अस्थिर राजनीतिले शेयरबजारलाई वियरिस ट्रेण्डमा फर्काउला ? यसो भन्छन् विश्लेषक

अस्थिर राजनीतिले शेयरबजारलाई वियरिस ट्रेण्डमा फर्काउला ? यसो भन्छन् विश्लेषक

A+ A A-

प्रधानमन्त्री केपी शर्मा ओलीको सिफारिसमा संसद विघटन भएसँगै राजनीतिक अस्थिरताको कालो छायाँ शेयर बजारमा देखिएको छ । कारोबार सुरू भएको १८ मिनेटमा नै नेप्से सूचक ७० अंकले घट्दा लगानीकर्तामा निराश देखिएका छन् ।

पहिरो जाँदै सम्हालिँदै गरेको शेयरबजार अब कता जाला भन्नेमा लगानीकर्ता सशंकित बनेका छन् । जसले गर्दा आइतबारको शेयर कारोबार पनि अस्थिर बन्न पुग्यो । बुलिस् ट्रेण्ड सुरु भएर नेप्से सूचकले २१ सयको बिन्दु पार गरेसँगै हौसिएका लगानीकर्तालाई राजनीतिको कालो छायाँले असर गर्दा पुनः प्यानिक हुने अवस्था सिर्जना हुनसक्ने शेयर विज्ञको अनुमान छ ।

राजनीतिक उथलपुथलका कारण आइतबार एकै दिन शेयर बजार ९६.८८ अंकले घटेर सबै समूह राताम्मे बनेका छन् ।

यसै विषयलाई लिएर शेयबजार विश्लेषक विष्णु बस्याल अहिले नै प्यानिक भइहाल्नु पर्ने अवस्था नरहेको बताउँछन् । संसद विघटनसँगै बजारमा पहिरो गएपनि दिनभरिको बजारको अवस्थालाई नियाल्ने हो भने बजार सम्हालिएको देखिन्छ ।

जस्तो १८ मिनेटसम्म नेप्से सूचक ७० अंकले घटेपछि पुनः सूचक बढेको छ। ११ बजेर ४४ मिनेटसम्म बजारले उकालो यात्रा तय गरेर पुनः अस्थिर बन्दै बन्द भएको छ । सुरूमा अत्तालिएका लगानीकर्ता विस्तारै सम्हालिएको देखिन्छ ।

तर आजको कारोबारमा बजार संयमित देखिएपनि भोलिको बजारमा झनै बढी पहिरो आउनसक्ने सम्भावना रहेको विश्लेषक बस्याल बताउँछन् ।

उनी भन्छन्, ‘ठोस निर्णयसँगै राजनीति अगाडि बढ्यो भने बजारमा ठूलो प्रभाव पार्दैन । बुलिस् ट्रेण्डमै रहन्छ । तर राजनीतिक परिवर्तनको प्रकृया लम्बिएमा वा खिचातानी बढ्दै गएमा बजारले पुनः वियरिस् ट्रेण्ड समात्ने र लगानीकर्ता प्यानिक हुने अवस्था आउनसक्छ ।’

आइतबारको कारोबारमा राजनीतिको 'सर्टटर्म इफेक्ट' देखिए यसले दीर्घकालीन रुपमा लगानीप्रति विश्वास गुमाउन सक्ने खतरा रहेको उद्योगीहरुको आशंका छ ।

नेपाल उद्योग परिसंघका अध्यक्ष शतिस मोर पनि राजनीतिक अस्थिरताले लगानीको वतावरण ध्वस्त हुन सक्ने बताउँछन् । राजनीतिक खिचातानी बढ्दै गए लगानी असुरक्षित हुन सक्ने सम्भावनाले लगानीकर्तामा प्यानिकको अवस्था सृजना गर्ने उनको आकलन छ ।

उनी भन्छन्, ‘संसद विघटनले राजनीतिमा पहिरो मात्रै आएन उद्योगीहरु फेरि आर्थिक संकटमा फस्न सक्ने सम्भावना पनि बढ्यो । त्यति मात्र नभएर अब शेयर बजारमा लगानीकर्ता ढुक्क हुने अवस्था पनि हराउँदै जान सक्छ ।’ अध्यक्ष मोर पनि यसले शेयरबजार बढ्नुको सट्टा घट्ने सम्भावना बढेको बताउँछन् ।

यता केही विश्लेषक भने राजनीतिक खिचातानीले समग्र अर्थतन्त्रमा असर पुर्‍याए पनि शेयरबजारको गति भने परिवर्तन गर्न नसक्ने बताउँछन् । देशमा उद्योगधन्दा र लगानी गर्ने नयाँ ठाउँ नभेट्दा शेयरबजारमा लगानी गर्नेको चाप बढ्न सक्ने उनीहरुको अनुमान छ । जसले गर्दा राजनीतिको कालो छायाँले लगानीकर्तालाई अँध्यारो बनाउन नसक्ने उनीहरुको भनाई छ ।

त्यसो त आइतबारको कारोबारमा किन्ने भन्दा बेच्ने लगानीकर्ताहरुको बाक्लो उपस्थिति देखिदा लगानीकर्ताको मनोबल खस्केको हो कि भन्ने स्वतः अनुमान गर्न सकिन्छ । जसले भोलिको कारोबार पनि ओरालो लाग्ने सम्भावना बढेको छ ।

यस्तो रह्यो आजको शेयर कारोबार

आजको कारोबार दिनभर नै अस्थिर रह्यो । लगानीकर्ताले असुरक्षित महसुस गरे भने बुलिस् ट्रेण्डमा पाइला टेकेको पूँजी बजार पुनः प्यानिक अवस्थामा जानसक्ने भन्दै लगानीकर्ता किन्न भन्दा बेच्नतर्फ आकर्षित बने ।

आइतबार ९६.८८ अंकले घटेर १९३५.६३ अंकमा नेप्से सूचक बन्द हुँदा १ सय ९८ कम्पनीको १ करोड ४५ लाख ९ हजार ५ सय ३३ कित्ता शेयर ९ अर्ब ४ करोड ९२ लाख २७ हजार ५ सय ४७ रुपैयाँमा कारोबार भयो ।

त्यस्तै ठूला कम्पनीहरुको कारोबार मापन गर्ने सेन्सेटिभ परिसूचक पनि १६.३९ अंकले घटेर ३६९.५५ अंकमा पुगेको छ ।

अन्य समूह ८.९,जलविद्युत ६.६८,निर्जीवन बीमा ५.५८,जीवन बीमा ५.०५, व्यापार ४.२८, विकास बैंक ३.६९, उत्पादन तथा प्रशोधन २.९२,बैंकिङ २.२७, होटल २.६३, वित्त २.३५ र म्युचुअल फण्ड समूहको ०.९९ प्रतिशतले नेप्से सूचक घटेको छ।

त्यस्तै कारोबारमा आएकामध्ये १६५ कम्पनीको शेयरमूल्य ओरालो लाग्यो भने ८ कम्पनीको मात्रै बढेको छ ।

शेयरमूल्य बढाउनेमा युनाइटेड मार्दी हाइड्रोपावर अगाडि छ । जसले ८.८ प्रतिशतले शेयरमूल्य बढायो । बाँकी ७ कम्पनीले भने न्युन प्रतिशतले मूल्य बढाए ।

यता सूर्योदय लघुवित्त १० प्रतिशतले घटेर नकारात्मक सर्किट लाग्न पुग्यो भने १२ कम्पनीको शेयरमूल्य ९ प्रतिशतले घटेको छ ।

त्यस्तै कारोबारमा भने नेपाल लाइफ इन्स्योरन्स र नेपाल रिइन्स्योरेन्स अगाडि छन् ।

प्रकाशित मिति: आइतबार, पुस ५, २०७७ १६:०६