भारतले दियो १० लाख डोज कोरोनाविरुद्धको खोप, भोलि नै‌ नेपाल आउने

A+ A A-

भारतले नेपाललाई १० लाख डोज कोरोना भाइरसविरुद्धको खोप अनुदानमा दिएको छ । बुधबार स्वास्थ्य तथा जनसंख्यामन्त्री हृदयेश त्रिपाठी र भारतीय राजदूत विनयमोहन क्वात्राले संयुक्त पत्रकार सम्मेलनमा नेपाललाई १० लाख डोज कोरोनाविरुद्धको खोप उपलब्ध गराएको जानकारी दिइएको हो ।

मन्त्री त्रिपाठीले खोप ल्याउने सबै तयारी पूरा भएको पनि बताए । अनुदानको खोप भोलिदेखि नै आउन थाल्ने उनको भनाइ छ । 'सीमित देशका सीमित कम्पनीमा मात्रै उत्पादन भइरहेकाले हाम्रो लागि उपयुक्त यसको भण्डार, यसको दुवानी र खोप अभियानलाई सफलतापूर्वक सम्पन्न गर्नका लागि आवश्यक पर्ने भ्याक्सिन भोलि नै काठमाडौंमा अवतरण हुँदै छ', उनले भने ।

पहिलो चरणमा स्वास्थ्यकर्मी, एम्बुलेन्स चालक र सुरक्षाकर्मीलाई खोप दिइने मन्त्री त्रिपाठीले बताए । 'हाम्रो देशको जनसंख्याको ७२ प्रतिशत खोपका लागि उपुक्त जनसंख्याको रूपमा इंगित गरेका छौँ । जसमध्ये ३ प्रतिशत जनसंख्या सफाइकर्मी, चिकित्सक, स्वास्थ्यकर्मी एम्बुलेन्सका चालक र शव व्यवस्थापनमा संलग्न व्यक्ति र सुरक्षाकर्मी अहिलेसम्म कोभिडविरुद्धको संघर्षका प्रथम योद्धा हुन्, तिनीहरूलाई पहिलो प्राथमिकतामा राखेर हामीले खोपी अभियान संचालन गर्दै छौँ,' उनले भने ।

खोप अभियानका लागि कानुनी प्रशासनिक आर्थिक र प्राविधिक सबै प्रक्रिया पूरा भइरसकेको पनि उनले बताए । उनले खोप लगाउनका लागि गर्नुपर्ने सबै तयारी पूरा भइसकेको बताए । उनले खोप अनुदानमा दिएकोमा भारत सरकारलाई पनि धन्यवाद दिए ।

‘यो नेपाल र भारतबीचको मित्रताको अनुपम उदाहरण हो । भारतले नेपाल र अरू छिमेकी देशका जनताका लागि राजनीतिक निर्णय गरेको छ । भारतलाई धेरै-धेरै धन्यवाद दिन चाहन्छौँ । आगामी दिनमा खोपको खरिदमा भारत सरकारको सहयोग अत्यन्त महत्त्वपूर्ण हुनेछ,’ उनले भने ।

कोरोना भाइरसविरुद्धको खोप ‘कोभिसिल्ड’ लाई नेपालमा आपतकालीन प्रयोगका लागि अनुमति प्रदान गरिएको छ । भारतको सेरम इन्स्टिच्युट अफ इन्डियाले उत्पादन गरेको अक्सफोर्ड-अष्ट्राजेन्काको खोप ‘कोभिसिल्ड’ लाई कोभिड-१९ विरुद्ध आपतकालीन प्रयोगका लागि अनुमति प्रदान गरिएको औषधि व्यवस्था विभागले जनाएको छ ।

प्रकाशित मिति: बुधबार, माघ ७, २०७७ १४:४९