सेयरबजारमा मौद्रिक नीति समीक्षाको प्रभाव, अधिकांश लघुवित्त कम्पनीमा सर्किट

सेयरबजारमा मौद्रिक नीति समीक्षाको प्रभाव, अधिकांश लघुवित्त कम्पनीमा सर्किट

A+ A A-

सोमबार ९२ अंकले नेप्से बढ्दा लघुवित्त समूहका कम्पनी चम्किएका छन् । कारोबारमा आएका ११ वटा लघुवित्तको सकारात्मक सर्किट लागेको छ भने २६ वटा लघुवित्त सर्किट नजिक पुगेका छन् ।

सोमबार एकाएक लघुवित्त समूह चम्किनुमा भने आइतबार आएको मौद्रिक नीतिको अर्धवार्षिक समीक्षा नै हो ।

मौद्रिक नीतिमा लघुवित्तहरूको सेयर खरिद बिक्रीमा वाणिज्य बैंक तथा विकास बैंकहरूलाई कडाइ गर्ने कुराले यस उपसमूहको परिसूचक खासै बढ्न सकेको थिएन । तर, समीक्षामा त्यस्तो कुनै व्यवस्था नभएपछि आज लघुवित्त कम्पनीहरूको सेयर मूल्यमा उछाल आएको हो ।

आइतबार कारोबारमा आएका २ सय ५ कम्पनीको २ करोड २४ लाख ४७ हजार १ सय ५७ कित्ता सेयर १० अर्ब ३८ करोड ४१ लाख ९७ हजार ६ सय ६९ रुपैयाँमा खरिदबिक्री भएको छ । कारोबार रकम, कारोबारमा आएका सेयर संख्यासँगै बजार पूँजीकरणले पनि नयाँ उचाइ लिएको छ । आज बजार पूँजीकरण ३५ खर्ब ६३ अर्ब ३९ करोड रुपैयाँमा पुगेको हो ।

मौद्रिक नीतिले सेयर धितोकर्जामा कुनै परिवर्तन नगर्ने तथा कडाइ चैतसम्म नहुने भएपछि आज अधिकांश समूहमा हरियाली छाएको छ भने सेयर मूल्य बढाउन पनि अधिकांश कम्पनी सफल बनेका छन् ।

आइतबार गभर्नर अधिकारीको खण्डन पश्चात हौसिएको लघुवित्त समूहको एकैदिन ८.७४ प्रतिशत अर्थात् ३ सय ७९ दशमलव ३ अंकले सूचक बढेको हो ।

उपसूचक बढेसँगै छिमेकी लघुवित्त विकास बैंक, ग्रामिण लघुवित्त विकास बैंक, मिथिला लघुवित्त विकास बैंक, किसान लघुवित्त विकास बैंक, एनएमबी माइक्रोफाइनान्स वित्तीय संस्था, आरएसडीसी लघुवित्त, उन्नती सहकार्य लघुवित्त, सामुदायिक लघुवित्त वित्तीय संस्था,आशा लघुवित्त वित्तीय संस्था र स्वाभिमान लघुवित्त वित्तीय संस्थाको सेयर मूल्यमा उछाल आउँदा सकारात्मक सर्किट लागेको छ ।

योसँगै विजय लघुवित्त संस्था, डिप्रोस्क लघुवित्त वित्तीय संस्था, ग्लोबल आइएमई लघुवित्त संस्था, मेरो माइक्रोफाइनान्स वित्तीय संस्था, सारथि नेपाल लघुवित्त वित्तीय संस्था, समिट लघुवित्त वित्तीय संस्था, स्वाबलम्बन लघुवित्त वित्तीय संस्था, आरम्भ चौतारी लघुवित्त सस्था, गुराँस लघुवित्त वित्तीय संस्था, सबैको लघुवित्त वित्तीय संस्था, लक्ष्मी लघुवित्त वित्तीय संस्था, सूर्योदय लघुवित्त, महुली सामुदायिक लघुवित्त, सर्पोट माइक्रोफाइनान्स, मिर्मिरे माइक्रोफाइनान्स, इन्फिनिटी लघुवित्त, गणपति माइक्रोफाइनान्स, निर्धन उत्थान लघुवित्त, फस्ट माइक्रोफाइनान्स, नेरुडे लघुवित्त, सिभिल लघुवित्त कम्पनीको ९ प्रतिशतभन्दा बढीले सेयर मूल्य बढेर सर्किट नजिक पुगेको छ ।

लघुवित्तको सर्वाधिक सेयर मूल्य बढेसँगै कारोबार संख्यामा आक्रामक देखिएको छ । आज सबैभन्दा धेरै लघुवित्त कम्पनीको नै कारोबार भएको छ ।

आइतबार दोहोरो अंकले घटेको बजार सोमबार भने प्रि-ओपन सेसनबाट तीव्र गतिमा उकालो लागेको थियो । आजको प्रि-ओपन सेसनमा २५ अंकले नेप्से बढेको थियो भने कारोबार सुरु भएसँगै नेप्से सूचक निरन्तर उकालो लाग्यो ।

प्रकाशित मिति: सोमबार, फागुन ३, २०७७ १६:१४