पत्रकार राम्रो कुरा सुन्नु बोल्नुपर्ला भनेर आँखा, कान, मुख छोपिरहेका छन् : ओली

पत्रकार राम्रो कुरा सुन्नु बोल्नुपर्ला भनेर आँखा, कान, मुख छोपिरहेका छन् : ओली

A+ A A-

प्रधानमन्त्री केपी ओलीले पित पत्रकारिता अहिले देशको ठूलो समस्या भएको टिप्पणी गरेका छन् ।

बिहीबार आफूनिकट नेकपाको प्रेस संगठनको दोस्रो राष्ट्रिय भेलाको उद्घाटन गर्दै उनले केही सञ्चारमाध्यम झुटो छापेर जनतालाई दिग्भ्रमित पार्न लागेको आरोप लगाए ।

‘अहिले केही सञ्चारमाध्यम ‘राम्रो कुरा देख्नपर्छ भने आँखा छोप्छु, राम्रो कुरा सुन्नुपर्छ भने कान थुन्छु । राम्रो कुरा बोल्नुपर्छ भने मुख थुन्छु तर सुन्दिन, हेर्दिन, बोल्दिन’ भने जसरी प्रस्तुत भएका छन्,’ ओलीले भने, ‘राम्रो कुरा छोपेर झुटो छापेर जनतालाई दिग्भ्रमित पार्न लागिपरेका छन् ।’

भेलामा सहभागी पत्रकारलाई सम्बोधन गर्दै उनले स्वार्थका लागि समाचार नलेख्न आग्रह गरे । प्रधानमन्त्री ओलीले स्वार्थबाट अन्ध हुने र आत्मा बेच्ने व्याक्ति नर्क पर्ने टिप्पणी पनि गरे । ‘पार्टीनिकट पत्रकार भएकाले म तपाईंहरुलाई आग्रह गर्छु- पत्रकार हुँ भन्ने वित्तिकै फलानो पार्टीको हो भनेर चिनोस् । सत्य तथ्य बुझेर लेख्ने पत्रकार भनेर चिनोस् । कसैको स्वार्थमा वा रिस उठेकै भरमा ठोक्दिएँ भनेर जथाभावी लेख्ने पत्रकार भनेर नचिनोस्,’ उनले भने ।

प्रधानमन्त्री ओलीले आमसञ्चारमाध्यमले ‘तिमी’ सम्बोधन गरेकोमा पनि असन्तुष्टि जनाए । ‘अंग्रेजीमा सबैलाई यू भनिन्छ, त्यसैको देखासिखी गरेर तपाईंहरुले पनि तिमी भन्न थाल्नुभयो,’ ओलीले भने, ‘हाम्रो आफ्नै सभ्यता र संस्कृति छ । चराको परिवार जस्तो होइन । चराले त दुई वटा फुल पार्छ, बच्चा पखेटा पलाएर भुर्र उडेपछि आमाबाबु पनि चिन्दैन । हामी त्यस्तो होइन ।’

उनले राजतन्त्र हुँदा खाइबक्स्यो, हुकुम भयो, हिँडिबक्स्यो, नजर गरिबक्स्यो भन्नुपर्नेमा अहिले खानुभयो, हिँड्नुभयो, हेर्नुभयो भन्न पनि पत्रकारहरुले गाह्रो मानेको बताए ।

प्रकाशित मिति: बिहीबार, माघ ८, २०७७ १६:४५