उद्योग व्यवसाय प्रवर्द्धन गर्न मेगा बैंक र धादिङ उवासंघबीच सहकार्य

A+ A A-

मेगा बैंक नेपाल लिमिटेडले उद्योग तथा व्यवसायलाई प्रवर्द्धन गर्न धादिङका बेनीघाट रोराङ गाउँपालिका, धादिङ्ग उद्योग वाणिज्य संघ (उवासंघ) तथा मेगा क्यापिटल मार्केट्ससँग सहकार्य गरेकाे छ ।

बैंकले विपन्नवर्ग, लघु, घरेलु, साना तथा मझौला उद्यमीहरूद्वारा सञ्चालित उद्योग तथा व्यवसायलाई प्रवर्द्धन गर्ने उद्देश्यले ती निकाय तथा संस्थासँग सहुलियतपूर्ण कर्जा उपलब्ध गराउनेसम्बन्धी सम्झौता गरेकाे बैंकले जनाएकाे छ ।

साेसम्बन्धी सम्झौतापत्रमा मेगा बैंक नेपाल, बेनीघाट रोराङ गाउँपालिका, धादिङ उद्योग वाणिज्य संघ र मेगा क्यापिटल मार्केट्सकाे तर्फबाट सोमबार हस्ताक्षर भएकाे हो ।

सम्झौताअनुसार मेगा बैंकले रोराङ गाउँपालिका, धादिङका साना किसान, व्यवसायीका साथै व्यवसाय गर्न चाहने व्यक्तिहरूलाई आफ्नो व्यवसाय विस्तार गर्नका लागि नेपाल राष्ट्र बैंकको सहुलियतपूर्ण ब्याज अनुदान कर्जा निर्देशिका र बैंकको सहुलियतपूर्ण ब्याज अनुदान कर्जा कार्यविधिको अधीनमा रही सहुलियतपूर्ण कर्जा प्रदान गर्नेछ ।

कार्यक्रममा बेनिघाट रोराङ गाउँपालिकाका अध्यक्ष, धादिङ उद्योग वाणिज्य संघका अध्यक्ष तथा मेगा क्यापिटलका प्रमुख कार्यकारी अधिकृतले सेवाग्राहीहरूलाई आ-आफ्नो पक्षबाट बेनिघाट रोराङ गाउँपालिकाका उद्यमीहरूलाई सहुलियतपूर्ण ब्याज अनुदान कर्जा सेवा प्रदान गर्ने सिलसिलामा भरपूर सहयोग र सहकार्य रहने प्रतिवद्धता व्यक्त गरे ।

कार्यक्रममा गाउँपालिका तथा उद्योग वाणिज्य संघसँग आवद्ध साना किसान, लघु, घरेलु तथा साना उद्यमीहरूलाई प्राथमिकताका साथ बैंकको मलेखु, धादिङस्थित शाखा कार्यालयबाट सहुलियतपूर्ण कर्जा सेवा उपलब्ध गराउने बैंकका विभागीय प्रमुख पुण्यप्रसाद खनियाले जानकारी गराए ।

प्रकाशित मिति: बुधबार, माघ ७, २०७७ ११:५५