कमिसन घटाएको भन्दै ब्रोकरले गरे धितोपत्र बोर्ड घेराउ, भन्छन् : व्यवसाय धराशयी बन्यो

कमिसन घटाएको भन्दै ब्रोकरले गरे धितोपत्र बोर्ड घेराउ, भन्छन् : व्यवसाय धराशयी बन्यो

A+ A A-

धितोपत्र बोर्डले आजदेखि लागू हुने गरी कार्यान्वयनमा ल्याएको नयाँ ब्रोकर कमिसनको व्यवस्थाकाे ब्रोकरहरूले विरोध जनाएका छन् । आइतबार ब्रोकर व्यवसायी र ब्रोकर एसाेसिएसनले संयुक्त रूपमा धितोपत्र बोर्ड घेराउ गर्दै ब्रोकर कमिसन घटाएर व्यवसाय नै धराशयी बनाएको आरोप लगाएका हुन् ।

व्यवसायीले नियमाक निकाय नेप्से र बोर्डले लिने कमिसन नघटाएर ब्रोकरहरूको कमिसन मात्रै घटाएको आरोप लगाएका छन् । व्यवसायीले बोर्डलाई ज्ञापन बुझाउँदै कमिसन घटाउँदा बोर्ड र नेप्सेले लिने रकम पनि घटाउनुपर्नेमा आफूहरूको व्यवसाय चल्नै नसक्ने गरी ब्राेकरकाे मात्र कमिसन घटाएको बताएका छन् ।

यसअगाडि ब्रोकरहरूले लगानीकर्ताको कमिसन घटाउनुपर्ने माग जायज भएको भन्दै ब्रोकरले पाउने खुद कमिसन छुट्याएर घटाउनुपर्ने माग गर्दै आएका थिए । यद्यपि बोर्डले नेप्से र बोर्डले लिने कमिसनलाई बेवास्ता गरेर व्यवसायीको कमिसन मात्रै घटाएकोमा व्यवसायी असन्तुष्ट बनेका हुन् ।

बोर्डले ५० हजार रुपैयाँसम्मको कारोबारमा ० दशमलव ४ प्रतिशत, ५० हजारदेखि ५ लाख रूपैयाँसम्म ० दशमलव ३७ प्रतिशत, ५ लाखदेखि २० लाख रूपैयाँसम्म ० दशमलव ३४ प्रतिशत, २० लाखदेखि १ करोड रूपैयाँसम्मको कारोबारमा ० दशमलव ३ प्रतिशत र १ करोडभन्दा बढीको कारोबारमा ० दशमलव २७ प्रतिशत कमिसन लाग्ने नयाँ व्यवस्था गरेको छ ।

यस्तो कमिसन शेयर कारोबार गर्दा लगानीकर्तासँग ब्रोकरले लिने गर्छन् । तर, ब्रोकरले लिएको रकमबाट कमिसन रकमको २० प्रतिशत नेप्सेले र ६ प्रतिशत बोर्डले लिने गर्छ । यस्तै, बोर्डले शेयर कारोबारमा कारोबार रकमको ० दशमलव ०१५ प्रतिशत रकम कारोबार शुल्क लिने गर्छ ।

यसरी ब्रोकरले लिने खुद कमिसन लगानीकर्ता अनुकूल नै रहे पनि नियामक निकायले व्यवसायीलाई निमोठ्ने गरी ब्रोकरको नाममा लिने कमिसन नघट्दा व्यवसायी मारमा परेको ब्रोकर एसाेसिएसनका पूर्वअध्यक्ष नरेन्द्र सिजापतीले बताए । उनले यदि नियामक निकायले लिने कमिसन नघटे व्यवसाय धराशयी बन्ने वताए ।

यस विषयमा एसोसिएसनका अध्यक्ष सन्तोष मैनाली ब्रोकरले धेरै कमिसन नखाएको बताउँछन् । ब्रोकरले पाउने ० दशमलव ६ प्रतिशतमा सेबोन, नेप्सेलगायतको कमिसन पनि गनिने हुँदा धेरै देखिएको उनको भनाइ छ ।

ब्रोकर एसोसिएसनका पूर्वअध्यक्ष भरत रानाभाट लगानीकर्ताले ब्रोकरलाई मात्रै तिर्ने कमिसन कति प्रतिशत हो भन्ने थाहा नपाउँदा समस्या भएको बताउँछन् । रानाभाटका अनुसार सेबोन र नेप्सेको कमिसन छुट्याएर ब्रोकरले ० दशमलव ६ प्रतिशतको ० दशमलव ३३ प्रतिशत मात्रै कमिसन पाउँछन् ।