तीनथाना–कीर्तिपुर जोड्ने पुल निर्माण समयमै सक्न निर्देशन

A+ A A-

शहरी विकास मन्त्री कृष्णगोपाल श्रेष्ठले काठमाडौंस्थित चन्द्रागिरि नगरपालिका र कीर्तिपुर नगरपालिकाको विकास निर्माणसम्बन्धी परियोजनाको अवलोकन गरेका छन् ।

मन्त्री श्रेष्ठसहित भौतिक पूर्वाधार तथा यातायातमन्त्री बसन्तकुमार नेम्वाङले काठमाडौंको चन्द्रागिरि नगरपालिका र कीर्तिपुर नगरपालिका जोड्ने पुलको अवलोकन गरेका हुन् । गत आर्थिक वर्षमा शिलान्यास भई निर्माण कार्य प्रारम्भ भएको तीनथाना-कीर्तिपुर जोड्ने पुलको काम भइरहेको छ ।

अवलोकनको क्रममा ८० प्रतिशत काम सम्पन्न भइसकेको र यसै वर्षको फागुनमा निर्माण सम्पन्न भइसक्ने देखिएको शहरी विकासमन्त्री कृष्णगोपाल श्रेष्ठले बताए । उनले काठमाडौं निर्वाचन क्षेत्र नं. ९ र १० मा विभिन्न विकास निर्माणको काम भइरहेको र ती सबैलाई समयमै सम्पन्न गरिने बताए । मन्त्री श्रेष्ठले उक्त स्थानमा रहेको विष्णुदेवी मन्दिर परिसरको एकीकृत विकास गरिने पनि बताए ।

कोभिड-१९ को असर र वर्षायामको असरको बामजुद पनि पुल निर्माण गर्ने कार्य समयमै सकिने अवस्था देखिएको यातायातमन्त्री नेम्वाङले बताए ।

सो अवसरमा निर्माण कम्पनीका प्रतिनिधि र आयोजनाका इन्जिनियरले यो वर्षको अन्त्य सम्ममा पुलको निर्माण भइसक्ने बताए । अवलोकनको क्रममा दुवै मन्त्रीले पुलको निर्माण द्रुत गतिमा गर्न निर्देशनसमेत दिएका थिए ।

यस वर्ष कोभिड-१९ को कारण देशभरका निर्माणकार्यमा असर परेको छ । लामो समयको लकडाउनपछि विस्तारै निर्माण क्षेत्रमा काम सुरु हुन थालेका छन् भने सम्बन्धित मन्त्रीहरूले अनुगमनमा तीव्रता दिइरहेका छन् ।

प्रकाशित मिति: शुक्रबार, पुस ३, २०७७ १७:४८