नेपाल-भारत सीमाक्षेत्रमा कसले चलायो गोली ?

A+ A A-

कञ्चनपुरकाे नेपाल-भारत सीमाक्षेत्रमा गोली सोमबार साँझ साढे ६ बजे गोली चल्यो । भारतको उत्तराखण्डअन्तर्गत पर्ने चम्पावत जिल्लाको बयलबन्दा जंगलमा गोली चल्दा दोधाराचाँदनी नगरपालिका-१ का नरेन्द्र सुनार घाइते भए ।

खुट्टामा गोली लागेर घाइते भएका सुनारको महाकाली अस्पतालमा उपचार भइरहेको छ । उनलाई गोली हान्ने व्यक्ति को थिए र के कारणले गोली चलायो भन्ने विषयमा अनुसन्धान भइरहेको प्रहरीले जनाएको छ ।

रतीय सीमा सुरक्षा बल (एसएसबी) ले भारतीय बजारबाट सामान किनेर फर्कँदै गरेका नेपालीमाथि गोली नचलाएको दाबी गरेको छ । सो क्षेत्रमा रुख कटान गर्दै तस्करी हुने गरेकोले भारतीय सीमा सुरक्षा बल (एसएसबी) ले नभइ वन रक्षकले गाेली चलाएको अनुमान गरिएको छ ।

जिल्ला प्रहरी कार्यालय कञ्चनपुरका प्रहरी नायव उपरीक्षक अम्मर थापाले घटनाबारे विस्तृत अध्ययन भइरहेको बताए ।

‘हाम्रो टोली घटनास्थल पुगेको छ । भारतीय एसएसबीसँग बुँझदा आफूहरूको संलग्नता नरहेको जिकिर गरेका छन्,’ उनले भने, ‘सीमाक्षेत्रमा रहेको भारतीय वन विभागको कार्यालयसँग समेत सम्पर्क गरिरहेका छौँ ।’

घाइते भन्छन् : सामान किनेर फर्किंदा गोली हान्यो

घाइते सुनारले साँझका बेला सीमावर्ती बजार गठीगोठबाट सामान किनेर ल्याउँदा पछाडिबाट गोली चलेको बताएका छन् ।

‘हामी दुई दाल, चामल, चिनी, प्याज, टमाटर लिएर फर्कँदै थियाैँ । म पछाडि थिए,’ उनले भने, ‘पछाडिबाट कसैले डन्डा हान्यो । म डरले उठेर भागे । पटाका पड्केको जस्तो आवाज आयो, खुट्टामा छर्रा लाग्यो ।’

उनले भाग्दै पूर्णागिरि स्कुलनजिक पुगेको बताए । ‘आफूलाई गोली लागेको खबर गोपु चन्द अंकलाई भनेपछि उहाँ आएर मलाई ल्याउनु भो,’ उनले भने ।

गोली चलाउने १०/१२ जना जति भए पनि आफूले को थिए भनेर चिन्न नसकेको उनले बताए । घाइते सुनार ट्याक्टर चालक हुन् ।

गत मंसिरको पहिलो सातामा पनि कञ्चनपुरसँग सीमा जोडिएको भारतीय दुधुवा नेसनल पार्कमा पुनर्वास नगरपालिका- ५, उदरी बस्ने ३५ वर्षीय शिवलाल रानाकोे छातीमा गोली हानी हत्या भएको थियो।

यो पनि पढ्नुहोस् : नेपाल-भारत सीमाक्षेत्रमा गोली चल्यो, नेपाली युवक घाइते

प्रकाशित मिति: मंगलबार, पुस २१, २०७७ १२:१५