'आवेगमा आएर शेयर नबेचौँ, बजार अझै बढ्छ'

A+ A A-

अस्थिर राजनीतिको सिकार सोझा लगानीकर्ता भएको भन्दै अहिले लगानीकर्ता तथा शेयरज्ञाताहरू धैर्य रहन लगानीकर्तालाई आग्रह गरिरहेका छन् । संसद् विघटन भएसँगै झण्डै १ सय अंकले घटेको बजारमा लगानीकर्ता नबुझीकनै 'प्यानिक' भएको भन्दै प्यानिक नहुन अनुरोध गरेका हुन् ।

शेयर हिजो घट्दा नै शेयर नबेचौँ भनेका विश्लेषक आज पनि शेयर बेच्नेको लर्को देख्दा हैरान बनेको बताउँछन् । आज कारोबार सुरु भएको आधा घण्टा नबित्दै ५५ अंकले बजार घट्दा सबै समूह राताम्मे बनेका थिए भने शेयर किन्ने भन्दा बेच्ने लगानीकर्ताको चाप बढेको थियो ।

पछि नेप्से सूचक अस्थिर बन्दै अन्तिममा बजार सम्हालिएर ३० अंकको वृद्धि भयो । यसर्थमा शेयरबजारमा संसद् विघटनको कुराले कुनै असर नपार्ने विश्लेषकको ठम्याइ छ ।

शेयर बजार विश्लेषक विष्णु बस्याल नेप्से सूचक १८ सयको विन्दुमा पुग्दा लगानीकर्ता प्यानिक भए पनि बजार सम्हालिनु सकारात्मक पाटो भएको बताउँछन् ।

त्यस्तै, लगानीकर्ता हरि ढकाल पनि शेयरबजारको अस्थिरता सामान्य भए पनि लगानीकर्ताले नबुझेर बजार घट्छ भन्ने भय पालेको बताए । नेपाली बजार मात्रै नभएर विश्वको शेयरबजार नै भावनात्मक रूपमा चल्ने हुनाले नेपालमा यसलाई खासै अचम्म मान्नुपर्ने अवस्था छैन । तर, भावनामा मात्र बगेर कारोबार गर्नुभन्दा कम्पनी विश्लेषण गरेर मात्र कारोबार गर्दा जस्तोसुकै परिस्थितिमा पनि लगानीकर्ता डुब्ने अवस्था नआउने अध्यक्ष ढकालको भनाइ छ ।

उनले भने, ‘बजार घट्नुमा अस्थिर राजनीतिलाई किन दोष दिने ? हामी लगानीकर्ता नै मूर्ख छौँ, महाभूकम्पपछि पनि बजार सम्हालिएको देख्दादेख्दै किन यति प्यानिक हुने ? बजारमा कुनै प्रभाव परेको छैन र बजार अब बुलिस ट्रेण्डमै रहन्छ ।'

ढकालका अनुसार लगानीकर्ताले राजनीतिक घटनाक्रमभन्दा यो समयमा धैर्य बन्दै कुन कम्पनीले राम्रो लाभांश दिन्छ भन्ने बुझेर लगानी गर्नुपर्ने बताउँछन् । यो समय प्यानिक हुने हाेइन, याे त सकेसम्म शेयर किन्नका लागि उपयुक्त समय भएको उनले बताए ।

त्यसो त इन्भेस्टर फोरमका अध्यक्ष छोटेलाल रौनियार पनि लगानीकर्तालाई शेयर होल्ड गर्न नै सुझाउँछन् । अध्यक्ष रौनियारले अस्थिर राजनीतिले नेप्से राताम्मे बने पनि खासै ठूलाे प्रभाव नपार्ने बताउँछन् । उनले नेपाली बजार अफवाहकाे भरमा चल्ने हुँदा राजनीतिक अस्थिरताको मारमा शेयरलगानीकर्ता पर्ने गरे पनि यो समय धैर्य बनेमा कुनै प्रकारकाे घाटा बेहोर्नु नपर्ने बताए । यो समय होल्ड गर्नु नै उत्तम हुने उनको भनाइ छ ।

यसरी सम्हालियो बजार

आइतबार ९६ दशमलव ८८ अंकले घटेको बजारमा सोमबार ३० दशमलव ३३ अंकको वृद्धि भएको छ । सोमबार नेप्से सूचक १९६५ दशमलव ९६ अंकमा बन्द हुँदा २ सय २ कम्पनीको १ करोड २३ लाख ८२ हजार ४ सय ८२ कित्ता शेयर ६ अर्ब ९८ करोड ८७ लाख ७४ हजार ३ सय ५४ रुपैयाँमा कारोबार भयो ।

कारोबार सुरु भएको ४० मिनेटमा ५० अंकको नेप्से गिरावट हुँदा अत्तालिएर शेयर बेचेका लगानीकर्ताले बन्द हुँदासम्म प्रतिकित्ता १ सय रुपैयाँभन्दा बढीले घाटा बेहोरे ।

घटेर १८७५ अंकमा पुगेको नेप्से २६ मिनेटपछि ८९ अंकले बढेको थियो । योसँगै दिनभर सामान्य घटबढ रहँदै अन्तिममा नेप्से हरियाली बनेर बन्द भयो ।

१८ सयमा प्रवेश गरेको नेप्से सूचक अन्तिममा पुन: १९ सयको विन्दुमा पुगेर बन्द भएको छ । अर्थात् १९६५ दशमलव ६६ अंकमा शेयर हरियाली बनेर बन्द भयो । यसबाट पनि शेयरबजारमा लगानीकर्ताले सोचेजति पहिरो भने नगएको स्पस्ट देखिन्छ ।

बजारमा घट्छ भन्ने मनोवृत्ति देखिए पनि स्मार्ट लगानीकर्ताले धमाधम मौकाको फाइदा उठाएर शेयर खरिद गर्दा कारोबार रकम पनि बढेको छ।

बढेको बजारमा होटल, म्युचुअल र व्यापार समूहबाहेकका सबै समूह बढेका छन् । त्यस्तै, सेन्सेटिभ परिसूचक पनि ७ दशमलव ०१ प्रतिशतले बढेको छ । जसमा एनआईसी एशिया बैंकले ९ दशमलव ९० प्रतिशतले शेयरमूल्य बढाएको छ भने योसँगै ९७ कम्पनीले शेयरमूल्य बढाउन सफल बनेका छन् । आइतबार यसको संख्या जम्मा आठ थियो ।

त्यसो त शेयर घट्नेमा ५९ कम्पनी पनि छन्, जसमध्ये सबैभन्दा धेरै नारायणी विकास बैंकको ९ दशमलव ८७ र युनाइटेड मार्दी हाइड्रोपावरको ९ दशमलव ८५ प्रतिशतले शेयरमूल्य घटेको छ ।

कारोबारमा सबैभन्दा बढी नेपाल लाइफ इन्स्योरेन्सको ७२ करोड ८८ करोड रुपैयाँबराबरको शेयर कारोबार भएको छ भने दोस्रोमा नेपाल रि-इन्स्योरेन्स कम्पनीको ५७ करोड ३९ लाख रुपैयाँबराबरको शेयर कारोबार भएको छ ।