मन्त्री श्रेष्ठलाई जनताले भने : खबरदार ! पार्टी फुटाउन पाइँदैन

A+ A A-

'खबरदार ! पार्टी फुटाउन पाइँदैन, पार्टी फुटे जनातको मन रुन्छ, त्यसैले पार्टी फुटमा होइन जुटेरै अघि बढ्नुपर्छ,' शहरी विकासमन्त्री कृष्णगोपाल श्रेष्ठलाई काठमाडौंको चन्द्रगिरिमा पार्टीलाई एकताबद्ध रूपमा अघि बढाउन खबरदारी गर्दै जनताले आग्रह गरे ।

चन्द्रागिरि नगरपालिका-१ वडाले आयोजना गरेको कार्यकर्ता भेटघाट कार्यक्रममा पुगेका मन्त्री श्रेष्ठलाई पार्टी फुटाउँदा कार्यकर्ताको त केही जाँदैन तर नेताको पद र सेवा सुविधा गुम्ने त होला नि भन्दै व्यंग्य गरे ।

'मैले तपाईंहरूले उल्लेख गरेको विषयलाई पार्टीको उच्च तहमा पुर्‍याउने छु', जनताको भनाइ सुनेपछि मन्त्री श्रेष्ठले भने, 'आम कार्यकर्ताको सहयोगमा बनेको सरकार र पार्टी कुनै पनि हालतमा फुट्न दिँदैनौँ ।' सरकार र पार्टीबीच कुनै असमझदारी नरहेको स्पष्ट पार्दै उनले यदी त्यसो हुन गए जनतालाई खबरदारी गर्न आग्रह गरे ।

सो क्रममा मन्त्री श्रेष्ठले पाटी फुटको संघारबाट जोगिएको स्पष्ट पार्दै अब मिल्नुको विकल्प नभएको बताए । 'तपाईंहरू ढुक्क हुनुहोस्, हामी कुनै पनि हालतमा पार्टी फुट्दैन, फुट्न पनि दिँदैनौँ । प्रधानमन्त्री केपी ओलीको सरकार पूरै अवधी टिक्नेछ', उनले जनतालाई आश्वस्त पार्न खोजेका थिए ।

उनले जनताको चाहनाअनुसार विकास निर्माणको कामले तीब्रता लिएको उल्लेख गर्दै जनताको मायाको कारण सरकारको लोकप्रियता बढ्दै गएको बताए ।

कार्यक्रममा बागमती प्रदेशका सांसद हरिशरण थापाले सरकार र पार्टीलाई बचाउन कार्यकर्ताको तर्फबाट सबै खबरदारी गर्नुपर्ने बताए । कार्यक्रममा चन्द्रागिरी नगरपालिका- १ का अध्यक्ष राजेन्द्र केसीले वडा र सो क्षेत्रको विकासका योजनाबारे जानकारी गराए ।

प्रकाशित मिति: बिहीबार, पुस २, २०७७ १४:२७