कोभिडविरुद्धको खोप सामग्री शीघ्र पास गराउन भन्सारले सुरु गर्‍यो तयारी

A+ A A-

कोभिड- १९ विरुद्धको खोपलगायतका सामग्रीको शीघ्र भन्सार जाँचपासका लागि भन्सार विभागले आवश्‍यक प्रक्रियाको तयारी गरेको छ । नेपालमा पैठारी गरिने खोप तथा त्यससँग सम्बन्धित सामग्री जाँसपास गराउने प्रयोजनका लागि १२ बुँदै प्रक्रिया अघि सारेको भन्सार विभागले जनाएको छ ।

त्रिभुवन विमानस्थल र मुख्य भन्सार विन्दुहरूमा छुट्टै इकाइ खडा गरेर कर्मचारी खटाइने, तत्काल समस्या समाधान गर्ने कार्यदल बनाइनेलगायतका तयारी भन्सार विभागले गरेको हो । पैठारीपूर्व नै कागजात उपलब्ध गराइ इकाइमार्फत जाँसपास प्रकिया अघि बढाइने, खोपको परिणाम र मूल्य नखुलेको अवस्थामा स्वास्थ्य मन्त्रालयसँग समन्वयन गरेर जाँचपास गर्ने भन्सार विभागले जनाएको छ ।

खोप अनुमतिको प्रमाणपत्र र पैठारीको प्रमाणपत्र गेट वा काउन्टरबाटै जाँचपास गर्ने व्यवस्था गरिएको छ । पैठारी गरिने खोपका बारेमा पूर्वतयारीको विवरण दिइएमा सोहीअनुसारको अध्यनन प्रक्रिया अघि बढाइने, गुणस्तरीय खोप पैठारी सुनिश्चितताका लागि निश्चित भन्सार बिन्दुहरू तोकिने उल्लेख गरिएको छ । सार्वजनिक बिदाका दिनमा पनि यी सामग्रीको तत्काल जाँचपास गर्ने व्यवस्था मिलाइएको विभागले उल्लेख गरेको छ ।

पुन: प्रयोग गर्न सकिने कोल्डचेन उपकरण, कन्टेनर तथा बक्सहरूलाई पैठारीकर्तालाई कानुनअनुसार फिर्ता गर्न दिइने व्यवस्था मिलाइएको छ । भन्सारमा खोप जाँचपश्चात अर्थमन्त्रालय र स्वास्थ्य मन्त्रालयमा जानकारी गराइने उल्लेख गरिएको छ ।

नेपाल सरकारले भारतले अनुदानमा दिन लागेको कोरोना भाइरसविरुद्धको १० लाख डोज खोप भोलि काठमाडौं आइपुग्ने जनाएको छ । पहिलो चरणमा खोप स्वास्थ्यकर्मी, एम्बुलेन्स चालक र सुरक्षाकर्मीलाई दिइने स्वास्थ्य तथा जनसंख्या मन्त्रालयले जनाएको छ ।

नेपालमा भारतको सेरम इन्स्टिच्युट अफ इन्डियाले उत्पादन गरेको अक्सफोर्ड-अष्ट्राजेन्काको खोप ‘कोभिसिल्ड’ लाई कोभिड-१९ विरुद्ध आपतकालीन प्रयोगका लागि औषधि व्यवस्था विभागले अनुमति दिएको छ ।

यो पनि : भारतले दियो १० लाख डोज कोरोनाविरुद्धको खोप, भोलि नै‌ नेपाल आउने

प्रकाशित मिति: बुधबार, माघ ७, २०७७ २०:१३