ओलीले झूठमाथि झूठ बाेले, पार्टीका पत्रकारसामु स्वतन्त्र पत्रकारकाे हुर्मत लिए

ओलीले झूठमाथि झूठ बाेले, पार्टीका पत्रकारसामु स्वतन्त्र पत्रकारकाे हुर्मत लिए

प्रधानमन्त्री केपी ओली । तस्वीरः रासस

A+ A A-

कामचलाउ प्रधानमन्त्री केपी ओलीले आफूइतरका नेताको आलोचना गर्दा बारम्बार ‘झूठ’को साहारा लिन थालेका छन् । उनले झूठाे सूचनाका आधारमा नेकपा माधव–प्रचण्ड समूहका नेता भीम रावलबारे फेरि टिप्पणी गरेका छन् ।

उनले भीम रावलको नाम नलिई यसअघि नै रावलले खण्डन गरिसकेको समाचार प्रसङ्ग उप्काएका हुन् ।

बिहीबार आफूनिकट नेकपाको प्रेस संगठन दोस्रो राष्ट्रिय भेलामा ओलीले भने, ‘भर्खरभर्खर डा. लेख्न थालेकाले अस्ति भाषण गरेछन्, केपी ओलीले महिलाको किड्नी राखेका छन्, त्यसकारण दिमाग खुस्क्यो भनेर । महिलामाथि कत्रो अपमान ! लेख्या छन् डा, केमा लेख्या था छैन । के विषयको डा हो था छैन । डा लेख्या छ तर केपी ओलीको दिमागले काम गर्दैन अरे । किनभने किड्नीचाहिँ महिलाको राखेको छ । मैले एउटा किड्नी राख्दा त काम गर्दैन भने दुइटै किड्नी भएका महिलाहरूको दिमागले त काम नगर्ने भयो ।’

उनले नेता रावललाई नै भनेका हुन् । किनकि, गत चैत पहिलो साता रावलले विद्यावारिधि उपाधि प्राप्त गरेका थिए । रावल त्रिभुवन विश्वविद्यालयबाट नेपालमा राजनीतिक हिंसा र माओवादी द्वन्द्व अर्थात् ‘पोलिटिकल भाइअलन्स एण्ड दि माओइस्ट इन्सर्जेन्सी इन नेपाल’मा विद्यावारिधि हुन् ।

पुस दोस्रो साता नेता रावलको भनाइ भन्दै एक अनलाइनले ‘ओलीको शरीरमा स्त्रीको अङ्ग मिसिएको हुँदा दिमागले काम गरेन’ शीर्षकमा असत्य खबर सम्प्रेषण गरेको थियो । क्षणिक वाहवाही लुट्ने सस्ताे मनसायबाट प्रेरित त्यो समाचार एकैछिनमा डिलिट त भयाे, तर भाइरलकाे जमानामा फेसबुक ट्वीटरमा त्यसको स्क्रीनसट डढेलाेसरी फैलिइसकेकाे थियाे । त्यसैलाई पत्याएर रावलमाथि गालीगलाैज सुरू भयाे । आफ्नाेबारे आम आलाेचना हुन थालेपछि १४ पुसमा रावल उक्त समाचार खण्डन गर्न बाध्य भए ।

उनले ट्वीट गरेका थिए, ‘ओलीको शरीरमा स्त्रीको अङ्ग मिसिएको हुँदा दिमागले काम गरेन भनी मैले भनेको भन्दै एउटा समाचारमाध्यमले गरेको कुप्रचारको भर्त्सना गर्दछु । त्यो निकृष्ट कुरा समाचार लेख्नेको दिमागको उपज हो । मप्रति घृणा फैलाउन गरिएको उक्त कुप्रचारको घोर निन्दा गर्छु । म राजनीतिक भाषा र तथ्यमा विश्वास गर्छु ।’

हेर्नुहोस्, भीम रावलको ट्वीटः

"ओलीको शरीरमा स्त्रीको अङ्ग मिसिएको हुदा दिमागले काम गरेन" भनी मैले भनेको भन्दै एउटा समाचार माध्यमले गरेको कुप्रचारको भर्त्सना गर्दछु।त्यो निकृष्ट कुरा समाचार लेख्नेको दिमागको उपज हो।मप्रति घृणा फैलाउन गरिएको उक्त कुप्रचारको घोर निन्दा गर्छु।म राजनीतिक भाषा र तथ्यमा विश्वास गर्छु

— Bhim Rawal, PhD (@BhimRawal179) December 29, 2020

भीम रावलबारे शिलापत्रमा आएको समाचारः

...त्यो मैले भनेको होइनः भीम रावल

तर, रावलले भनेको भन्दै प्रकाशित ‘फेक न्युज’ पत्याएका ओलीले भीम रावलको खण्डनबारे समाचार भने 'थाहा' पाएनन् । त्यसैले १९ पुसमा अनेरास्ववियू भेलामा उनले भनिहाले, ‘महिलाको किड्नी लिएर मेरो दिमाग बिग्रियो रे, अनि महिलाबाट जन्मिएकाहरू नि ? त्यो दिन उसलाई श्रीमतीले कसरी खाना दिइन् होला ?’ जबकि, रावल आफूले त्यसअगावै ओलीको किड्नीबारे त्यस्तो टिप्पणी गर्दै नगरेको भनी स्पष्टीकरण दिइसकेका थिए । खण्डन गरेर पनि उनले सुख पाएनन् ।

ओली, उनकाे सचिवालयले रावलकाे खण्डनबारे यतिका दिनसम्म थाहा पाएन भनेर कल्पना गर्न सकिँदैन । तैपनि उनी फेक न्युज फैलाउन उद्दत छन् । स्वाभिमान र आत्मसम्मान नभएका कार्यकर्ता पत्रकारहरू दर्शकदीर्घामा बसेर थपडी मार्छन् । के याे आज देशका लागि ठूलाे समस्या हाेइन ? प्रश्न उठ्छ ।

यसअघि १५ पुसमा पार्टीको सुदूरपश्चिम प्रदेशका आफूनिकट कार्यकर्ता भेलालाई सम्बोधन गर्दै ओलीले नेता झलनाथ खनालको भनाइ बंग्याएर झूठ बाेलेका थिए । उनले भनेका थिए, ‘उहाँले भन्नुभएछ– ओलीले धरहरा बनाएको होइन, इन्जिनियरले बनाएको हो । तर, खनालजीलाई पनि थाहा रहेनछ । घर इन्जिनियरले बनाउँदैन, डकर्मी, कालीगढले बनाउँछ ।’ ओलीको भिडियो हेर्न यहाँ क्लिक गर्नुहाेस्ः

तर, ओलीले भनेजस्तै खनालले धरहरा इन्जिनियरले मात्र बनाएको भनेका होइनन् । खनालले अघि र पछि उच्चारण गरेका शब्द लुकाएर ओलीले ‘इन्जिनियर’ मात्रै उल्लेख गरिदिए । अघिल्लो दिन अर्थात् १७ पुसमा खनालले भनेका थिए, ’रानी पोखरी र धरहरा केपी ओलीजीले बनाएको होइन, कालीगढहरूले बनाएका हुन्, सिकर्मीहरूले बनाएका हुन्, इन्जिनियरहरूले बनाएका हुन् ।’ खनालको भिडियो हेर्न यहाँ क्लिक गर्नुहाेसः

तस्वीरः रासस

यो त भयो ओलीको झुटको कुरा । अब लागौँ उनले पत्रकारलाई पढाएको ‘पाठ’तिर । विस्मातकाे कुरा, पार्टीकाे पत्रकार संगठनका बफादार सदस्यहरूका अघिल्तिर उभिएर स्वतन्त्र पत्रकारहरूको हुर्मत लिँदै थिए । त्यो सभा नेकपाको, त्यो पनि ओली गुटतिर बफादार पत्रकारहरूको थियो ।

अरुले ‘मैले भन्दै नभनेको कुरा’ भन्दा पनि त्यसलाई बारबार आफ्नो भाषणमा दाेहाेर्‍याइरहेका ओलीले पत्रकारले सही र सत्य नलेखेको गुनासो गरे । ओलीले पित पत्रकारिता अहिले देशको ठूलो समस्या भएको टिप्पणी गरे । उनले भने, ‘अहिले केही सञ्चारमाध्यम ‘राम्रो कुरा देख्नपर्छ भने आँखा छोप्छु, राम्रो कुरा सुन्नुपर्छ भने कान थुन्छु । राम्रो कुरा बोल्नुपर्छ भने मुख थुन्छु तर सुन्दिन, हेर्दिन, बोल्दिन’ भने जसरी प्रस्तुत भएका छन् । राम्रो कुरा छोपेर झुटो छापेर जनतालाई दिग्भ्रमित पार्न लागिपरेका छन् ।’

पार्टीभित्र चेपुवामा परेपछि संसद विघटन गरेका ओलीले भेलामा सहभागी पत्रकारलाई स्वार्थका लागि समाचार नलेख्न आग्रह गरे । ‘पार्टीनिकट पत्रकार भएकाले म तपाईंहरुलाई आग्रह गर्छु । पत्रकार हुँ भन्नेबित्तिकै फलानो पार्टीको हो भनेर चिनोस् । सत्य तथ्य बुझेर लेख्ने पत्रकार भनेर चिनोस् । कसैको स्वार्थमा वा रिस उठेकै भरमा ठोक्दिएँ भनेर जथाभावी लेख्ने पत्रकार भनेर नचिनोस्,’ उनले भने ।

अनि आमसञ्चारमाध्यमले ‘तिमी’ सम्बोधन गरेकोपति ओलीले असन्तुष्टि दोहोर्‍याए । हुन त यो कुरा उनले विगतदेखि नै उठाउँदै आएका छन् । तर, कसैले सुनिदिएका छैनन् । सुनुन् पनि किन, ओली आफैं पार्टीका अधिकांश नेतालाई ‘तिमी’ ‘तँ’ सम्बोधन गर्छन् । केही दिनअघि नेता महेश बस्नेतले ‘ओलीलाई सबैले बा भन्नुपर्छ’ भनेका थिए । अब ‘बा’ले आफ्ना सन्तान वा सन्तानसरहका मान्छेलाई तपाईं त भन्दैनन् होला नि !

प्रकाशित मिति: बिहीबार, माघ ८, २०७७ १८:३९