बालाजुका सडक विस्तारपीडित भन्छन्, ‘हामीमाथि राजनीतिक प्रतिशाेध साधियाे’

A+ A A-

काठमाडौंको बालाजुमा सरकारले निजी सम्पत्तिमाथि डोजर चलाएर आफूहरूमाथि राजनीतिक प्रतिशोध साधेको पीडितहरूले बताएका छन् । सर्वोच्च अदालतको आदेशसमेत बेवास्ता गर्दै सरकारले पूर्वाग्रही बनेर आफूहरूको सम्पत्तिमा डोजर चलाएको पीडित संघर्ष समितिका सदस्य श्यामकृष्ण मानन्धरले बताए ।

‘हामीले वर्षौपहिले सरकारी निकायसँग सिफारिस लिएरै घर बनाएका हौँ, कानूनी रूपमा हामी माथि छौँ’, उनले भने ‘राजनीतिक कारण हाम्रो घर भत्काइँदैछ ।’

स्थानीय केही नेताले आफूलाई भोट नदिएका र आफूइतर खेमाका स्थानीयलाई उठीबास गराउन खोजेको उनको आरोप छ ।

बालाजु बाइपासमा सरकारको बलजफ्तीको विरोधमा रहेको प्रगतीशील नागरिक मञ्चका अध्यक्ष रवीन्द्रकुमार श्रेष्ठले आफ्नै नागरिकमाथि सरकारको बल प्रयोगले बदनियत प्रस्ट पारेको बताए । ‘शान्तिपूर्ण प्रतिरोध गर्दा पीडित संघर्ष समितिका आठ जनालाई पक्राउ गरिएको छ । बाक्लै प्रहरीसहित डोजर छिराइएको छ’, उनले भने ।

आज बिहानै काठमाडौं महानगरपालिकाले बालाजु बाइपासमा डोजर छिराएको छ । बाइसधाराभन्दा माथि दुई वटा डोजरले सडक सम्याइरहेको स्थानीय शोभा शाहीले बताइन् । उनका अनुसार यसको विरोध गरेका एकजनालाई पक्रेर प्रहरीले उनकै घरमा लगेर थुनिदिएको छ । अहिले सो क्षेत्रमा बाक्लो संख्या प्रहरी परिचालन गरिएको छ ।

कसैलाई पनि उनीहरूको सहमतिबिना बसिरहेको ठाउँ वा घरबाट हटाउन नपाइने सर्वोच्च अदालतको आदेश बेवास्ता गर्दै सरकारले बालाजु बाइपास घर, टहरा हटाउन बल प्रयोग गरेको हो ।

महानगरपालिकाले सात वर्षयता बल प्रयोग गरी ४९ घर, टहरा भत्काइसकेको छ । सडक विस्तारका नाममा अन्यायपूर्ण तरिकाले विस्थापित गराइएको भन्दै पीडितहरूले विरोध प्रदर्शन गर्दै आएका छन् । यस क्रममा पीडित संघर्ष समितिका आठ जना अभियन्तालाई तीन दिनअघि पक्रेर प्रहरीले हिरासतमा राखेको छ ।

सडक विस्तारको नाममा काठमाडौंका आदिवासी नेवारलाई विस्थापित गरिएको र सभ्यताको समेत विनास भइरहेको श्रेष्ठले बताए । सूचना केन्द्र बनाउने भन्दै महानगरले यसरी आफ्नै नागरिकमाथि बल प्रयोग गरेको हो ।