको असर : शेयरबजारमा लगानीकर्ताको मनोवैज्ञानिक त्रास

अफवाहमा नलागौँ, यस कारण शेयर वुलिस ट्रेण्डमै छ

नेप्से बढ्दा पनि शेयरबजारमा चलखेल हुन सक्छ, यसरी जोगिनुस्

प्रकाशित मिति: मंगलबार, फागुन १८, २०७७ १८:२४