कोरोनाविरुद्धको खोप निःशुल्क पाइने, स्वास्थ्यमन्त्री भन्छन्, 'खाेप छिट्टै ल्याउँदै छाैँ'

कोरोनाविरुद्धको खोप निःशुल्क पाइने, स्वास्थ्यमन्त्री भन्छन्, 'खाेप छिट्टै ल्याउँदै छाैँ'

A+ A A-

सरकारले कोरोना भाइरसविरुद्धको खोप नागरिकलाई निःशुल्क लगाउने प्रतिवद्धता जनाएको छ । स्वास्थ्य तथा जनसंख्या मन्त्रालयले सोमबार पत्रकार सम्मेलन गरेर कोरोनाको जोखिममा रहेका नागरिकलाई खोप निःशुल्क लगाउने प्रतिवद्धता जनाएको हो ।

‘ढुक्क हुनुहोस् खोप आउँछ । सरकारले निःशुल्क रूपमा लगाउँछ’, स्वास्थ्यमन्त्री हृदयेश त्रिपाठीले भने, ‘जनतालाई खोप लगाउन सरकार प्रतिवद्ध छ । खोप प्राप्तिदेखि लगाउनेसम्म अभियान नै सञ्चालन गर्छाैं । कोभ्याक्स कार्यक्रमबाट २० प्रतिशत खोप आउने सुनिश्चत भएको छ ।’

खोप ल्याउने काम अन्य व्यवसायजस्तो नभएको टिप्पणी गर्दै मन्त्री त्रिपाठीले खोप ल्याउन कूटनीतिक नोट पठाएको र राजनीतिक पहल पनि भइरहेको बताए । उनले भने, ‘केही देशमा खोपको विकास भएको छ । ती देशसँग कुराकानी गरिरहेका छौँ । रुस, भारत र संयुक्त अरब इमिरेट्सका राजदूतसँग छलफल गरेको छु । खोप प्राप्त गरेको सात दिनभित्र लगाउन सुरु हुन्छ ।’

छिमेकी देशले खोपको प्रयोग थालेकाे भन्दै मन्त्री त्रिपाठीले नेपाल पनि पछि नपर्ने दाबी गरे । खोप किन्ने प्रक्रिया र वितरण पारदर्शी हुने उनले स्पष्ट पारे । ‘खरिद प्रक्रिया पारदर्शी र वितरण न्यायपूर्ण हुन्छ’, उनले भने, ‘छिटोभन्दा छिटो ल्याउने प्रक्रियामा छौँ । विकृतिको अशंका गरिएको छ । त्यसलाई झुटाे सावित गर्छौं ।’ खोप खरिद गर्न निजी क्षेत्रलाई पर राख्न नहुने मन्त्री त्रिपाठीको तर्क छ ।

खोप किन्न बजेट पनि सुनिश्चत गरिएको बताउँदै उनले पहिलो चरणमा स्वास्थ्यकर्मी, सुरक्षाकर्मी, ५५ वर्षमाथिका र दीर्घ रोगीलाई खोप लगाउने बताए ।

१६ हजार खोप केन्द्र, ५२ हजार स्वयम्‌सेवक

मन्त्रालयले खोप कार्यक्रम सञ्चालन गर्न १६ हजार खोप केन्द्र रहेको जनाएको छ । जसका लागि ५ हजार कर्मचारी र ५२ हजार स्वयम्‌सेवक महिला कर्मचारी परिचलान गर्ने मन्त्रालयको तयारी छ ।

१ करोड ७७ लाख खोपको डोज भण्डारण क्षमता

पत्रकार सम्मेलनमा मन्त्रालयका सचिव लक्ष्मण अर्यालले खोपको भण्डारण क्षमता बढाउने काम भइरहेको बताए । ‘खोपको पूर्वतयारीको काम भइरहेको छ । २ देखि ८ डिग्रीको १ करोड ७७ लाख खोपको डोज भण्डारण गर्ने क्षमता छ । माइनस २० को आयो भने ९ लाख ११ हजारका लागि भण्डारण क्षमता छ’, उनले भने, ‘सातवटै प्रदेशमा क्षमता बढाउने काम भइरहेको छ ।’

यो पनि...

कोरोना खोप : कुन प्रदेशमा कति छ भण्डारण क्षमता ?

खोप उत्पादन गरिरहेका देशमा सरकारले पठायो कूटनीतिक नोट

यसरी ल्याइँदै छ नेपालमा काेराेना खाेप : ‘७२ प्रतिशतले पाउँछन्, बालबालिकाका लागि बनेको छैन’

खोप ल्याउन सहज छैन, अझै संक्रमणको जोखिममा छौँ

प्रकाशित मिति: सोमबार, पुस २७, २०७७ १५:३९