स्वास्थ्य प्रवक्ता भन्छन्, ‘दलहरू नै गर्दैछन् कोरोनालाई मलजल’

A+ A A-

संसद विघटनपछि राजनीतिक सरगर्मी बढेको छ । सत्तापक्ष र प्रतिपक्षी दलहरू सडक र पार्टी प्यालेसमा भेला, जुलुस र प्रदर्शन गरिरहेका छन् । कोभिड नियन्त्रणको नेतृत्व गरेका प्रधानमन्त्री केपी ओली नै विभिन्न भेला र गोष्ठीमा सहभागी हुँदै हिँडेका छन् । स्वास्थ्य मन्त्रालयको तथ्याङ्कअनुसार हिजाआज दैनिक ५ सयदेखि १ हजारको बीचमा नयाँ संक्रमित थपिने गरेका छन् । संक्रमण दर घटेर १३ प्रतिशतमा सीमित भएकाे देखिन्छ । यद्यपि, काठमाडौं उपत्यका काेराेनाकाे जाेखिममै छ । तर, यहीँ पार्टीहरूको भेला, जुलुस र प्रदर्शन भइरहेकाे छ । काेराेनाकाे जाेखिममा रहेकाे काठमाडाैं उपत्यकाकाे सुरक्षा खातिर स्वास्थ्य तथा जनसंख्या मन्त्रालय के गर्दैछ ? काेराेनाकाे दाेस्राे लहरबाट नागरिकलाई बचाउन केकस्ता याेजना बनाएकाे छ ? स्वास्थ्य मन्त्रालयका प्रवक्ता डा. जागेश्वर गौतमसँग गरिएकाे कुराकानीः

तथ्याङ्क हेर्दा संक्रमितको संख्या घटिरहेको देखिन्छ । तर, मन्त्रालयले नै जोखिम कायमै छ भनेर नागरिकलाई तर्साउने काम गरिरहेकाे छ, किन ?

मन्त्रालयले तर्साएकाे हाेइन, सचेत गराएकाे हाे । पोहोर यो समयमा एउटा पनि केस थिएन । नेपालमा पहिला २ वटा केस आएको हो । दुइटाबाट बढेर २ लाख ६० हजार पुग्यो । अहिले पनि ६ हजार एक्टिभ केस छन् । जहिले जसलाई पनि सर्न सक्छ । त्यसैले जोखिम कायमै छ भनेका हाैँ । मास्क लगायो दूरी कायम गर्‍यो भने जोखिम कम हुने हो । नत्र जोखिम हुन्छ । भ्याक्सिन लगाए पनि जोखिम रहन्छ । भ्याक्सिनले पनि शतप्रतिशत कन्ट्रोल गर्दैैन ।

अनि संक्रमण घटेको हो कि परीक्षण कम गरेको हो त ?

मान्छे कम भएर घटेको हो । एक जना पोजिटिभ आयो भने उसको वरिपरिको ५/६ जनाको टेस्ट हुन्छ । विश्वभर गरिएको यही हो । मान्छेमा पोजिटभ नै कम आएपछि कसलाई गएर परीक्षण गर्ने ? संक्रमितको वरिपरि रहेकालाई गर्ने न हो परीक्षण ।
संक्रमण दर कम हुँदै गएको तथ्य देखाउँदै गर्दा उता बेलायतमा नयाँ प्रकारको भाइरस देखिएकाेले पुनः त्रास बढाएकाे छ । जोखिम झन् बढेको हो ?

जुन सुकै प्रकारको भाइरस आए पनि मास्क लगाएर, दूरी कायम गरेर राेक्न सकिन्छ । सर्ने तरिका एउटै हो । पोजिटिभ वा नेगेटिभ हुने तरिका एउटै हो । सर्‍यो भने लक्षण कडा खालको आउँछ । पहिले लक्षण जे हो, नयाँ खालकाेमा पनि त्यही हो । तर, धेरैलाई लक्षण देखिन्छ ।

बेलायतबाट आएका नागरिक संक्रमित भएका छन्, नेपालमा पनि नयाँ प्रकारको भाइरस प्रवेश गरेको त होइन ?

बेलायतबाट आउने फ्लाइट बन्द गरिएको छ । अहिले कोही पनि आउँदैन । छिटफुट आएका थिए । आएकालाई निगरानीमा राखेको छौँ । टेस्टिङ गरेका छौँ । फरक खालको हो कि हामी कहाँ भइरहेको भाइरस हो थाहा पाउन जिन सिक्वेन्सिङ गरेर हेर्दै छौँ ।

सिक्वेन्सिङ नेपालमै सम्भव छ ?

नेपालमा पनि सम्भव छ । बाहिर पठाएर पनि क्रसचेक गर्छौं । उपचारमा यसले केही फरक पार्दैन ।

के हो कोरोना जिन सिक्वेन्सिङ ? किन गरिन्छ ?

भारतमा नयाँ प्रकारको देखियो, सीमा खुल्ला राख्दा संक्रमण नेपाल भित्रँदैन त ?

सिमामा कडाइ गरेर के हुन्छ ? मास्क नलगाउने दूरी कायम नगर्ने अनि सीमामा कडाइ गरेर मात्र हुन्छ ? कडा-कडा कुरा गरेर हुँदैन । पहिलो चरणमा ४ महिना बन्द गरेको होइन ? लकडाउन गरेको होइन ? संक्रमण रोकियो त ? आफूले स्वास्थ्यको मापदण्ड पालना नगर्ने अनि बन्द गरेर हुने हो ?

तपाईं भीडभाड नगरौं, दूरी कायम गराैँ भन्नुहुन्छ, तर पार्टीहरूले त सडकमा जुलुस, प्रदर्शन, भेला गरिरहेका छन् त ?

बाटोमा हिँडेर गाडीमा यात्रा गरेर भाइरस सर्ने होइन । राजनीतिक सरगर्मीले पनि हामीलाई फरक गरेको छैन तर भीडले फरक पर्छ । नारा, जुलुस भीडभाड गरेर कोरोना बढाउने भए । दलहरूले कोरोनालाई मलजल गरिररहेका छन् । यसकाे परिणाम नराम्राे हुन सक्छ। बेलैमा सचेत हुनुपर्छ, हामी यही अनुराेध गर्छाैं ।

त्यसोभय फरि संक्रमण बढ्ने भयो ?

२/३ हप्तामा हेर्नुहोला, काठमाडौंमा संक्रमण फेरि बढ्छ । त्यसैले भीडाभाड गर्नुहुन्न ।

भनेपछि दोस्रो लहर आउने खतरा छ ?

माघमा संक्रमण बढ्न सक्छ । अहिले पिकमा पुगेर झरेको छ । फेरि माथि चढ्न सक्छ । यो भनेको दोस्रो लहर आउँछ कि भन्ने हो ।

यो पनि....

द्रुत गतिमा फैलिने नयाँ प्रकारको भाइरसको जोखिममा नेपाल

कोरोना खोप : कुन प्रदेशमा कति छ भण्डारण क्षमता ?

खोप उत्पादन गरिरहेका देशमा सरकारले पठायो कूटनीतिक नोट

यसरी ल्याइँदै छ नेपालमा काेराेना खाेप : ‘७२ प्रतिशतले पाउँछन्, बालबालिकाका लागि बनेको छैन’

खोप ल्याउन सहज छैन, अझै संक्रमणको जोखिममा छौँ

प्रकाशित मिति: बिहीबार, पुस १६, २०७७ १७:४०