अध्यादेश फिर्ता लिन र संसद अधिवेशन डाक्न दबाब दिने कांग्रेसको निर्णय

A+ A A-

प्रमुख प्रतिपक्ष दल नेपाली कांग्रेसको पदाधिकारी बैठकले संवैधानिक परिषद्सम्बन्धी अध्यादेश फिर्ता लिन र छिटोभन्दा छिटो संसद अधिवेशन डाक्न सरकारलाई दबाब दिने निर्णय गरेको छ ।

बुधबार कांग्रेस सभापति शेरबहादुर देउवा निवास बूढानीलकण्ठमा बसेको बैठकले यस्तो निर्णय गरेको हो ।बैठकले सरकारले ल्याएको अध्यादेश संविधानको मर्म विपरित भएको ठहरसमेत गरेको छ । बैठकका निर्णय सुनाउँदै पार्टी प्रवक्ता विश्वप्रकाश शर्माले संसद अधिवेशन छलेर संविधानको मर्मविपरित अध्यादेश जारी गरी सरकारले अलोकतान्त्रिक र सर्वसत्तावादी चरित्र उजागर गरेको बताए ।

उनले भने, ‘संवैधानिक परिषद्को काम कर्तव्य र अधिकार सम्बन्धी ३० मंसिरमा जारी अध्यादेश संविधानको मर्म र भावना विपरित रहेको छ । संसद अधिवेशन छलेर संविधानको मर्म विपरित अध्यादेश जारी गरेर वर्तमान सरकारले अलोकतान्त्रिक र सर्वसत्तावादी चरित्र थप उजागर गरेको छ ।’

अध्यादेश जारी भएपछि हुने कुनै पनि निर्णय कांग्रेस पार्टीलाई मान्य नहुने पनि प्रवक्ता शर्माले बताए । उनले भने, ‘संवैधानिक परिषद्को गरिमा समाप्त गरेर जारी गरिएको अध्यादेशपद्धि कुनै पनि निर्णय भएको खण्डमा भएको वा हुने दुवै स्थितिमा नेपाली कांग्रेस पार्टीलाई मान्य नहुने चेतावनी पनि बैठकले दिने निर्णय गरेको छ । यो अध्यादेश अविलम्ब फिर्ता हुनर्छ भनेर बैठकले माग गरेको छ ।’

कांग्रेसले संघीय संसदको अधिवेशन तत्काल बोलाउनसमेत माग गरेको छ । प्रवक्ता शर्माले भने, ‘बैठकले संघीय संसदको अधिवेशन अविलम्ब बोलाउन माग गर्ने निर्णय गरेको छ र संवैधानिक परिषद् सम्बन्धी जारी अध्यादेश एवं अन्य समसामयिक राजनीतिक विषयमा छलफल गर्नलाई कांग्रेस पार्टीको संसदीय दलको बैठक बोलाउने सम्बन्धी थप छलफल भइरहेको छ ।’