नेकपाको किचलोमा फसिन् राष्ट्रपति, बाबुराम भन्छन् : महाअभियोगतर्फ लाग्ने कि !

नेकपाको किचलोमा फसिन् राष्ट्रपति, बाबुराम भन्छन् : महाअभियोगतर्फ लाग्ने कि !

A+ A A-

प्रधानमन्त्री केपी शर्मा ओलीले मन्त्रिपरिषद्लाई समेत जानकारी नदिई मंगलबार सिफारिस गरेको संवैधानिक परिषद्सम्बन्धी अध्यादेश राष्ट्रपति विद्यादेवी भण्डारी तत्कालै जारी गरिन् । तर, सत्तारुढ नेकपाका ८३ सांसदको हस्ताक्षरसहित संसदको विशेष अधिवेशन डाक्न दिएको निवेदन राष्ट्रपति कार्यालयले बुधबार दिनभर दर्ता गरेन ।

यी दुई घटनाले राष्ट्रपति भण्डारी सत्तारुढ नेकपाको शक्ति संघर्षमा पुनः एक पटक मुछिएकी छन् । नेकपा स्थायी कमिटी सदस्यद्वय भीम रावल र पम्फा भुसाल संसद अधिवेशन मागको निवेदन दर्ता गराउन दिनभर शीतलनिवासमा बसेका थिए । तर, राष्ट्रपति कार्यालयका सचिव हरि पौडेल अनुपस्थित रहेको भन्दै निवेदन दर्ता भएन ।

यता, बालुवाटारमा अध्यक्षद्वय ओली र पुष्पकमल दाहाल 'प्रचण्ड'बीच सरकारले ल्याएको अध्यादेश र सांसदहरूले संसद बोलाउन बुझाएको निवेदन फिर्ता गर्ने सहमतिपछि स्थायी समिति बैठक बसेको थियो । बैठकले अध्यादेश र निवेदन दुवै फिर्ता लिने निर्णय गरेपछि मात्र रावलको टोली शीतलनिवासबाट फर्केको थियो ।

नेकपा केन्द्रीय सदस्य विष्णु रिजालले राष्ट्रपति संस्थाको जसरी दुरुपयोग गरिएको र यसले गणतन्त्रकै खिल्ली उडाएको बताएका छन् । सामाजिक सञ्जालमा उनले लेखेका छन्, ‘नेताहरूबीच आरोप-प्रत्यारोप चल्छ, विवाद-बहस हुन्छ, विमति-सहमति हुन्छ । तर, संविधानले राष्ट्रको अभिभावक मानेको संस्था नै त्यस्तो बेला मैदानमा ओर्लिएपछि त्यस्तो संस्थाको मर्यादा कहाँ रहन्छ र ? आफूलाई मन परेको टीमले गोल खान लाग्यो भने पनि रेफ्रीले गोल पोस्टमा पुगेर छेक्न मिल्दैन । आज राष्ट्रपति संस्थाको जसरी दुरुपयोग गरिएको छ, यसले गणतन्त्रकै खिल्ली उडाएको छ ।’

पूर्वप्रधानमन्त्री एवं जनता समाजवादी पार्टीका संघीय अध्यक्ष बाबुराम भट्टराईले प्रधानमन्त्री ओली र राष्ट्रपति भण्डारीका थप धुन्धुकारी हर्कत रोक्न संसद् अधिवेसन र महाभियोगतर्फ लाग्नुपर्ने बताएका छन् । उनले भनेका छन्, ‘महाभारतका दुर्योधनहरूले द्रौपदीको चीरहरण गरिरहदा भीष्महरू मौन बसेझैँ ओलीले संविधान र लोकतन्त्रको हुर्मत लिइरहँदा सत्तापक्षभित्रका र विपक्षका नेताहरू बैठक, वक्तव्यवाजी र गनगन गरेर मात्र बस्ने हो कि बेलैमा प्रम र रापका थप धुन्धुकारी हर्कत रोक्न संसद अधिवेसन र महाभियोगतर्फ लाग्ने हो ?’

नेता भट्टराईले प्रथम राष्ट्रपति डा. रामवरण यादव र वर्तमान राष्ट्रपति भण्डारी दुवैबारे आत्मसमीक्षा गर्नुपर्ने बताएका छन् । पहिलो राष्ट्रपति निर्वाचनमा पराजित गणतन्त्रवादी नेता रामराजाप्रसाद सिंहलाई सम्झिदै ट्विट गरेका छन्, ‘सबैले आत्मसमीक्षा गरौँ, विपक्षी दलका पहिलो राष्ट्रपति मन्त्रिपरिषद्ले पारित गरेका कुनै अध्यादेश जारी नगरेर निर्वाचित सरकारलाई असफल पार्ने ! सत्ताधारी दलकी दोश्रो राष्ट्रपति प्रधानमन्त्रीको लहडको अध्यादेशलाई मिनेटमा जारी गर्ने ! कतै पहिलो राष्ट्रपति पदका जायज हकदार स्वतन्त्र व्यक्ति रामराजाको सराप त लागेको हैन ?’

प्रकाशित मिति: बुधबार, पुस १, २०७७ १९:२५