प्रचण्डको पूरक प्रस्ताव आउने, ३८ पाने प्रतिवादकाे प्रतिवाद ३८ बुँदामा !

नेकपा अध्यक्ष पुष्पकमल दाहाल 'प्रचण्ड'

A+ A A-

नेकपा अध्यक्ष प्रचण्डले २८ मंसिरको स्थायी कमिटी बैठकमा अर्को प्रस्ताव ल्याउने तयारी गरेका छन् । अध्यक्ष तथा प्रधानमन्त्री केपी ओलीको राजनीतिक प्रतिवेदनमा उठाइएका प्रश्नको जवाफसहित प्रचण्डले ‘पूरक प्रस्ताव’ ल्याउन लागेका हुन् ।

प्रचण्डनिकट स्रोतका अनुसार पूरक प्रस्ताव तयार भइसकेको छ । २१ मंसिरकै स्थायी कमिटी बैठकमा पेस गर्ने तयारी गरेका प्रचण्डले थप राजनीतिक संवादपछि प्रस्ताव स्थायी कमिटीमा लैजान लागेका हुन् ।

३ मंसिरको सचिवालय बैठकमा उनले पेस गरेको १९ पृष्ठ लामो ‘राजनीतिक प्रस्ताव’मा अर्का अध्यक्ष ओलीमाथि गम्भीर आरोप लगाइएको छ । पार्टी सञ्चालनदेखि सरकार सञ्चालनसम्म कमजोरी गरेकाे भन्दै उनले बुदाँगत रूपमा टिप्पणी र आरोप लगाएका थिए । त्यसको प्रतिउत्तरमा अध्यक्ष ओलीले ३८ पृष्ठको अर्को जवाफी प्रस्ताव सचिवालयमा पेस गरे ।

१३ मंसिरको सचिवालय बैठकमा ओलीले प्रस्तुत गरेको प्रस्तावमा शान्तिप्रक्रियासँग जोडिएका मुद्दा, पार्टी एकताभन्दा अघिका राजनीतिक घटनाक्रमलाई समेत जोडेर आरोपित गरेको भन्दै प्रचण्डले त्यसको जवाफस्वरूप पूरक प्रस्ताव ल्याउन लागेका बताइएकाे छ ।

प्रचण्डनिकट स्रोतका अनुसार ३८ बुँदामा प्रचण्डले ओली प्रस्तावकाे जवाफ दिनेछन्, जसमा शान्ति प्रक्रिया, पार्टी एकता प्रक्रिया, पार्टी सञ्चालनमा ओलीले सिर्जना गरेका अवरोधलगायत नेकपाको अबको बाटो कस्तो हुने भन्ने धारणा हुनेछ ।

प्रचण्डनिकट स्रोतले भन्यो, ‘अध्यक्ष ओलीले कार्यकारी अध्यक्षको भूमिका पाएपछि पार्टीको काम के गर्नुभयो ? भन्दै प्रश्न उठाएका छन् । त्यसको जवाफ दिन ओलीले संगठनको संचरना निर्माण खडा गरेका अवरोधहरू समेटिनेछन् ।’

प्रचण्डनिकट एक नेताका अनुसार प्रचण्डको ‘पूरक प्रस्ताव’ स्थायी कमिटी बैठक बस्नुअघिको एकहप्ताको समयमा नेकपाभित्र सिर्जना हुने समीकरण र उत्तरचढावका कारण पनि कसरी प्रस्तुत हुने भन्नेमा भर पर्नेछ ।

प्रकाशित मिति: सोमबार, मंसिर २२, २०७७ १५:२४