सरकारले घोषणा गरेको निर्वाचनलाई कुनै माइकलालले रोक्न सक्दैन : मन्त्री श्रेष्ठ

सरकारले घोषणा गरेको निर्वाचनलाई कुनै माइकलालले रोक्न सक्दैन : मन्त्री श्रेष्ठ

A+ A A-

शिक्षा, विज्ञान तथा प्रविधिमन्त्री कृष्णगोपाल श्रेष्ठले सरकारले घोषणा गरेको निर्वाचनलाई कुनै माइकलालले पनि रोक्न नसक्ने ठोकुवा गरेका छन् । काठमाडौं महानगरपालिका–१४ खड्का गाँउमा निर्माण सम्पन्न भएको खानेपानी परियोजना शिलान्यास गर्दै मन्त्री श्रेष्ठले यस्तो बताएक हुन् ।

सबै दल आन्दोलनको नाममा घरदैलौ अभियान भन्दै गाउँगाउँमा चुनाव प्रचारमा लागिसकेको जिकिर गर्दै मुलुक चुनावमय भइसकेको उनले बताए । उनले मुलुकलाई थप विकासको गतिमा लैजाने निर्वाचन अपरिहार्य भएकोले सरकारले आगामी १७ र २७ वैशाखमा निर्वाचनको मिति घोषणा गरिसकेको दोहोर्‍याए ।

उनले यो सरकारले दर्जनौँ गौरबका योजना सम्पन्न गर्दा पनि काम गर्न नसकेको आरोप लगाउनु मुर्खता भएको बताउँदै अधिकांस आयोजना यही सरकारले पूरा गरेको दाबी गरे ।

'तपाईंहरू हेर्नुस् रानीपोखरी बन्यो, धरहरा बन्दैछ, देशका दुई ठूला अन्तर्राष्ट्रिय विमानस्थल तयार भए, पाइपलाइनबाट तेल आउन थालिसक्यो, रेल सञ्चालन अन्तिम तयारीमा पुगेको छ, ठाउँ ठाउमा सुरुङमार्ग निर्माण भइरहेका छन् भन्नुस् त यो काम कस्ले गर्‍यो ? सबै यही सरकारको प्रगति हो' उनले भने ।

उनले देशका १ सय ६५ निर्वाचन क्षेत्रमध्ये आफ्नो क्षेत्रमा विकासको लहर ल्याउन सफल भएको दाबी गर्दै उनले भने, 'मैले गरेको विकास मेरो पार्टीको लागि मात्रै होइन, सबै जनता सबै पार्टी र मेरो निर्वाचन क्षेत्रको लागि हो ।'

आज आयोजित कार्यत्रममा मन्त्री श्रेष्ठ, काठमाडौं-९ का प्रदेश सांसद डा अजयक्रान्ति शाक्यले खानेपानी परियोजनाको शिलान्यास गरेका थिए । मन्त्री श्रेष्ठले स्थानीय जनताको घरको धारा खोलेर खानेपानीको शुरुवात गरेका थिए । उनले स्थानीयवासीको मागअनुसार खानेपानी परियोजना सञ्चालन हुँदा आफूलाई खुसी लागेको बताए

कार्यक्रममा सांसद शाक्यले सबैको सहयोगको कारण महत्वाकांक्षी परियोजना सफल भएको बताए । उनले भने, 'यो कुनै दलले मात्र नभएर सबैको सहयोगको कारण खानेपानी परियोजना सफल भएको हो, यसमा सबै जनताको साथ र सहयोग छ ।'

कार्यक्रममा खड्कागाउँ खानेपानी उपभोक्ता समितिका अध्यक्ष श्रीहरि खड्काले संघीय स्थानीय पूर्वाधार विकास साझेदारी कार्यक्रमअन्तर्गत ५० लाख, प्रदेश साझदारी कार्यक्रमअन्तर्गत १ करोड ५० लाख, जनस्तरबाट १ करोड २५ लाख र काठमाडौ महानगरपालिकाको १० लाख रुपैयाँ लागतमा परियोजना सम्पन्न भएको जानकारी गराए । सो परियोजना सम्पन्न हुन करिब ५० लाख लाग्ने समितिका अध्यक्ष खड्काले बताए । परियोजनाअन्तर्गत हाल ८ सय ९० घरधूरीमा खानेपानी वितरण भइसकेको छ ।

प्रकाशित मिति: शुक्रबार, माघ १६, २०७७ १५:३५