नेकपा नेता नै भन्छन् : सं‌वैधानिक परिषद्को बैठक पार्टी निर्णयविपरीत

A+ A A-

प्रधानमन्त्री केपी ओलीले आज साँझ डाकेको संवैधानिक परिषद् बैठकप्रति नेकपा नेताहरू विरोधमा देखिएका छन् । हिजोको स्थायी कमिटी बैठकले संवैधानिक परिषद्सम्बन्धी अध्यादेश फिर्ता गर्ने सर्वसम्मत निर्णय गरेको थियो ।

पार्टीको निर्णयविपरीत ओलीले अचानक परिषद्को बैठक बोलएपछि पार्टीमा अर्को विवाद थपिएको हो । अध्यादेश फिर्ता मात्र होइन, संवैधानिक निकायमा नियुक्ति गर्दा सहमतिमा गर्ने पनि स्थायी कमिटीले निर्णय गरेको थियो ।

स्थायी कमिटी सदस्य अष्टलक्ष्मी शाक्यले परिषद् बैठक बोलाएर प्रधानमन्त्री ओलीले पार्टी निर्णय नमानेको बताइन् । ‘फेरि पनि पार्टीको निर्णयलाई नमानेको देखियो । स्थायी कमिटीले सर्वसम्मत निर्णय गरेपछि अध्यादेश फिर्ता लिने प्रक्रियामा जानुपर्नेमा बैठक बोलाउनु गलत हो', शाक्यले शिलापत्रसँग भनिन्, 'प्रधानमन्त्रीले पार्टी निर्णयमा इमानदार हुनु पर्दैन ? यो त बेइमानी काम हो । प्रधानमन्त्रीका खराब सोच र निर्णय मान्न पार्टी बाध्य छैन ।’

अध्यादेश फिर्ताका लागि परिषद्को बैठक आवश्यक पर्दैन । अध्यादेश फिर्ताका लागि सरकारले निर्णय गरेर राष्ट्रपति कार्यालयमा पत्र पठाए हुन्छ । तर, प्रधानमन्त्री ओलीले संवैधानिक निकायमा एकलौटी नियुक्ति गरेर अध्यादेश फिर्ता लिने रणनीति बनाएको हुन सक्ने आकलन पनि नेकपाका नेताले गरेका छन् ।

नेकपाका अर्का स्थायी कमिटी सदस्य बेदुराम भुसाल पनि ओलीले बोलाएको संवैधानिक परिषद्को बैठक स्थायी कमिटीको निर्णयविपरीत हुने बताउँछन् । ‘आज फेरि किन गरेको थाहा छैन । तर, संवैधानिक परिषद्को बैठक बस्न लागेको हो भने स्थायी कमिटीको निर्णयविपरीत हुन्छ’, भुसालले भने ।